ROMA 7

Takusia igê na êragiha

1Goaku igê na tongesuriha, na marâ, vi gê visia, igamu kamu girara mu rongorongo hagagara, suria igamu hato kamu girara renia na ramata. Na ramata ki marungia ma na enoni, matena i mauri mênga. 2Ata ni vi ma: suria na ramata ki tuguhia na gete êragi, vi gâga henia na mane iana, matena i mauri mênga. Ma ki manga na mane iana, ma ki me, ngaia ki hato, vi ge gâga i ruguhana na ramata, i tuguhia, vi gâga henia o vani iana. 3Tahema manga vi ngaia, ma ki gâga henia na mane getea, matena o vani iana ki mauri mênga, ngaia ki gamogamo. Ma ki manga vi o vani iana, ma ki me, ngaia ki asitatara suria na ramata, ma ngaia ki pe gamogamo, manga vi auragia na mane getea. 4I manga ngekana nikâ tangagamu, goaku igê na tongesuriha. Renia mu obahaku henia o Kirisito igê na mera iana, igamu kamu bani me tenigi na Ramata iana o Moise. Ma i ngekê o Kirisito ki nahunigamu. God ki hagamêria aporo tenia na mera, hanana igia ka tagara koro tanga God. 5Renia na matena igia ka râ suri barisuka mênga, na Ramata iana o Moise ka hagaramonigi na teniha era, ka tagara i obaka, ma igia ka tagara ma tanga na mera. 6Hoi, i ngekê igia ka aharupa tenigi na Ramata iana o Moise, suria igia ka bani me tenigi na marâ, ga bani rakugia me i nago. Na bani tarani na Ramata igê na Buka Apuna ka bani hato, vi ge marungigia nikâ, ma igia ka tagara tanga God igê na tarana haoru iana na Higona Apu.

Na Ramata ma na tasi

7I hega? I koro ma vari, viga visia, vi na Ramata i na Buka Apuna ka na marâ era? Mareha ve! Na Ramata igê na Buka Apuna ka hagagirarê renigi na ta ka pe koro. Ke bani ma na Ramata igê na Buka Apuna i vi, “Siana ko tenia na marâ iana na enoni getea,” vikê inê ki asa iaku, vi ve girara na teniha ngekana. 8Ma renia na ramata ngekana na tasi ki nahunia na teha, hanana i hagatagarahigi na ani mavê na teniha era igê na aitangihaku. Manga vi ge mareha na ramata, na tasi ke vora vi na marâ purua ma. 9I nago inê mareku kê mêri, matena i mamênga na ramata. Ma na matena i râ me na ramata, na tasi ki ramo, 10ma inê kê me renia. Ma na ramata, hanana vi ge torea me na mêriha tangê inê, ngaia ki torea ma me na mera tangê. 11Suria na tasi ki hagatagarahia na ramata, ngaia ki nahunia na teha, hanana i hagahagaparuê, renia na ramata na tasi ki nahuiê.

12Na Ramata iana o Moise ka apuna, ma na ara ni ramata ki apuna ki oto ma ki koro. 13I vi vari, vi na marâ koro ki hagamesiê? Mareha vê! Ngaia nga na tasi kani hagatagarahia na marâ koro ma ki hagamesiê, hanana na enoni ka girara bâkoro, vi na tasi ki manga i he. Manga ngekê na ramata ki hagabângenia, vi na tasi ki era ngavê.

Na hearihatana i na aitangihana na enoni

14Igia ka girara, vi na Ramata i na Buka Apuna ka râ me tenia God. Ma inê, ki na enoni, ma kê pe ramoramo. Inê kê manga na kare vurivuri iana na tasi. 15Inê kê pe rongogirara maninga, vi na ta kanigê tanua, renia inê kê pe katoa na tarana gê obania, vi gê tanua, ma kê katoa ma na tarana gê usitenia. 16Ma suria inê kê katoa na marâ, gê usitenia, i ngekê ki hagabângenia, vi inê kê vi, vi na Ramata i na Buka Apuna ka oto. 17Tahema ki mareha vi inê monari kani ve katoa na tarana ngekê, ma na raramohana hete na tasi kani oga igê na aitangihaku. 18Inê kê girara, na raramohana na koroha ki pe oga igê na aitangihaku, suria inê ki na enoni ma kê pe ramoramo. I monari, henaka inê kê obania, vi ve katoa na marâ koro, ma ki bara ve katoa. 19Inê kê pe tanua na marâ koro, gê obania, vi gê katoa hete. Ma kê katoa ma na marâ era, gê pe obania, vi ve katoa. 20Manga gê tanua na marâ, gê pe obania, vi ve tanua, inê kê hagabângenia, vi mareha vi inê kani vigê katoa na marâ ngekana, ma na raramohana hete na tasi kani oga igê na aitangihaku.

21Manga ngekana inê kê bani girara, vi na tarana manga ngekê ki tarahuê: matena gê obania, vi gê tanua hete na marâ, i koro, ma kani gê atea ma na marâ, i era. 22Na obaku ki vagevage renia na ramata iana God. 23Ma ki manga gê bâsia na tauhaku, inê kê tarahua na tarana, i tora getea. Na tarana ngekê ki meheariha na tarana, na obaku i obania, ma ki rakuê tanga na raramohana na tarana na tasi, i tagara igê na tauhaku. 24Uê, i asa ve vagevage! O ti ki page hagatahiê tenia na ogaha ngekê, i hagaerasiê nga ve? 25Ga visia koro God, i hagatahiê renia na Araha iaka o Jesu Kirisito.

Hoi, na ogaha iaku ki tê ruarua manga ikê: inê mareku kê girara, vi gê marupea na ramata iana God igê na obaku ma, ma igê na tauhaku inê kê marupea ma na tarana na tasi.

Currently Selected:

ROMA 7: KCB

Highlight

Copy

Compare