ROMA 10
10
1Goaku igê na tongesuriha, igê na aitangihaku hagenani inê kê tangasia bâraha, vi na Siu, na ahariaku mareku, ke tahi. Inê kê nungia nga God tangara. 2Renia inê kê girara, gê visia tangagamu, vi ngaira ka na enoni, ga obania bâraha, vi ga hagakoro obana God. Ma na morana na tarana, hanana vi ge hagakoro obana igê God, ngaira ka pe girara. 3Suria ngaira ka pe girara na tarana, God i râ suria, matena i katora na enoni, ka koro ma ka oto i maana. Ma ngaira ka uhungia mareta. Tahema ngaira ka pe râ suria na tarana, God i râ suria, matena i katora na enoni, ka koro ma ka oto i maana. 4Renia o Kirisito ki bani hatungigi na raramohana na Ramata iana o Moise. Tahema God ki katora na enoni, ga tongesuri, ka koro ma ka oto i maana.
Na tahinga ki tangara na enoni hato
5O Moise ki segea na marâ ngekê renira na enoni, God i katora, ka koro ma ka oto i maana, renia ga marupegi na Ramata i na Buka Apuna. Ngaia ki vi: “Manga na enoni, ma ki tanugi na marâ, na Ramata ga visigi igê na Buka Apuna, na Ramata ka hagamêria.” 6Ma na Buka Apuna ki visia na marâ ngekana renira na enoni, God i katora, ka koro ma ka oto i maana, renia ga tongesuria. I manga ikê: “Siana kamu hagategamu so maremi i obami, vi, o ti kani page akê i pasina God?” (I vi, vi hanana i meso me o Kirisito.) 7“Ma nikâ siana kamu vivi, o ti kani page so me i pasita na enoni, ga me?” (I vi, vi hanana i meakê o Kirisito tenira na enoni, ga me.) 8Na marâ, na Buka Apuna i visia, ki manga ikê: “Na taroha iana God ki hagarangigamu, ki gâga i harami ma igê na aitangihami.” Na taroha ngekê ngaia ki na taroha na tongesuriha, igia ga tarohenia. 9Manga mu tarohenia i harami, vi, “O Jesu ki na Araha,” ma kamu tongesuria, vi God ki hagamêria tenira na enoni, ga me, igamu kamu page tahi. 10Suria igia ka tongesuri igê na aitangihaka, God ki katogia, ka korokoro ma ka ototo i maana. Igaia ka tarohenia na tongesuriha iaka, tahema igia ka tahi. 11Renia na Buka Apuna ki vi,
“Na ani mavê na enoni i tongesuria,
ki asa, vi ge raruni era renia.”
12Ngaia ki vi, vi na ani mavê na enoni, renia i tagenana ma tangara na Siu ma na enoni, ga pe Siu. Na Araha gi tage togo ma ki tangara na enoni hato, ma ki korokoro nga vê tangara na enoni hato, ga avarasia. 13Renia na Buka Apuna ki vi,
“Na ara ni enoni,
i avarasia na Araha,
ki page tahi.”
14Manga vi ngaira, ma ka pe tongesuria, manga i he kaniga girara, vi ga avarasia? Ma ki manga vi ngaira, ma ka pe rongoa na taroha, manga i he kaniga girara, vi ga tongesuria? Ma ki manga vi ngaira, ma ka pe tarohenia na taroha tangara, manga i he kaniga girara, vi ga rongoa? 15Ma ki manga ga pe hagatorangenira na enoni tanga ge tarohenia, ki asa, vi ge oga na enoni tanga ge tarohenia. Renia na Buka Apuna ki vi,
“I koro era, ka râ me na enoni,
ga torea me na taroha koro!” 16Ma tani ma kaniga têa na Taroha Koro. O Isaia, na poropete, ki bani visia, ki vi:
“Araha, ti kani tongesurigami,
matena mi tarohenigo?” 17Hoita, na enoni ka tongesuria o Kirisito, suria ga rongoa na taroha, ma na taroha ki râ me tangara, suria ta na enoni ki tarohenia o Kirisito.
18Ma be hagate: I monari, vi ngaira ka pe rongoa na taroha? Mareha! Ngaira ka rongoa, suria na Buka Apuna ki vi:
“Na enoni hato i maveta
ka bani rongora ga tarohenia.
Ma na tarohata
ki bani tarahua na maveta hagenani.”
19Ma be hagate nikâ: I hega, na Isiraelita ka pe rongogirara vari? Mareha. Ngaira ka rongogirara. Suria o Moise ki hagenago ki aramia na hagatenga, urusia God, ki vi:
“Inê kê page katora na kariaku,
ka hengarira na enoni, ga pe Siu,
ma kê page katora na kariaku,
ka mangariaga tangara na enoni,
ga tako purupuru.”
20Mo Isaia ki tamasi urusia God, ma ki pe magu, vi ge tamasi, ke vi:
“Na enoni, ga pe gariê, ka tarahuê.
Inê kê hagabângeniê mareku tangara na enoni,
ga pe hagate reniê.”
21Ma renira na Isiraelita God ki tamasi, ki vi:
“Tare, ma i na ara ni tangiana
inê kê karuhira na enoni, ga guguruga,
ma ngaira ka hagau.”
Currently Selected:
ROMA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
