SIRAKE 14
14
Na ruruguha tanga na ta?
1I babarisi na enoni i hagaotoa tare na gaviharana.
I babarisi na enoni i pe hatamia na tangahuriana,
suria i pe tasi rârâ.
2I babarisi na enoni i matarotaro na aitangihana
ma ki asa vige bagahagêguri.
3Na enoni i hahêaga ki pe araria vige ruruguha.
Na ruruguha ki pe araria na enoni maongo.
4Manga go rurugugi na ruruguha
ma ko hahêaga renigi,
igo ko rurugugi ma tangara na enoni getera.
Ngaigi ki page hagarêsira ka mauri re.
5Manga go hahêaga renigi na ruruguha iamu
ma ko pe pasi vigu vagevagesigi vigu mauri re,
manga i he kanigo girara go mahata tangara na enoni getera?
6Na ani i hahêaga, ki hagamamasiaga so marena ngavê.
Ngekana na eraha iana ki hagaitangia.
7Manga vi ngaia ma ki mahata tanga ta na enoni,
ngaia ki mahata purupuru ma.
Ma i ta na matena na maongoha iana ki page vagavaga me mave.
8Na enoni i maongo ki na enoni era.
Ngaia ki pe botage renira na ani i bara tangara,
9ma ki pe togo na aitangihana renigi na nahuninga iana.
Na hagatageana ki hagaratagania.
10Tani na enoni ka hahêaga ngavê.
Tahema ngaira ka magê.
11Kakare, manga go nahunigi na marâ,
siana ko hahêaga.
Go bâbâsurigo maremu hete renigi
ma ko vogasia maninga na Araha renigi.
12Takusia, i ta na tangiana igo ko page meme
ma igo ko pe girara vi i na keta.
13Matena go tahitahi mênga,
go komanira na tamamu.
Go mamahata ngavê tangara.
14Go katogi na ara ni tangiani
ka na tangiani ni vagevageha tangago.
Go katogi nga na marâ go obanigi,
manga vi pe manimanigi na ramata.
15I ta na tangiana na enoni getera
ka page nahunigi na nahuninga iamu
ma ka page tonganigi na meni na tagaraha iamu.
16Vikana, gu mamahata
ma ku aganarigi na mahatanga iata na enoni getera.
Gu ageagesia na ogaha iamu,
suria i asa vigu tarahua na vagevageha
igê na agua iata na enoni ga bani me.
17Na apena na enoni ki manga na gahu i girara i kakaga.
Na ramata i bani oga me kerevê noga, ki vi:
“Na ara ni enoni hato ka meme.”
18Na enoni ka mangagi na ahani na apinige i araraga.
Tani na ahani ka turituri ma tani ka hisihisi urusigi.
Na apaparaha ninuni ki manga ngekana nikâ.
Tani ka meme ma tani ka voravora me urusira.
19Na ara ni marâ na enoni i tagarahigi
ka page kakaga ma ka page magahuru
ma na ani i tagarahigi ki page magahuru henigi.
Na takoha mataha ki hagavorea na vagevageha
20I babarisi na enoni i barigia na takoha mataha
ma ki gunahia na aitangisiha.
21I babarisi na enoni i takoha igê na aitangihana
renigi na tarani na takoha mataha,
hanana i tarahugi na tarani pinihi iana.
22Go hagavasi tanga na takoha mataha
manga na mane i hagavasi tanga na ganiana.
Gu gamorahia ku harisuria.
23Go kirihi banu igê na mabaha na ruma iana
ma ko kakaringa banu i na apanena hura na maani ruma i purupuru.
24Go taunga ko mebasigu hetanga ko ngahisia.
25Vikana igo ko nahunia na agua
i hagagara koro ni ogaha.
26Go taunga i mamarugani na arani.
Go hagarukunira na karemu igê na mamarugana.
27Ngaia ki mamarusigo tenia na bababana na arito
ma ko mamaro i ruguhana na bâbâhana raha.
Currently Selected:
SIRAKE 14: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific