SIRAKE 16
16
God ki hagaitangira na enoni tasi
1Siana ko obania viga rakorako era na karemu,
manga vi ngaira ma ka erataga.
Siana ko ageagesira o karemu
ga murisigea na Araha.
2Henaka ga rakorako na karemu, siana ko ageagesira,
manga viga pe hagahigasia na Araha.
3Siana ko hagêguri, vi ngaira ka mauri arihu.
Siana ko hagêguritogo renira suria viga rako,
suria manga go taua na kare i tage i tê viteana na Araha,
na tarana ngekana ki koro teharia vigu aparara
na rehagaro na kare ga pe tê viteana na Araha.
Manga go pe tê kare ma ko meme,
na tarana ngekana ki koro teharia go apara kare
ka rakorako ma ka pe botage renia God.
4Manga na ani gi tage ma na enoni i tako mataha
ma ki gâga i hinua,
na hinua ki ama ni raharaha nga.
Ma na hagosi ninuni ga pe botage renia God
ngaia ki page magahuru.
5Inê kê bani bâsigi me hagarako na tarani ngegana
ma kê bani rongogi me na sihonga renigi
ga erataga ngavê teharigi.
6Na mangariaganiha iana na Araha,
ki manga na bagagi raha,
i hagaitangira na kere hakuta ninuni tasi
se na agua hagenani i haritohea na Araha.
7Ngaia ki pe takira na mane ga borahu ma ka raramohaga
ga haritohea, suria ga hagêgurigi na raramohata mareta.
8Ngaia ki pe takira na enoni o Loti i oga i berarogata,
suria i kitenia na paroparoha iata.
9Nikâ na Araha ki pe takira na enoni,
na Isiraelita ga tarigenira hura tenia na apanena iata.
Ngaia ki hagaitangira meni na tasi iata ma ki mutera.
10Nikâ ngaia ki pe takira na 600.000 na enoni
ga aharêvoro igê na bagamasusu raha,
suria ngaira ka guguruga ngavê tanga.
11Henaka vi na vere tage togo ma na enoni i guguruga tanga
ngaia ka page konekonetenia,
manga vi ngaia ma ki tahitahi tenia na hagaitangiha.
I pasina na Araha karu oga igê na hetakiha ma na mangariaganiha.
Na hetakiha iana ki raha
ma ngaia ki girara i mangariaga ngavê nikâ.
12Na hagaitangiha i katoa ki raharaha manga na hetakiha iana.
Ngaia ki suria na ara ni enoni surigi na tauhana.
13Na enoni tasi ki asa vige migigava na marâ i hanagogi
ma na enoni i piringiape ma ki toto suria God,
ngaia ki pe raruni baguru.
14Na enoni i koro i maana God
ki page nahunia na mena na tauhana koro.
Na ara ni enoni ki page nahunia na mena i araria.
15Na Araha ki katoa na maneraha i Esipito
ki pe tê viteana rârâ,
hanana na maveta ki tahetara renigi na tagaraha iana na Araha.
16Na Araha ki takira na marâ hato i hagavorara.
Ngaia ki vutungira na enoni
renirerua na marara ma na mengo iana.
17Siana ko vi: “Inê be ahi tenia na Araha.
Ti kani i haha hanana vi takusiê?
Manga i he kani girara vi bâsiê
suria gê oga i berarogata rako ngavê na enoni?
Na ta kani inê i berarogata na ara ni marâ hato
God i bani hagavorara?
18Bâ, matena i arâ me igê na Araha
na ara ni marâ hato ka page tatata:
na bevoa, na vavearo, na ano ma na rutuni.
19Na barani ma na gatani na maveta ka page gisigisi,
ma ka page angingi, matena na Araha ki boretenigi.
20Ma tangê inê, na Araha ki asa vige takusiê.
Ti kani hahêtugigi na tauhaku?
21Matena gê tasitasi, ti kani bâsiê?
Matena gê bagatauhaku pinihi, ti kani girarê?
22Ti kani page tamasigi na tauhaku koro tanga na Araha?
Ti kani obania vi gâga naasia?
Ngaia ki mehagarihu na suriha.”
23Ngaigi nga na takotako iana na ani i bekabekaga
kani pe nahuni takoha koro ma ki hagaparua so marena.
God ki kasira na enoni ka bâbâsurira na marâ hato i hagavorara
24Kakare, gu rongo ma ku karingê maninga,
hanana go page nahunia na aitangisiha.
25Inê be hagesurigo maninga
ma be hagatarêngenia maninga na aitangisiha iaku tangago.
26Igê na haganegahana na Araha ki hagavorara
na ara ni marâ hatohato
ma ki haganahunira renigi na tauhata ma na atohata hehegitigi.
27Ngaia ki bani hagaotogi hagahu na tauhata
ma ka gâga tarema nga vigana.
Ngaira ki asa vige page magê
se vige meme na apeta.
Ngaira ka ama ni tagara nga tare ki bê ki arâ.
28Ngaira ki asa vige heparapara
ma ka têtê viteana hete tare ki bê ki arâ.
29Matena na Araha ki hagavorara hato,
ngaia ki hahariria na maveta
ma ki hagavunusia renigi na mahatanga koro iana.
30Ngaia ki gahuia renira na ani mavê na marâ mamauri,
ga page meme ma ka voravora aporo re na mako.
Currently Selected:
SIRAKE 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific