SIRAKE 18
18
God ki raha ma na enoni ki na marâ purua ma
1Na Araha i gâga hagahu
ki hagavorara na ara ni marâ hato ga oga.
2Ngaia getea ma kani oto.
I mareha rârâ vi tani me nikâ.
3Na maveta ki tâ i na ababani rimana
ma na ara ni marâ ka tê viteana.
Ngaia ki marungira na ara ni marâ hato ga oga.
Na raramohana ki voasigi na marâ koro tenigi na marâ era.
4Ngaia ki pe haganahunia ta na enoni renia na ramoha,
hanana i ramatenigi susurigi na tagaraha raha iana.
Ti ki girara i aitangisigi hagenani?
5Ti ki girara i hagararingenia na raramohana i hahanetaga?
Ti ki girara i tomanigi hato na tauhana ni hetakiha?
6Igia ki bara vige hagatonganigi kê nikâ
se vige hagasibagi.
I asa vige aitangisigi na tagaraha raha iana na Araha.
7Matena na enoni i hatungigi na ara ni takoha hato iana,
ngaia ki mareha nga vige haganega.
Matena i takotako hato, ngaia ki ama ni tugupu nga.
8Na ta ka na enoni? Tanga na ta kani ngaia?
Na tauhana koro ma na bagatauhana ki tanu hega?
9Manga na enoni
ma ki mauri ki tarahua akê na tangarê na harisi,
ngaia ki mêri borahu.
Ma ta kere ani ma ka tarahua vikana.
10Manga vige hagararingenigi na harisi ngegana
henia na mêriha i bani goga me ma ki gâga hagahu,
ngaigi ke manga na kere êsusu gitage na ve i asi,
se manga na kere maana gitage na one.
11Tahema na Araha ki haritagi henigia.
Tahema na hetakiha iana ki aharêsigia.
12Ngaia ki bâhagagara renigia
vi igia ka page meme nga.
Tahema ngaia ki agana
ki bonotenigi na tasi iaka.
13Na enoni ki takira ma na goana
ma na Araha ki takira na ara ni enoni hato.
Ngaia ki hagaotogia, ki ramonigia ma ki hagesurigia.
Ngaia ki manga na enoni i bâsuri sipi.
Ngaia ki toregia aporo i pasina.
14Ngaia ki takigia,
manga vi igia ma ka aganarigi na hagaotonga iana
ma ka gunahigi na suriha iana.
Na morana na takuiha
15Kakare, matena go tamania na enoni,
siana ko ramonia vê nikâ.
Matena go mahata tanga,
siana ko tamasi hagamamasiaga vê nikâ.
16Na tamasinga iamu ka raha teharia na mahatanga iamu.
Ngaigi ki manga na kârupu
i hatungia na bababana na arito ru.
17Hoi, na tamasinga i rongo koro
ki teharia na mahatanga koro ngavê.
Manga igo ma ko haritagi monari,
igo ko mahatangenirerua ngairerua hato.
18Na enoni bekabekaga ki guhaguha,
suria i pe haritagi.
I asa vige riki na maana na enoni,
manga vigo mahata tanga ma ko bâbâ marababaga.
Go ototo surigo maremu
19Go tamasi takotako.
Go bâbâsuria nga na apekoroha iamu,
i era ma ko maeha.
20Go bâbâ maninga igê na aitangihamu,
i era ma na Araha ki hagaitangigo.
Vikana, matena i surigo, ngaia ki page takigo.
21Gu tangahurigo,
i era ma ki tarahugo na maeha meni na tasi iamu.
Matena go tasitasi hato, go urisi parongamu.
22Manga go surusuru tanga na Araha,
siana ko hagababea vigu hagamonaria.
Siana ko hagababea vigu hagaotogi na marâ,
matena go sugi meme.
23Go takotako maninga hagenago ma ko kahu surusuru.
Siana ko uhungia na Araha, suria vigo pe hagamonaria.
24Takusia na mangariaganiha iana na Araha,
i page tarahugo igê na matena go meme igê.
Matena i surigo, ngaia ki page hagaitangigo.
25Matena go nahunigi na ara ni marâ go obanigi,
go takusia nga na matena ni magêha.
Matena go ruruguha,
go takusia nga na matena ni matarehana.
26Na ogaha iamu i mavoraro ki girara
i totora getea ngavê tenia na ogaha iamu i manurahi,
suria i maana na Araha na ara ni marâ ka rêrête ma.
27Manga go nahuni takoha mataha,
igo ko tototo surigo maremu tare.
Matena na eraha ki ramoramo i pasita na enoni,
go hinahinaru, siana ko aharê nogamu.
28Na ara ni enoni i nahuni takoha,
ngaia ki bâbâgirara na takoha mataha
ma ki hagahigasia na anima na enoni ni takoha mataha.
29Na enoni ga rongogiraragi na tamasinga ni takoha mataha
ngaira ka hagabângenia na takoha mataha
ma ka nganga renia tangara na enoni getera.
30Siana ka angarigo na teniha era
ma siana ko aganarigi.
31Manga go aganarigi na ara ni teniha igê na aitangihamu,
na merongamu ka page megomarabe.
32Siana ko aganaria na ogaha ni ruruguha raha.
Siana ko katokato vikana, suria i page katogo ko matareha.
33Manga go pe nahuni haga tangagi na magotoha raha,
siana ko kauni,
i era ma ko page matareha ma ko baganunungi.
Currently Selected:
SIRAKE 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific