SIRAKE 17
17
1Na Araha ki hagavorara na enoni renia na mako
ma ki katoa na ara ni hitangita
ki voravora aporo re na mako.
2Ngaia ki nakagi tangara na mateni ga mauri surigi.
Ngaia ki haganahunira renia na ramoha,
hanana ga marungira na marâ hato i maveta.
3Ngaia ki haganahunira renia na raramohana marena
ma ki katora ka maratorana so ngaia marena.
4Ngaia ki katora na ani getera na marâ mamauri ka magutenira.
Ngaia ki kasira ka marungira na manu ma na marâ mamauri getera.
5Na Araha ki haganahunira renigi na ramoha gi rima
henigi na anguruta tangarerua na takotakoha ma na aitangisiha.
6Ngaia ki haganahunira renigi na maata, na meata, na karingata
na osuta hanana ga takotako, ma na aitangihata.
7Ngaia ki haganahunira renigi na giraraha ma na aitangisiha
ma ki hagagirarara renia na ta ki koro ma na ta ki era.
8Ngaia ki naka na aitangisiha iana igê na aitangihata,
hanana ga tahetara renigi na hahanetagani na tagaraha hato iana,
9ma ka ageagesigi ma ka tamasigi,
10hanana ga hagarahasia re na atana apuna
ma ka tarohenigi na hahanetagani na tauhana hato.
11Ngaia ki naka na giraraha ki oga tangara
ma ki vatera renigi na ramata ni mêriha.
12Ngaia ki naka na suruheri i gâga hagahu henira
ma ki hagagirarara renigi na ramata iana.
13Ngaira ka bâsia na hahanetagana raha
ma ka rongoa na ringena i rongo hagamamagutaga.
14Ngaia ki vi tangara, ki vi:
“Siana kamu katogi na tarani ga pe oto.”
Ngaia ki ramatenia na ara ni enoni vi
i manga i he ka na tauhana tangara na enoni getera.
God ngaia getea ma kani surira na enoni
15Na Araha ki giraragi tare na tauhata na enoni.
I asa vige pinihi tenia.
16Haganega me tenia na matena ga sisite,
ki bâ manga vi na eraha ki okera nga.
Ngaira ki asa vige urusia na aitangihata ni guguruganiha
renia na aitangihata ni tê viteana God.
17Ngaia ki votora na apaneni nuni suria na maveta hagenani
ma ki atera na ani ga marungira hegitigi.
Ma tanga i Isiraele kani ngaia na Araha.
18Isiraele ka na bêbê ni kare iana.
Ngaia ki bâsuria ma ki hagaotoa.
Ngaia ki takuia ma ki katoa ki ape mahaha
hanana i asa vige rumakaka renia.
19Na Araha ki hahutugigi tare na tauhata na enoni.
Na tauhata hato ka oga tatara mave tanga.
20I mareha rârâ ta na tasi iata vige pinihi tenia.
Ngaia ki giraragi ngaigi hato.
21Ma na Araha ki koro.
Ngaia ki girarara na enoni i hagavorara.
Ngaia ki pe rumakaka renira se vige mutera
ma ki takira hete.
22Na mahatanga iaka tangara na enoni matareha
ngaigi ki manga na ringi i kakêna
i raha na mena ma ki oga igê na girarana.
Ngaia ki katogi renia na rokona.
23Ki arârâ, ma na Araha ki page surira na enoni era
ma ki page vatera renia na hagaitangiha i ararira.
24Ma tangara na ani ga urisi parongata,
ngaia ki aganarira aporo.
Ma tangara na ani ga bagahagêguri,
ngaia ki kanukanura, siana ka rumakaka.
Kasigi râ na bagatauhami
25Mu aharia aporo na Araha.
Mu murisigegi na bagatauhami.
Mu nungia maninga, hanana i tamanigamu,
hanana siana kamu tasitasi.
26Mu aharia aporo God raramohaga hunia.
Mu kasigi râ na tasi iami.
Mu kikitenigi ngavê na eraha.
27Na ani ga tahitahi mêngara
ka girara ga visia koro na Araha.
Ti i na agua iata na enoni ga me kani girara
i hagarahasia na Araha God raramohaga hunia?
28Na enoni i tahitahi mênga ma ki komaga
ngaia nga kani girara i kiki hagarahasia na Araha,
ma na enoni i me ma ki magahuru
ngaia ki asa hagetage vige hagarahasia.
29Na takiha iana na Araha ki raha teha ngavê
tangara na ani ga aharia.
Ngaia ki bonotenigi na tasi iata.
30Ma na enoni ki pe tonga renigi na ara ni marâ hato,
suria na ara ni enoni ki tâ tanga i meme.
31Na ta ki mave teharia na arito?
Henaka, ma ngaia ki pe mave, matena i meme.
Na eraha kani okea na enoni i makumakusiga.
32Na Araha ki bâ bê vato renigi na higu hato i vavearo.
Ma igia na enoni, igia ka na kere momo ma na rahu.
Currently Selected:
SIRAKE 17: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific