ROMA 9
9
God ma na Siu
1Na marâ, gê visia, ki monari. Inê kê tohe renia o Kirisito, i asa, ve hagaparu. Na Higona Apu ki angaria na aitangihaku, ma na aitangihaku ki vi nikâ, vi inê kê pe hagaparu. 2I rugu bâraha na obaku, ma kê hatamigi bâraha na mamasiaganiha renira na kariaku na Siu, na ahariaku. 3Inê kê takuira bâraha na gaoku, ma ki manga i pe asa, i araria ma, vi God ke hagaitangiê ma ke kasiê hura tenia o Kirisito, manga vi na tarana ngekê ma ke girara i tamanira. 4Ngaira ka na enoni, God i bani atera. Ngaia ki katora, ka vora re na karena, ma ki hagabângenia na arahanga iana tangara. Ngaia ki nagaki na suruheri henira, ma ki vatera na Ramata iana o Moise. Ngaira ka rahesia God igê na tarana, God i obania. Ngaira ka nahunigi na suruha iana God. 5Ngaira ka na raraha iata na maneraha, na êvarita i nago. Ma na apanena igê na enoni o Kirisito ki vora me tenia na raraha iata. Na enoni hato ki tuguhira viga visia raha tare ma tarema God, i marungira hato.
6Inê kê pe vi, vi na suruha iana God ki baguru, renia i mareha vi ngaira hato na Isiraelita ke vora re na kariana God. 7Ma nikâ, i mareha vi na raraha hato iana o Abaramo, vi ge vora re na karena God, renia God ki vi tanga o Abaramo, ki vi, “Ngaira ma na raraha iana o Isako ka na karemu, gê bani surura tangago.” 8I vi, vi mareha vi na ara ni karena o Abaramo, kanige vora re na karena God. Ngaira ma na karena, ga vora suria na suruha iana God, ka na raraha monari iana o Abaramo. 9Renia na matena God ki suru igê, ngaia ki tamasi vikê, ki vi, “Na matena vikê inê kê page aporo me igê, ma ka Sara ki bani apara na kare mane.”
10Ma ta na marâ nikâ. Ka Rebeka ki nahunirerua o karena gi rua, ma o vaematerua gi tage ma, na êvarika o Isako. 11Matena garu mamênga, vi garu voravora me, ma karu mamênga, vi garu katoa ta na marâ koro se ta na marâ era, God ki vi tanga ka Rebeka, ki vi, “Na ani, i page voravora me i muri, ki page araha tanga na ani, i page voravora me i nago.” 12Igê na tarana ngekana God ki hagabângenia igê, vi ngaia getea ma kani atea, ma na ateha ngekê ki pe râ surigi na marâ, ga katogi na enoni. Ngaia ki atea hete na ani gi tage ma, ma tani ki mareha. 13Suria na Buka Apuna ki vi,
“Inê kê atea o Jakobo,
ma kê naka vê o Esau.”
14Ma ki hega, igia ka vi vari, vi na ateha iana God ki pe oto? Mareha vê! 15Renia ngaia ki vi tanga o Moise, ki vi,
“Inê be takuia na ani mavê na enoni,
gê obania, vi gê takuia;
ma be korokoro tanga na ani mavê na enoni,
gê obania, vi gê korokoro tanga.”
16Tahema God ki atea na enoni, mareha vi suria ngaia na enoni ki obania se vi i tanugi tani na marâ, ma ki atea suria ma hete i obania, vi hagabângenia na takuiha iana. 17Renia igê na Buka Apuna God ki tamasi tanga o Parao, ki vi, “Inê kê katogo, ko araha, hanana gê hagabângenia igê na raramohaku renia na parongamu, ma hanana na enoni hato i maveta ka rongoa na tarohaku.” 18Vikê God ki takuia na ani mavê na enoni, i obania, vi takuia, ma ki hagagugurugania na ani mavê na enoni, i obania, vi hagagugurugania.
Na mangariaganiha ma na takuiha iana God
19Vari ta na hitangimi ki page vi, “Manga vi God, ma ki katoa vikana, manga i he kani girara vi mangariaga tanga na enoni? Renia va ti kani girara i usisitenia na marâ, God i obania?” 20E, goaku, go vi go vi o bagatiraha kani go, go tamasi bê aporo tanga God! Na pi na hê ki asa, vi ge hagatea na mane, i tagarahia, ke vi, “Hega kanigo tagarahiê vikê?” 21Bâ, na mane i tagarahigi na pi, ki girara, i tagarahia na mako renia na ani mavê na marâ, i obania. Ngaia ki girara i tagarahirerua na pi na hê gi rua tenia na ani gi tage na heni na mako: tani ki bâkoro ma ki raha na mena, ma tani ki ata ni bâ ma, ma ki sisite na mena.
22God nogana ki tagara igê na tarana i manga ngekana nikâ. Ngaia ki obania, vi hagabângenia na mangariaganiha iana ma na raramohana. Tahema ngaia ki piringiape bâraha, ma ki hagatogo surira na enoni, i araria, vi hagaitangira, na enoni, God i nanê vi hagaerasira ngavê. 23Tahema ngaia ki hagabângenia na arahanga raha iana, i megiatongani, igia na enoni, i takuigia ma ki bani hagarêgia, hanana vi ga nahunia na arahanga henia. 24Renia igia nga nga na enoni, i bani ategia, mareha vi tenira ma na Siu, ma tenira nikâ hete na enoni, ga pe Siu. 25Renia igê na Buka iana o Hosea God ki vi vikê:
“Na enoni, ga mareha vi na kariaku,
inê kê page visira vi na kariaku.
Na enoni, inê kê pe takuira,
inê kê page takuira ngavê.
26Ma igê na agua nga gê vi tangara,
renia kani gê vi,
‘Igamu ki mareha vi na kariaku’,
i ngekana inê kê page visira
vi na karena God mamauri.”
27Mo Isaia ki tamasi raha renira na Isiraelita, ki vi: “Naka ma na Isiraelita ka rako manga na one, ma ta na kere hitangita ma kaniga page tahi; 28renia na Araha ki asa, ge hagarihu, vi ge surira hagetage na enoni hato i maveta.” 29I tagenana ma manga o Isaia i bani visia i nago, ki vi, “Manga na Araha raramohaga hunia, ma ki pe nakara vê tani na raraha iaka, igia ka bani mangara na Ai ni Sotomo ma na Ai ni Gomora.”
Na nunginungiha iana o Paulo tangara na Isiraelita
30Hoi, na ta ka takusia renia? I manga ikê: na enoni, ga pe Siu, ka pe uhungia mareta, hanana vi ge koro ma ke oto i maana God, ma God ki katora, ka koro ma ka oto i maana, suria ga tongesuria. 31Ma na Isiraelita ka garia ta na ramata, i girara i katora, ka korokoro ma ka ototo i maana God, ma ka pe tarahua. 32Tanu hega kaniga pe tarahua? Suria ngaira ka pe hagêguria na tongesuriha, ma ka hagêgurigi ma na tagaraha iata mareta. Ngaira ka tapasu igê “na hê, i tâ hepusi”. 33Na Buka Apuna ki tamasi renia na hê ngekana, ki vi:
“Bâ, inê kê naka i Sione na hê,
i page hagavotarira na enoni,
na hê, ga page tapasu igê ma ka votavota.
Ma na enoni, i tongesuria,
ngaia ki asa, vi ge raroni era renia.”
Currently Selected:
ROMA 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
