ROMA 3

1I hega, na Siu ka teharira vari na enoni, ga pe Siu? Na reteha ni gavoni varata ki na tarana koro se mareha? 2Ua, i koro igê na ara ni tarani. Ma na marâ i teha ngavê, kani God i hagêgurira na Siu renia na taroha iana. 3Ma ki hega, manga vi tani na hitangita, ma ka pe tê viteana God? Renia na tarana ngekê igamu kamu takusia vari, vi God ki pe hagamonaria igê na tamasinga iana? 4I asa vê! God ki tamasi monari tare, henaka vi na enoni hato ka hagaparu. Renia na Buka Apuna ki vi:

“Na ara ni matena go tamasi,

na enoni hato ka girara bâkoro,

vi igo ko tamasi oto.

Ma na ara ni matena go gâga igê na tamasinga,

igo ko tangatanga monari,

vi igo ko oto.”

5Ma ki hega, manga vi na eraha iaka, ma ki hagabângenia mave maninga na otohana God? Na ta ka na aramiha tanga? I koro vari, kani viga vivi, vi God ki pe oto, matena i hagaitangigia? (Inê kê tamasi ngekê suria na parongaka igia na enoni.) 6Mareha ngavê! Manga vi God, ma ki pe oto, tanu hega kani girara, i surira na enoni hato?

7Ma ki hega, manga vi na eraha iaku, ma ki kasia akê God, renia vi hagabângenia mave maninga na korohana? Tanu hega, kani vi suriê ki hagaitangiê manga vi inê ka na enoni era? 8Manga ngekê, hega kaniga pe vi, “Nika, ge katogi na tarani ga era, hanana ge vora me na tarani ga koro”? I monari, tani na enoni ka torapusiê, ka vi, vi inê kê tamasi vikana, ma hete, ngaira ka tamasi erasiê. God ki page surira i hagaitangira, manga hanana i ararira.

Na enoni ki asa vi ge oto i maana God

9Hoita, igami na Siu, kami hega, mi koro vari i maana God teharira na enoni, ga pe Siu? Mareha vê! Inê kê bani visia, vi na eraha ki marungira na Siu ma na enoni, ga pe Siu nikâ. 10Renia na Buka Apuna ki vi:

“I mareha ngavê na ani gi tage ma na enoni,

vi ge koro i maana God.

11I mareha ngavê na ani gi tage ma na enoni,

vi ge girara maninga na ta ki koro,

se vi ge garia God.

12Na ara ni enoni ka bani murisigea God;

ngaira hato ka era.

I mareha ngavê na hitangita,

vi ge katogi na tarani ga koro.

13Na tamasinga iata ka nahu enoni.

Ngaira ka hagaparu ma ka hara era tare.

Ma na tamasinga i harata ka hagamesira na enoni,

manga na ma era, i garagara.

14Ngaira ka tabotabo hara ma ka tohetohe tare.

15Ngaira ka hatani hagamamasiaga apeta na enoni,

ma ka nahuira ka meme.

16Ngaira ka makuakua ma ka erasira na enoni

i na ara ni agua ga arâ igê.

17Ngaira ka pe girara

na tarana na hekomaniha ma na marapeha.

18Ma nikâ ngaira ka pe girara,

vi ge magutenia God.”

19Hoi, igia ka girara, vi na ara ni marâ igê na Ramata i na Buka Apuna ka buhira na enoni, ga oga i ruguhani na Ramata, hanana siana na enoni hato ka totora pusira mareta, ma hanana i hagabângenia, vi God ki page surira na enoni hato i maveta. 20Renia i asa hagetage ta na enoni, vi ge koro ma ke oto i maana God, suria vi ngaia ki tanugi na marâ, ga visigi na Ramata. Na Ramata ka hagagirarara ma na enoni, vi ngaira ka bani tasi.

Manga i he God ki hagakorora na enoni tanga ngaia marena?

21Ma i ngekê God ki bani hagabângenia, hanana vi ngaia getea ma kani hagakorora na enoni tanga ngaia marena, mareha vi na Ramata. Na Ramata iana o Moise ma na poropete ka hagatanga monari renia na tarana ngekana. 22God ki hagakorora na enoni tanga ngaia marena, renia ngaira ka tongesuria o Jesu Kirisito. God ki katora vikana na enoni hato, ga tongesuria o Kirisito, suria na ara ni enoni hato ka tagenata ma; 23na ara ni enoni hato ka bani tasi, ma ka hagatê tenia God, na tahingata. 24Ma renia God ki mahata tangara na enoni, ma ki takuira, ngaia ki hagakorora tanga ngaia marena. Ngaia ki kato vikana renia o Kirisito Jesu, i rupasira. 25God ki atea, hanana i bonotenigi na tasi iata na enoni renia na mera iana o Kirisito, manga vi ga tongesuria. God ki kato vikana, ki hagabângenia, hanana vi ngaia ki hagakorora na enoni tanga ngaia marena. I nago God ki piringiape, ma ki pe gagêmaga renigi na tasi iata na enoni. 26Ma i ngekê, na matena i ngekê, ngaia ki kahu gagêmaga renigi na tasi iata na enoni, i hagabângenia, vi ngaia ki hagakorora na enoni tanga ngaia marena. Igê na tarana ngekana God ki hagabângenia, vi ngaia ki oto, ma ki hagakorora tanga ngaia marena na ara ni enoni, ga tongesuria o Jesu.

27I oga vari ta na marâ, hanana vi ga paroparo renia? Mareha ngavê! Tanu hega? Suria vari vi igia ka marupegi na Ramata iana o Moise? Mareha! Ma suria ma hete igia ka tongesuri. 28Renia i manga ngekê, igia ka girara, vi God ki hagakorora na enoni tanga ngaia marena, suria ma ngaira ka tongesuri, ma ki mareha vi suria ngaira ka marupegi na Ramata iana o Moise. 29Se God iata ma vari na Siu? Se God iata nikâ vari na enoni, ga pe Siu? Mako! 30God ki gi tage ma tangara na Siu ma na enoni, ga pe Siu, ma ngaia ki page hagakorora na Siu tanga ngaia marena renia na tongesuriha iata, ma ki page hagakorora na enoni, ga pe Siu, tanga ngaia marena suria na tongesuriha iata. 31I vi vari, vi ga nakagi vê na Ramata iana o Moise, suria vi igia ka nahunia na tongesuriha ngekana? Mareha ngavê! Igia ka marupegi hete na Ramata iana o Moise.

Currently Selected:

ROMA 3: KCB

Highlight

Copy

Compare