SIRAKE 12
12
Ti kanigo girara go tamania?
1Manga go korokoro tanga na enoni,
go girara nga vi tanga va ti kanigo koro tanga.
Vikana ngaia ki visigo koro renia na korohamu.
2Go korokoro tanga na enoni i tê viteana God
hanana go page nahunia na memu renia na korohamu.
Manga i mareha vi ngaia
ma ngaia hete kani God raramohaga hunia.
3Na enoni i tamania na enoni era,
ngaia ki asa vige akê me bâkoro,
suria na parongana ki pe koro i maana God.
4Go mahata tangara na enoni ga tê viteana God
ma siana ko tamanira na enoni tasi.
5Go korokoro tangara na ani ga haritagi.
Siana ko vatera ta na marâ na ani ga haritohea God.
Siana ko hagangêra se vigo korokoro tangara,
i era ma ka erasigo renia na korohamu,
suria na eraha i page tarahugo
ki page raha teharigi na ara ni korohamu tangara.
6God raramohaga hunia nikâ ki kitenira na enoni tasi
ma ki page hagaitangira na ani ga pe botage renia.
7Go mahata tangara na enoni koro
ma siana ko tamanira na enoni tasi.
Ti ka na tamamu monari?
8Matena go gâga igê na ramana, ki bara,
vigu girara vi ti ka na tamamu monari.
Ma na matena go pe akê me bâkoro,
igo ko kahu tahetara, vi ti ka na merongamu.
9Matena go gâga igê na ramana,
na merongamu ki komanigo.
Ma na matena go pe akê me bâkoro,
na tamamu koro ki page kasikasi renigo nogana.
10Siana hagetage ko hagêguritogo renia na merongamu,
suria na eraha iana ki vagavaga me mave,
manga na hehegana na aiani.
11Go bâbâ taramu ma ko hinarua,
henaka i bâ manga i haritagi ma ki tubê so tangago.
Vikana igo ko manga na ani i taruhia tare na galasi ni surasura bê
ma ko bani girara vi ngaia ki page guruha ngavê.
12Siana ko naka ki ruata me tangago,
i era ma ki hagavotarigo ma ki urusigo.
Siana ko naka ki ngahisigo,
i era ma ki uhungia vi gâga urusigo igê na atohamu.
Vikana igo ko kahu tahetara, vi na hagaotonga iaku ki monari
ma ko hagahunigo maremu, matena go takusia aporo.
13Ti ki takia na enoni i hagamanatara na ma
ma na ma ka garea,
se na ani i hagarêra hagarangira na marâ vasiga ga garagara?
14I tagenana ma tangago igo,
manga go hakunira na enoni tasi
ma ko têtê henira igê na bagatauhata.
15Na merongamu ki gâga henigo rârâ
mataro me na matena go pe akê me bâkoro
ma ki kahu kasikasi renigo.
16Na gaviharana na merongamu ka mamaki manga na pirui
ma igê na aitangihana ngaia ki katokato renigo,
vi hagavotarigo igê na etu iana.
Henaka i bâ manga i takigo ngavê
matena i rugurugu na obamu,
ma na matena i nahunia na matora
ngaia ki page nahuigo ko meme.
17Manga i tarahugo ta na perenga,
ngaia ki ngahisigo vi tamanigo
ma hete i kato ma vi hagavotarigo.
18Vikana ngaia ki araragebê ma ki hitahita baro
ma ki tamasi ngurunguru renigo ki hagatoraigo.
Na tauhana tangago i ngekê ki totora getea tenia i nago.
Currently Selected:
SIRAKE 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific