SIRAKE 11
11
1Na aitangisiha ki kasia akê na enoni matareha
ki gâga henira na ani ga nahuni ramoha.
2Siana ko kasia akê na enoni renia na bâkorohana
ma siana ko ruhia na enoni, suria vi pe bâkoro.
3I berarogata na marâ ga gagaha na pirui ki sisite ngavê
ma na robona ki mamaki teharigi na ani mavê na marâ.
4Siana ko hagarahasigo maremu suria ma vigo tuguni bâkoro.
Siana ko paroparo, matena na enoni ka hagahigasigo,
suria na tagaraha iana na Araha ka bâkoro ngavê,
henaka ga pinihi tenira na enoni.
5Rako na maneraha ka vota ka oga i ano,
matena na mane tokora ka urusira ka maneraha.
6Ga hagamakira rako na enoni ga nahuni ramoha.
Rako na enoni raha ka vota i rimata na enoni getera.
7Go garia maninga na marâ ma ko kahu gegege.
Go takotako hagenago ma ko kahu ramonia na enoni.
8Siana ko totora vora, matena i tamasi na enoni.
Go karinga ma ko kahu aramia.
9Siana ko mehetuguri na enoni
igê na tarana i pe tuguhigo igo.
Siana ko têtê henira na enoni tasi
igê na hekarigiana iata.
Renirerua na ruruguha ma na matarehana
10Kakare, siana ko tangatanga hepe renigi rako na marâ.
Manga go katokato vikana, na mamasiaganiha ki page tarahugo.
Na tarana go gunahia ki asa vigu tarahua. Na tarana vigo gavatenia ki tâ nga tangago.
11Bâ, tani na enoni ka rêrê igê na tagaraha raha.
Henaka, ma ngaira ka ama ni guruguru bê aporo nga
igê na tagaraha iata.
12Tani ka pe manisingenigi na tagaraha iata.
Ngaira ka matareha bâraha ma ka pe ramoramo ni tagara vari.
Ngaira ka obania na hetamaniha.
Na Araha ki obakoro renira ma ki hagamahara
tenigi na higata ga higa bogobogora.
13Ngaia ki katora ka akê me bâkoro
ma na enoni hato ka konetenira ngavê.
14Na ara ni marâ hato ka râ me tenia na Araha,
na marâ ga koro ma na mamasiaganiha
na matareha ma na ruruguha, na mêriha ma na mera,
15na takoha mataha, na aitangisiha, na giraraha renigi na ramata,
na hetakuiha ma na hekomaniha,
ngaigi hato ka râ me tenia na Araha.
16Haganega tenia na haganegahana
na enoni tasi ka tê tasi ma ka oga igê na roto
ma na ani ga ageagesigi na eraha,
na eraha ki aharêsira tare, henaka ga gemêa.
17Na mahatanga iana na Araha ki gâga hagahu
tangara na enoni ga tê viteana,
ma na korohana ki katora ka akê me maninga tare.
18Ta na enoni ki ruruguha, suria i tagara raha,
ki hagatage marâ ma ki hahêaga.
Ma na ta ki vora?
19Rârâ, ma ngaia ki tako ki vi: ‘Hoita, ma na ta nikâ?
Be oga ahaha so ma igê na nahuninga iaku.’
Ma ngaia ki pe girara na matena vi page meme igê
ma na enoni getera ka page nahunigi na nahuninga iana.
20Go katoa nga na tagaraha iamu ma ko tâtâ nga igê.
Go memerahaga na tagaraha iamu.
21Siana ko hengarira na enoni ga aharê,
suria viga akê me bâkoro igê na ogaha iata.
Go tâtâ nga igê na tagaraha iamu maremu
ma ko hagêguritogo renia na Araha,
suria i mataku ma tanga na Araha,
vi katoa na enoni matareha ki gasuga ni ruruguha.
22Na Araha ki koro tangara na enoni ga toto suria
ma ki pe asa tangara,
vi ngaira ke gasuga ni akê me bâkoro.
23Siana ko vi: ‘Na ta kanigê obania?
Gi hita me nikâ kani arariê vigê rurugi akê nikâ?’
24Siana ko vivi nikâ: ‘Na nahuninga iaku ka raha, ka uhu noga!
Inê be oga barebare hete.’
25Matena ga tavoraha bâkoro na marâ,
na enoni ka bonotenigi na tarani ga pe tavoraha bâkoro.
Ma na matena ga pe tavoraha bâkoro na marâ,
ngaira ka bonotenigi na marâ ga tavoraha bâkoro.
26Na Araha ki mataku ma tanga
vi vuria na enoni ararigi na tauhana
matena i meme.
27Matena i meme, na tauhana ka huhura mave.
Na matena abubu ni mamasiaganiha ngekana
ki girara i hagamagahurugi na vagevageha hato iana.
28Siana ko visia ta na enoni vi babarisi
matena i tahitahi mênga,
suria na matena ma i meme
igo ko kahu girara erasia ngavê.
Ti kanigo unia banu i pasimu?
29Siana ko unia banu i pasimu na ani mavê na enoni,
suria na enoni i katokato
ngaia ki girara i hagabekasigo.
30Na aitangihana na enoni paroparo
ki manga na marâ ni hagamu.
Ngaia ki gamorahigo manga na mane i ahiahi karigo.
31Na marâ ga koro ngaia ki horogi ka era.
Ngaia ki horogi na tauhamu ka bagatauhamu.
32Na kere ririki ki girara i voravora re na bagagi raha.
Na enoni tasi ki gâga ma tanga i gâga sutaga.
33Go hinarura na enoni vigana,
suria ngaira ka rapasigo,
i era ma ka hagaerasigo ki rongo era tare na atamu.
34Manga go unia banu i pasimu na enoni i pe koro,
ngaia ki page haganega na eraha tangago
ma i berarogami igo ma na ahemata iamu.
Currently Selected:
SIRAKE 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific