SIRAKE 13
13
Na tauhamu tangara na enoni ruruguha
1Manga go hataria na puara, ngaia ki puruigo.
Manga go hakunira na enoni paroparo
igo ko page maratorata.
2Siana ko torea na marâ i higa tangago.
Siana ko hakunira na enoni
ga ruruguha ma ka raramohaga teharigo igo.
Siana ko naka na apira na hê ki ngahisia na ani na aiani.
Manga garu hetagitagi,
na ani na hê ki page akamakama.
3Manga na enoni ruruguha ma ki hagamamasiaga ta na enoni,
ngaia ki ageage renia.
Manga vi ngaia ma ki katoa bera na enoni matareha,
ngaia ki tuguria ki tangahuria.
4Na enoni ruruguha ki hagatagarahigo bâraha
tanga ma vigu hagahanea ngaia.
Ma na matena i asa so tangago vigu hagahanea,
ngaia ki asa vige botage renigo.
5Manga ga tongasigo tani na marâ
ngaia ki gâga hagêgurigo
ma ki ageage ki tanumigo.
6Matena i obanigo, ngaia ki hagabekasigo.
Ngaia ki mamanamui tangago ma ki hagakoro obamu.
Ngaia ki hagamemesi ringena tangago, ki vivi:
‘E, ta na marâ vari ko obania?’
7Igê na magotoha iana ngaia ki hagamakigo.
Rârâ, ma na matena i tanumigo ngavê,
ngaia ki page rurusigo.
Ma hemuri matena i bâsigo,
ngaia ki sususu pane tenigo
ma ki karikarige bê renigo.
8Go bâbâ taramu, siana ka hagabekasigo,
i era ma na bekaniha iamu ki hagamakigo.
9Manga na mane i nahuni ramoha ma ki unigo i pasina,
igo ko tamasi kakaviaga tanga
ma ngaia ki megotamasi bâkoro, hanana vigo arâ.
10Siana ko bugurenigo maremu bê râ tanga,
i era ma ki kitenigo.
Siana nikâ ko gâga sikasika tenia,
i era ma ki bâtihigo.
11Siana ko katoa manga vi igo ko maratorana.
Siana ko tongesurigi na ani mavê na marâ i visigi,
suria i uhungigo igê na tamasinga iana
ma igê na mamanamuiha iana tangago.
12Na enoni i nahuni ramoha ki asa vige hetaki.
Ngaia ki girara ma i nahuigo ko meme
se i kasigo igê na ruma ni hagaitangiha.
13Tahema ko bâbâ taramu ma ko tamasi takotako,
suria ngaia ki manga na agua ni perenga.
14Manga go marutea vikana, go riterite.
Igê na ogaha iamu go takuia na Araha
ma ko avarasia ki hagatahigo.
15Na ara ni marâ mamauri hehegitigi
ka hakunira na tamata hehegitigi.
Ma ki tagenana ma nikâ tangara na enoni.
16Na marâ mamauri hehegitigi
ka hakunira na tamata hehegitigi.
Ma na enoni nikâ ka hakunira na ani ga maratorata.
17I hega, na o vasiga ma na karena sipi
karu girara vari garu gâga haku?
Tagenana ma tangara na enoni ga aharê
ma na enoni ga tê viteana God.
18I hega na o vasiga ma na o manata
karu girara vari garu hekomani?
I hega, na enoni ruruguha ma na enoni matareha
karu girara vari garu hekomani?
19Na laione ka gagarihira na tonki vasiga igê na bagamasusu raha.
Na enoni ruruguha ka tanumira na enoni matareha.
20Na enoni paroparo ka kikitenira na ani ga haritagi.
Na enoni ruruguha ka makimakitenira na ani ga matareha.
21Matena na enoni ruruguha ma ki tapasu,
na tamana ka taua, hanana vi siana ki votavota.
Matena na enoni matareha ma ki votavota,
na tamana ka hagaraha maeha renia.
22Matena na enoni ruruguha ma ki atobera,
ka rakorako na ani ga tamania.
Manga i aharê igê na tamasinga iana
ka rakorako na enoni ga totora pusia.
Ma ki manga na enoni matareha
ma ki aharê igê na tamasinga iana,
ngaira ka ramonia ngavê renia.
Henaka ngaia ki tamasi takotako,
ngaira ki asa vige karinga.
23Manga na enoni ruruguha ma ki tamasi,
e, ngaira hato ka munimuni
ma ka kasia akê i vavearo renigi na tamasinga iana.
Manga na enoni matareha ma ki tamasi,
ngaira hato ka visia: “E, baga ti raha ngekana?”
Manga i tapatapasu igê na tamasinga iana,
ngaira ka ama ni hagaraha nga.
24Na ruruguha ki koro,
manga vi pe arâ me tenia na tasi.
Na matareha ki era,
manga i arâ me tenia na paroparoha.
25Ngaia ma na aitangihamu kani katogo
ko bâbâ rikiriki se go bâbâ ruruhi.
26Manga igo ma ko hata rikiriki, igo ko bâbâ rikiriki.
Manga go katogi na maramarêrava,
go takoha raha renigi hagenago.
Currently Selected:
SIRAKE 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific