SIRAKE 19
19
1Manga go totono papasi tare,
i asa vigu page ruruguha.
Manga go vi, vigo maramiki,
ki arârâ ma igo ko page hagaratemu maremu.
2Henaka na mane ga nahuni takoha,
na vaini ma na gete ka katora ka bekabeka surira.
Na mane i tarisurira na êrâ
ngaia ki ama ni tabaga nga.
3Na tabaganiha ngekana ki page hagamesia.
Na mama ka page ngaua na kakagana na gahuana.
4Manga go hatani hagêguritogo renira na enoni,
igo ko beka.
Manga go tasitasi vikana, igo ko erasigo maremu.
5Manga go vagevagesia na eraha,
na suriha ki page hagaitangigo.
6Siana ko bagatabotabohara,
i era ma ko erasigo maremu.
7Siana ko toratora tamasinga
i era ma ko tangahurigo.
8Siana ko hagatarêngenia
tangara na tamamu se na merongamu
nga noga ma go tasitasi manga vigo pe tamasia mave.
9Na ani go hagarongoa renia, ngaia ki hinarugo.
Ki arârâ ma ngaia ki page ruhigo renia.
10Manga go rongoa ta na marâ,
hoi, go naka so i na aitangihamu ma ko meme henia.
Siana ko magu. Ngaia ki asa vige katogo ku raboa!
11Na enoni bekabekaga i uhungia
vi pinihia na marâ i rongoa,
ngaia ki harate tamasinga manga na gete i harate kare.
12I na ara ni matena i rongoa na marâ tanga i pinihi,
na marâ ki susu igê na aitangihana
manga na mage i susu igê na tangana.
Siana vi na suriha purupuru
13Matena go rongoa na tamamu i aharê igê ta na marâ,
go hagatea renia. Vari i pe monari.
Ma ki manga i monari, go girara,
hanana vi siana ngaia ki katoa akê nikâ.
14Manga go rongoa na tamamu i tamasia na marâ
i pe araria vige tamasia,
go hagatea renia. Vari ngaia ki pe tamasia.
Ma ki manga i monari, go girara,
hanana vi siana ngaia ki tamasia akê nikâ.
15Manga go rongoa na tarana i pe oto renia na tamamu,
go hagatea renia. Vari na hagaparuana ma.
Hagarako na enoni ka tamasi erasira na enoni getera.
Tahema siana ko gahesurigi na ara ni marâ go rongogi.
16Ta na enoni vari ki bagatatamasi purupuru.
Ti na hitangika kani pe tasi noga vikana?
17Manga go rongoa ta na marâ
go mangariaga renia tanga na tamamu,
go hagatea renia, i era ma ko ramonia purua.
Go naka vê ma tanga na ramata iana God raramohaga hunia.
18Go hagahigasia na Araha ma ngaia ki kahu takigo.
Manga go nahuni takoha mataha, ngaia ki page takuigo.
19Na aitangisiha renigi na ramata iana na Araha
ka na hagaotonga ni mêriha.
Na ani ga hagakoro obana,
ka ngaugi na guani na apinige ni mêriha hagahu.
Na aitangisiha, na ani i monari ma na ani i pe monari
20Na hagahigasiana na Araha ngaia ka na takoha mataha.
Na takoha mataha ki vi na marupeani na ramata
ma na giraraha renia na raramohana raha hunia.
21Manga na enoni tagara ma ki pe tê viteana na ani i raha tanga
ma hemuri ki tê viteana,
na ani i raha tanga ki mangariaga mênga tanga.
22Manga go giraragi ngavê na eraha,
ki pe vi, vi igo ko nahuni takoha mataha.
Igê na hagaotonga iata na enoni tasi
ki mareha ngavê igê na takoha mataha.
23Na giraraha tanga na eraha ki era ngavê.
Tani na enoni bekabekaga ka pe nahuni giraraha rârâ.
24Na enoni i tê viteana God, henaka i pe nahuni aitangisiha
ma ngaia ki teharia na enoni tasi i nahuni aitangisiha.
25Tani na enoni ka aharê,
henaka ga nahuni aitangisiha ngavê.
Tani na enoni ka nahunigi na marâ ga tenigi,
suria ga hagamemesi ringeta.
26Tani na enoni era ka bâbâ hemarisi ma ka bâbâ ruruhi,
hanana ga hagaparugo ma.
27Ngaira ka pipinihi maata ma ka pe karingago.
Manga go pe hinarura,
ngaira ka hagagasuga ni hagabekasigo.
28Manga i barabara tangara hanana vige bagatauhata râ nga,
ngaira ka page katoa râ nga igê na kere matena i ararira.
29Igo ko bâbâ hagagara renia na enoni renia maana.
Na maana ki hagagirara vi ngaia ki nahuni takoha se mareha.
30Na gahunga iana, na mamananiha ma na râha iana
ka hagabângenia na tauhana.
Currently Selected:
SIRAKE 19: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific