ROMA 8

Ga mauri igê na raramohana na Higona Apu

1I ngekê God ki pe surira ki hagaitangira na enoni, ga obahaku henia o Kirisito Jesu. 2Renia na tarana na Higona Apu ki bani rupasiê igê tenigi na tarani na tasi ma na mera. Ma na tarana na Higona Apu ki vategia igê na morana na mêriha, suria igia ka obahaku henia o Kirisito Jesu. 3Na marâ, na Ramata iana o Moise i asa, vi ge katoa, suria na enoni ga pe ramo, God ki bani katoa. Ngaia ki kitenia nga vê na tasi igê na ogaha iata na enoni. Tahema ngaia ki hagatorangenia me o Karena nga, ki vora enoni i pasita na enoni tasi, hanana i hagamagahurua na tasi. 4God ki kato vikana, hanana vi igia ka marupegi bâkoro na ara ni marâ hato, na Ramata iana o Moise ga visigi, vi ga oto. Renia igia ka mauri suria na tarana na Higona Apu, mareha vi suria na tarana na ogaha iata na enoni. 5Manga na enoni, ma ka mauri suria na tarana na ogaha iata na enoni, na ogaha iata na enoni ki marungigi na aitangihata. Manga na enoni, ma ka mauri suria na tarana na Higona Apu, na tarana na Higona Apu ki marungigi na aitangihata. 6Manga na tarana na ogaha iata na enoni, ma ki marungigi na aitangihami, na mena ka na mera. Manga na tarana na Higona Apu, ma ki marungigi na aitangihami, na mena ki na mauriha mora ma na marapeha. 7Ma ngekana, manga na enoni, ma na tarana na ogaha iata na enoni, ma ki marungia na aitangihana, ngaia ki voravora re na merongana God, renia ngaia ki pe marupea na ramata iana God, ma ki asa iana, vi ge marupea. 8Na enoni, ga râ suria na tarana na ogaha iata na enoni, ngaira ki asa, vi ge hagakoro obana God.

9Ma igamu kamu pe râ suria na tarana na ogaha iata na enoni. Igamu kamu râ suria hete na tarana na Higona Apu. I monari, na Higona Apu iana God ki angarigamu. Manga na Higona Apu iana o Kirisito, ma ki pe angarigamu, igamu kamu mareha vi na kariana o Kirisito. 10Ma ki manga o Kirisito, ma ki angarigamu, henaka na apemi ka meme renia na tasi, ma na Higona Apu ki vategamu hete na mêriha mora, renia God ki bani katogamu, kamu koro ma kamu oto i maana. 11Manga na Higona Apu iana God, i hagamêria aporo o Jesu tenia na mera, ma ki angarigamu, God, i bani hagamêria aporo o Kirisito tenia na mera, ngaia ki page hagamêrigi nogani na apemi, ga page meme. Ngaia ki katokato vikana, renia na Higona Apu iana ki angarigamu.

12Hoita, goaku igê na tongesuriha, ta na marâ ki tuguhigia, ma siana ka mauri suria na tarana na ogaha iaka, igia na enoni. 13Manga igamu ma kamu arâ suria na tarana na ogaha iami na enoni, igamu kamu page meme. Ma ki manga mu nahuigi na tauhami era renia na raramohana na Higona Apu, igamu kamu page mauri. 14Manga na Higona Apu iana God, ma ki marungigamu, igamu kamu voravora re na karena God. 15Renia na Higona Apu, God i bani vategamu, ki pe katogamu, kamu vora renira vi na kare vurivuri, ma ki pe haganumanumagamu. Mareha. Na Higona Apu ki katogamu, kamu vora re na karena God, ma igê na raramohana na Higona Apu na ara ni hitangika ki vagevagesia God, ki vivi, “Mama! Vaemaku!” 16Na Higona Apu iana God ma na aitangihaka karu tage vi, vi igia ka na karena God. 17Suria igia ka na karena God, igia ka page nahunigi na marâ koro, i nakagi râ tangara na kariana, ma nikâ igia henia o Kirisito ka page nahunia na marâ, God i naka râ tanga o Kirisito. Renia manga vi igia, ma ka hatamia na mamasiaganiha manga o Kirisito, igia ka page nahunia na arahanga henia nikâ.

