SIRAKE 15
15
1Manga go hagahigasia na Araha,
igo ko katokato vikana.
Manga go marupegi na ramata iana,
igo ko page nahunia na takoha mataha.
2Na takoha mataha ki page râ vurusigo
manga vi ngaia kani kenamu
se na gete go kahu êragia.
3Ngaia ki page hagangêgo renia na aitangisiha
ma ki page hagatunumigo renia na takoha mataha.
4Go kaviria ma hanana i asa vigu tapasu ku votavota.
Go hagêguritogo renia ma hanana i asa vigu maki.
5Ngaia ki page kasigo akê teharira na enoni getera
ma igê na hekarigiana ngaia ki page katogo
ko tamasigi na tamasinga ni takoha mataha.
6Vikana igo ko page vagevage ma ko page obakoro monari
ma ki page rongo raha hagahu na atamu.
7Na enoni ga pe nahuni aitangisiha
ki asa iata vige tarahua
ma na enoni tasi ki asa iata vige bâsia.
8Ngaia ki makimakitenira na enoni paroparo.
Na enoni ni hagaparunga ki asa iata vige takusia.
9Na enoni tasi ki pe araria vige hagarahasia na Araha,
suria na hagarahenga iana ki pe hagakoro obana.
10Na hagahigasiana na Araha ki arâ me nga
tenia na takoha mataha, tenia na Araha,
hanana na Araha ki aganaria.
Na enoni ki tasitasi tanga so ma marena
11Siana ko vivi: “Na Araha kani katoê kê tasi.”
Na Araha ki asa vige hagavoragi na marâ i kitenigi.
12Siana ko vivi: “Ngaia kani hagatasiê!”
Ngaia ki pe obanira na enoni tasi,
hanana i hagahurasigi na katoha iana.
13Na Araha ki kitenia na eraha, henaka vi na ani ta.
Ma na ani ga hagahigasia na Araha
ngaira ka kitenia nogata.
14I nago kerevê noga matena na Araha ki hagavorara na enoni
ngaia ki nakara vê ka paronga tangara so ma mareta.
15Manga go obania, igo ko girara ma
go marupegi na ramata iana na Araha.
Igo ma kanigo atea go tototo suria se mareha.
16Ngaia ki nakarerua i maamu na gi ma na ve.
Igo ma kanigo girara go atea
na ani ta na hitangiterua go obania.
17I maamu karu tâ na mêriha ma na mera.
Na ani go atea ngaia noga.
18Na aitangisiha iana na Araha ki raha teha ngavê.
Na raramohana ki bagararaha
ma ngaia ki bâsigi na ara ni marâ hato.
19Ngaia ki giraragi na ara ni tauhana hato na enoni.
Ngaia ki marupera na ani ga hagahigasia.
20Ngaia ki mareha ngavê vige bonasia ta na enoni
hanana vige bagatauhana.
Ngaia ki mareha ngavê vige hagamarumungenia
ke tasitasi.
Currently Selected:
SIRAKE 15: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific