ROMA 6

Igia ka nahunia na morana na mauriha renia o Kirisito

1Hoita, na ta ka visia? Ga visia vari, vi tuguhigia, vi ga ama ni tasitasi nga, hanana vi na korohana God ki ama ni raharaha nga? 2Mareha ngavê! Igia ka bani me tenia na tasi. Tahema i manga i he igia kani viga girara, vi igia ka ama ni tasitasi nga? 3Renia igamu kamu bani girara bâkoro na tarana ikê: matena igia ka batesimo, igia ka haku henia o Kirisito Jesu; matena igia ka batesimo, igia ka haku henia igê na mera iana. 4Matena ga batesimo, igia ka me henia ngaia ma ka nakagia mareka henia, hanana igia nogaka ka nahunia na mêriha haoru, tagenana manga God Vaemana i hagamêria aporo o Kirisito tenia na mera renia na ramohana raha hunia.

5Suria manga vi igia, ma ka haku henia o Kirisito, suria vi igia ka me manga ngaia, ki tagenana ma, igia ka page haku henia, suria God ki page hagamêrigia, manga i bani hagamêria ngaia. 6Ma renia igia ka bani girara na tarana ikê: na bani parongaka ka bani hagamesia henia o Kirisito igê na kuruse iana, hanana God ki hagamesia na raramohana na teniha era i obaka, hanana na tasi ki hatohato, vi ge marungigia. 7Renia na matena na enoni ki meme, ngaia ki aharupa tenia na raramohana na tasi. 8Igia ka bani me henia o Kirisito. Tahema igia ka tongesuria, vi igia ka page mauri aporo henia nogaka. 9Renia igia ka girara, vi God ki bani hagamêria o Kirisito tenia na mera, ma ki asa hagetage, vi ge page me aporo nikâ, ma na mera ki hato hagetage, vi ge marungia. 10Vikana suria ngaia ki me, na raramohana na tasi ki hato hagetage, vi ge marungia. Ma i ngekê ngaia ki oga igê na mêriha, i obahaku henia God. 11I tagenana ma tangagamu igamu: i koro, kamu takusigamu maremi, manga vi mu bani me tenia na tasi, ma kamu mêri tanga God, renia mu obahaku henia o Kirisito Jesu.

12Siana kamu hagamarumungenia na tasi ki marungigi mênga na ogaha iami, na ogaha ga page hato, hanana vi gamu arâ surigi na teniha era i obami. 13Siana kamu hagamarumungenia na tasi, ki marungigamu, hanana vi hagatasigamu. Ma kamu tagarenigamu maremi ma hete tanga God, suria God ki bani hagamêrigamu tenia na mera, ma kamu tagarenigi na mêrihami hagenani tanga God, hanana i katogamu, kamu tanugi na marâ, ga koro ma ka oto i maana. 14Renia i pe koro, ki marungigamu na tasi, renia igamu kamu pe oga i ruguhana na ramata, ma kamu oga ma i ruguhana na korohana God.

I tuguhigia ga tanugi na marâ ga koro ma ka oto

15Ma ki hega? I koro ma vari, vi ga tasitasi, suria vi igia ka pe oga i ruguhana na ramata, ma ka oga ma i ruguhana na korohana God? Mareha ngavê! 16Renia igamu kamu bani girara bâkoro na tarana ikê: manga mu tagarenigamu maremi tanga ta na enoni manga na kare vurivuri iana, igamu kamu voravora re na kare vurivuri iana, ma ki tuguhigamu, vigamu têtê viteana. Se mu têtê viteana na tasi, hanana vi tarahugamu na mera. Se mu têtê viteana God, hanana vi God ki katogamu, kamu koro ma kamu oto i maana. 17I tuguhigia, viga visia koro God, renia igamu kamu bani hato tenia na kare vurivuri iana na tasi. Ma i ngekê i mêrihami hagenani igamu kamu râ surigi na morani na tamasinga igê na hagesuringa, ga bani hagatarêngenia tangagamu. 18God ki bani rupasigamu tenia na raramohana na tasi, ma kamu bani vora re na kare vurivuri iana God, hanana vigamu tanugi na marâ, ga koro ma ka oto i maana. 19Inê kê tamasi igê na tamasinga, i mataku tangara na enoni, hanana vigamu rongorongo hagagara. Manga i mareha, igamu ki asa, vi gamu rongohagagara. I nago igamu kamu tagarenigamu maremi hagenani manga na kare vurivuri, hanana vi gamu paronga iera ma kamu tê tanu era, hanana vi gamu tanugi na ani mavê na marâ, ga era. I tagenana ma, i tuguhigamu i ngekê, vigamu tagarenigamu maremi hagenani manga na kare vurivuri, hanana mu tanugi na marâ, ga koro ma ka oto, ma hanana mu voravora maninga vi na kariana God.

20Matena na tasi ki marungigamu manga na kare vurivuri iana, igamu kamu pe oga i ruguhani na Ramata iana God. 21Hoita, na tarana koro ta kamu nahunigi me i nago igê na marâ, mu maki renigi i ngekê? Na mena na marâ ngegana ki na mera. 22Ma i ngekê God ki bani rupasigamu tenia na raramohana na tasi, ma kamu bani vora re na kare vurivuri iana God. Ma tahema na mêrihami hagenani ka râ suria na obaniha iana, ma kamu page nahunia na mêriha mora ma tarema. 23Renia na tasi ki vuria na mera, ma na mahatanga iana God ki na mêriha mora ma tarema, renia igia ka obahaku henia o Kirisito Jesu na Araha iaka.

Currently Selected:

ROMA 6: KCB

Highlight

Copy

Compare