ROMA 4

O Abaramo ma na tongesuriha iana

1Hoi, igami na Siu ki na raraha iana o Abaramo. Ma ki hega na êvarimami? Na ta ki tarahua? 2Manga vi God ma ki hagakoroa tanga ngaia marena renigi na tagaraha iana, ngaia ki girara, vi paroparo renia ta na marâ. Ma ki asa, vi ge paroparo i maana God. 3Na Buka Apuna ki vi, “O Abaramo ki tongesuria God, ma suria i tongesuria, God ki visia, vi ngaia ki koro ma ki oto i maana.” 4Na enoni, i tagara, ka vuria, ma na vurina ki mareha vi na mahatanga ma ngaia ki na mena hete ma na tagaraha iana. 5Takusia na enoni, i tongesuria God hete, ma ki pe ngahi renigi na marâ, i tanugi, hanana vi hagakoro obana God. God, i visia, vi na enoni era ki koro i maana, ngaia ki bâsia ma na tongesuriha iana na enoni, hanana vi hagakoroa tanga ngaia marena. 6Ikê ka na tarana o Tavite i takusia, matena i vi, i hagâvo na enoni, God i visia, vi i koro ma ki oto i maana, henaka vi ngaia ki pe tanugi na marâ, hanana vi ge hagakoro obana God renigi. Ngaia ki vi: 7“Ga hagâvo na enoni,

God i bani bonotenigi na tasi iata.

Ga hagâvo na enoni,

God i bani ata ni tako mavê renigi na tasi iata.

8Ga hagâvo na enoni,

na Araha ki asa, vi ge page gagêmaga renigi na tasi iata.”

9Na hagâvonga, o Tavite i tamasi renia, ngekê ki hega, i tangara ma vari na enoni, ga bani retegi râ na gavoni na varata? Mareha. Ngaia ki tangara nikâ hete na enoni, ga pe retegi râ na gavoni na varata. Renia igami kami bani visia, vi na Buka Apuna ki vi vikê, “O Abaramo ki tongesuria God, ma suria i tongesuria, God ki visia, vi ngaia ki koro ma ki oto i maana.” 10I na keta kani akê me igê na tarana ngekana? I nago se i na murina na matena ga retea râ na gavona na varana o Abaramo? I nago, mareha vi i muri. 11Ga retea râ na gavona na varana i muri, ma na reteha ngekana ki na orena, i hagatanga monari, vi God ki bani visia i nago, vi o Abaramo ki koro ma ki oto i maana renia na tongesuriha iana, ma i hemuri ka kahu retea râ na gavona na varana. Tahema igê na apanena igê na tongesuriha o Abaramo ki manga na vaemata na enoni hato, ga tongesuria God, ma God ki visira, vi ga koro ma ka oto i maana, henaka ga pe retegi râ na gavoni na varata. 12Ma nikâ ngaia ki manga na vaemata na enoni, ga bani retegi râ na gavoni na varata, mareha vi suria ma vi ga retegi râ na gavoni na varata, ma suria hete ngaira ka mêri suria na tarana na tongesuriha, tagenana manga o Abaramo na êvarimami, matena ga mamênga, vi ge retea râ na gavona na varana.

Na suruha iana God tangara na enoni ga tongesuriha

13God ki surua tangara o Abaramo ma na raraha iana, vi ngaira ka page nahunia na maveta. God ki surua na tarana ngekana, mareha vi suria o Abaramo ki râ surigi na Ramata iana o Moise, ma suria hete ngaia ki tongesuria God. Tahema God ki visia, vi i koro ma ki oto i maana. 14Renia manga vi God, ma ki vatera na enoni, ga râ surigi na Ramata iana o Moise, na marâ, i bani surugi tangara, i ngekana na tongesuriha iata na enoni ki vora re na marâ purua ma, ma na suruha iana God ki vora re na marâ purua ma nikâ. 15Suria ga oga na Ramata iana o Moise, God ki hagaitangira na enoni; manga vige pe oga na ramata, na enoni ki asa, vi ge aharêngigi na ramata.

16Hoita, na hunana na suruha ki na tongesuriha. Tahema na suruha ki na mahatanga iana God tangara na raraha hato iana o Abaramo, mareha vi tangara ma na enoni, ga râ surigi na Ramata iana o Moise, ma tangara nikâ hete na enoni, ga tongesuri manga o Abaramo. Renia igê na apanena igê na tongesuriha ngaia ki manga na vaemaka hato. 17Suria na Buka Apuna ki vi, “Inê kê katora rako na enoni, ga pe Siu, ka page visigo, vi igo o vaemata.” Ngaia nga ngekê i maana God. O Abaramo ki tongesuria God, i hagamêrira aporo na enoni, ga bani me, ma ki ramata, ka oga na marâ, ga pe bani oga me i nago me i nago. 18O Abaramo ki tongesuri ma ki nanasi, henaka i bâ, manga vi ngaia ki nanasi baguru. Ma vikana ngaia ki vora re na vaemata na enoni rako, ga pe Siu. Hanana i bani visia na Buka Apuna, ki vi, “Na raraha iamu ka page rako ngavê.” 19Na harisi iana ka haga ni vora na tangarê gi tage. Na tongesuriha iana ki gatagata nga, henaka ngaia ki girara, vi ngaia ki gemêa ngavê, ma ki hatiana noga, se ka Sara ki gomara. 20Ngaia ki ama ni tongesuri nga, ma ki pe hagaiga na suruha iana God. Na tongesuriha iana ki hagagatagatania, ma ngaia ki visia raha God. 21Ngaia ki girara nga, vi God ki girara i hagamonaria na marâ, i bani surua. 22Tahema God ki visia o Abaramo, vi “i koro ma ki oto i maana”, suria ngaia ki tongesuria God. 23Na tamasinga, ga vi, vi God ki visia, vi ngaia ki koro ma ki oto i maana, ngaira ka pe tamasi renia ngaia getea ma. 24Ma ngaira ka tamasi renigia nikâ hete, vi God ki page visigia nogaka, vi ga koro ma ka oto i maana, renia igia ka tongesuria God, i hagamêria aporo o Jesu na Araha iaka tenira na enoni, ga me. 25God ki hagamarumungenira na enoni, ka nahuia o Kirisito ki me renigi na tasi iaka, ma ki hagamêria aporo, hanana i hagakorogia tanga ngaia marena.

Currently Selected:

ROMA 4: KCB

Highlight

Copy

Compare