Na arahanga i muri me

18Inê kê girara, na mamasiaganiha i na matena i ngekê ki na marâ purua ma, manga ga takusia na arahanga, God i page vategia me, igia ka page vagevage renia. 19Na ara ni marâ hato, God i bani hagavorara, ka naasia bâraha ngavê na matena, God i page hagagirarara igê renira na karena. 20God ki hagaitangira na ara ni marâ hato, tahema ga pe tonga na hunani, mareha suria vi na ara ni marâ ka obania, ma suria hete God ki obania vikana. Henaka i manga ngekana na nanasiha togo ki oga nga tangara. 21Ngaia ki manga ikê: ta na tangiana God ki page rupasira na ara ni marâ hato tenia na raramohana na kakaganiha, hanana ga page nahunia henira na karena God na mêriha mora ma na arahanga. 22Suria igia ka girara, vi na ara ni marâ hato ka gegege manga na gete i riki na gerina, haganega tenia i nago mataro me i ngekê. 23Mareha vi ngaira getera ma, ma na ara ni marâ hato ka gegege, ma igia nikâ ka gegege. Na Higona Apu ki angarigia. Ngaia ki na nagona na votovoto iana God tangagia. Igia ka gegege igê na aitangihaka, ka naasia God, vi page katogia, ka voravora re na karena, ma ki page rupasia na kakaganiha tenia na ogaha iaka hagenani. 24Renia igia ka bani tahi, suria igia ka nanasi togo. Ma ki manga igia, ma ka rigia na marâ, ga naasia, igia ki hato, vi ge page naasia nikâ. Renia o ti ki girara i naasia na marâ, i bâsia? 25Ma ki manga igia, ma ka naasia na marâ, ga pe bâsia, igia ka naasia, ma ki koro, viga ramoramo ka piringiape.

26I tagenana ma na Higona Apu. Ngaia nikâ ki râ me ki tamanigia, suria igia ka memega. Renia igia ka pe girara, vi i manga i he kani ararigia, vi ga nunginungi. Ngaia nga na Higona Apu kani nunungia God tangagia igê na gegeha, ga pe ararigia igia, vi ge visigi. 27Ma God, i giraragi na aitangihata na enoni, ngaia ki girara na takotako iana na Higona Apu; renia na Higona Apu ki nungia God urusira na kariana God, ma igê na tarana, God i obania.

28Renia igia ka girara, vi God ki katora na ara ni marâ, ka tagara tanga na ogaha koro tangara na enoni, ga takuia, ma tangara na enoni i bani atera suria na katoha iana. 29God ki bani nakara râ nikâ na enoni, i bani atera, hanana ga voravora manga o Karena, hanana o Karena ki na bêbê ni kare tarata rako na esina. 30Tahema God ki atera na enoni, i bani nakara râ; mareha vi suria ngaia ki atera, ma suria nikâ hete ngaia ki katora, ka koro ma ka oto i maana; mareha vi suria ngaia ki katora, ka koro ma ka oto i maana, ma suria nikâ hete ngaia ki hagamarumungenira, ka nahunia na arahanga henia.

God ki takuigia tare

31Hoita, i hega? Manga vi God, ma ki tamanigia, o ti ki girara i page teharigia? Mareha vê! 32God ki pe manimania o Karena tenia na mamasiaganiha. Ma ngaia ki tagarenia, hanana i hagatahigia. Ngaia ki vategia o Karena. I hega, ngaia ki pe mahata vari tangagia renigi na ara ni marâ? 33O ti kani girara i visira na kariana God, vi ga pe koro? God marena ki visira, vi ga koro! 34Manga ngekê, o ti kani girara i visira, vi ga pe koro? Mareha vê! Ngaia nga o Kirisito Jesu i me, se God hete i hagamêria aporo. Ma ngaia ki nahunia na arahanga henia God. Ngaia ki nungia God tangagia. 35O ti kani girara i toregia râ tenia o Kirisito, i takuigia? Na bagabevoana vari, se na mamasiaganiha vari, na merongasiha vari, se na magêha vari, se na matareha vari, se na perenga vari, se na mera vari? 36Suria na Buka Apuna ki vi,

“Suria mi takusigamu,

tahema igami kami haga ni meme nga tare

i na ara ni tangiani.

Na enoni ka katogami

mangara na sipi ga sugi nanahuira.”

37Mareha. Igê na ara ni marâ ngegana igia ka teha, suria o Kirisito ki takuigia. 38Inê kê girara maninga, i mareha vê vi ta na marâ, ge girara, vi ge toregia râ tenia na takuiha iana: mareha vi na mera, mareha vi na mêriha, mareha vi na angelo, se vi na raramohata na ataro getera; mareha vi na matena i ngekê, se vi na matena i muri me; 39mareha vi na marâ i vavearo, se vi na marâ i ruguhana na maveta. I mareha vê vi na hitangita na ara ni marâ hato, ga oga, vi ge girara, ge toregia vê tenia God, i takuigia renia o Kirisito Jesu na Araha iaka.

Currently Selected:

ROMA 8: KCB

Highlight

Copy

Compare