ROMA 14

Siana kamu surira purupuru na goami ga tongesuri

1Mu torea i pasimi na enoni, i pe ramo igê na tongesuriha, ma siana kamu mehetuguri renigi na takotako iana marena. 2Ta na enoni ki takusia, vi na tongesuriha iana ki hagamarumungenia, hanana vi ngaugi na ani mavê na ngêra, ma na enoni, i pe ramo igê na tongesuriha, ngaia ki pe ngaugi na ganiani. 3Na enoni, i ngaugi na ani mavê na ngêra, siana ki kikitenia na enoni, i pe ngaugi na ganiani. Ma na enoni, i pe ngaugi na ganiani, siana ki suria ki hagaitangia na enoni, i ngaugi na ani mavê na ngêra, suria God ki bani torea tanga marena. 4O ti ki girara i suria ki hagaitangia na enoni tagara iana na enoni getea? Ngaia getea ma na avanuna ki girara i suria marena na kariana, manga vi tagara koro se i mareha. Ma ngaia ki page tagara koro, suria na Araha ki girara i katoa, ki tagara koro.

5Tani na enoni ka takusia vari, vi ta na tangiana ki raha teharigi na tangiani getigi, ma tani na enoni ka takusia, vi na ara ni tangiani ka tagenani ma. Na ara ni enoni ki râ suria na marâ, i takusia, vi tuguhia, vi arâ suria. 6Na enoni ma ki hagarahasia ta na tangiana, ngaia ki katokato vikana, hanana i visia raha na Araha. Na enoni, i ngaugi na ani mavê na ngêra, ngaia ki katokato vikana, hanana i visia raha na Araha, suria ngaia ki visia koro God renigi na ngêra. Na enoni, i usi, vi ge ngêgi tani na ngêra, ngaia ki katokato vikana, hanana i visia raha na Araha, ma ki visia koro God. 7Renia i asa na hitangika, vi ge mêri tanga so marena ma. Ma ki asa na hitangika, vi ge me tanga marena ma. Igia ka mauri, hanana ga visia raha na Araha igê na mêrihaka hagenani. 8Ma ki manga igia, ma ka me, igia ka meme, hanana ga visia raha na Araha. Naka ma igia ka mauri se ga meme, na Araha nga ki nahunigia. 9Renia o Kirisito ki me ma ki mêri aporo, hanana i araha tangara na enoni, ga mauri, ma na enoni, ga me. 10Hoi, ma ki hega igamu? Igamu na enoni, mu pe ngaugi na ganiani, tanu hega kanimu surira kamu hagaitangira na goami igê na tongesuriha? Ma igamu na enoni, mu ngaugi na ani mavê na ngêra, tanu hega kanimu kitenira na goami ga tongesuri? Igia hato ka page rêra i maana God, hanana ngaia ki surigia. 11Renia igê na Buka Apuna na Araha ki vi,

“Inê kê tohe reniê mareku, na God mamauri:

na ara ni enoni ka page susure i maaku,

ma na ara ni enoni ka page visiê mataha,

vi inê kani God.” 12Tahema na ara ni hitangika ki tuguhia, vi page visigi na parongana hato tanga God.

Siana kamu hagatasia na goami i tongesuri

13Hoita, siana ka surigia heri nikâ. Ki tuguhigamu hete, mu takotako vikê: siana hagetage kamu tanua ta na marâ, i girara i hagatasia, se i hagavotaria igê na tasi na goami, i tongesuria o Kirisito. 14Renia inê kê obahaku henia na Araha o Jesu, inê kê girara bâkoro, i mareha vê ta na ngêra, vi ge apu marena. Ma ki manga ta na enoni ma ki takusia ta na ngêra, vi apu, ngaia ki apu tanga marena. 15Manga igamu, ma kamu erasia na goami i tongesuri, suria mu ngêa ta na marâ, ngaia ki takusia, vi apu, vi ge ngêa, igamu kamu hagabângenia, vi igamu kamu pe takuia nikâ. Siana kamu erasia ngavê na enoni, suria mu ngaua na ngêra, ngaia ki takusia, vi apu, renia o Kirisito ki me tanga, hanana i hagatahia. 16Siana kamu katora na enoni, ka visigi, vi ga era na marâ, mu takusigi, vi ga koro. 17Renia na Arahanga iana God ki mareha vi renigi na marâ, mu ngaugi se vi gamu tonomigi, ma ki renigi ma hete na marâ igê: mu korokoro ma kamu ototo i maana God; kamu obâbahaku henia God ma kamu vagevage. Na marâ ngegana na Higona Apu kani vategia. 18Ma ki manga ta na enoni, ma ki arâ suria na obaniha iana o Kirisito igê na tarana ngekana, ngaia ki hagakoro obana God, ma na enoni getera ka visia koro nikâ.

19Hoita, i tuguhigia, ga uhungia tare nga, ka tanugi na marâ, ga girara ga katora na enoni, ka obâbahaku, ma ka hekomani igê na tongesuriha. 20Siana kamu erasia na tagaraha iana God renigi na tarani igê na ngauha. Na ngêra hato ka pe apu, vi ge ngaugi. Ma ki manga na enoni, ma ki ngaua ta na ngêra, ma igê na tarana ngekana ngaia ki hagavotaria na enoni getea igê na tasi, na tarana ngekana ki era. 21Na tarana koro ki manga ikê hete: siana ko ngaugi na ganiani, siana ko totono na vaini, se go tanua ta na marâ getea, i girara i hagatasia na goamu, i tongesuri. 22Na takotako iamu maremu renigi na marâ ngegana ki oga i berarogamurua God mego. Ki hagâvo na enoni, i pe raruni era, matena i tanua ta na marâ, i takusia, vi i koro. 23Ma ki manga ngaia, ma ki takoherua renia na ngêra, vi ngaua, God ki suria ki hagaitangia renia, matena i ngaua, renia ngaia ki pe ngêa, suria vi tonga hunana igê na tongesuriha i pasina. Manga igia, ma ka tanua ta na marâ, i pe tonga hunana igê na tongesuriha, igia ka tasi.

Currently Selected:

ROMA 14: KCB

Highlight

Copy

Compare