ROMA 15

Siana kamu hemasesi

1Igia na enoni, ga gatagata igê na tongesuriha, ki tuguhigia, viga tamanira na enoni, ga pe gatagata igê na tongesuriha, hanana ngaira ka ama ni tongesuri nga. Siana ka hemasesi igê na marâ, ga tanugi. 2Ma ki tuguhigia, ga hagakoro obata hete na goaka ga tongesuri, ma ka tanua na marâ, i koro tangara, hanana ngaira ka nganganihaga nga igê na tongesuriha. 3Renia o Kirisito ki pe hemasesi. Renia na Buka Apuna ki vi,

“Na enoni, ga guharigamu,

ka guhariê nogaku.”

4Renia na ara ni marâ, ga bani segegi igê na Buka Apuna, ka bani segegi, ka hagesurigia, hanana igia ka raruni togo, suria na Buka Apuna ki katogia, ka togeaga, ma ki kanukanugia. 5Ma inê kê nungia God, ki katogia, ka togeaga, ma ki kanukanugia. Ma kê nungia God, ki vategamu, kamu obâbahaku, ma kamu arâ suria na parongana o Kirisito Jesu, 6hanana igamu hato haku kamu visia raha God, o Vaemana na Araha iaka o Jesu Kirisito.

Na Taroha Koro ki tangara nikâ na enoni ga pe Siu

7Hoita, mu hekomaniheri, tagenana manga o Kirisito ki komanigamu, hanana na enoni hato ka visia raha God. 8Renia inê kê vi tangagamu, vi o Kirisito ki komanira na Siu, hanana i hagabângenia, vi God ki hagamonarigi tare na suruha iana, i vi, vi o Kirisito ki hagamonarigi na suruha iana God tangara na êvarita. 9Ma o Kirisito ki râ me nikâ, ki tamanira na enoni, ga pe Siu, hanana ga visia raha God, suria ngaia ki takira. Suria na Buka Apuna ki vi,

“Tahema inê be visigo koro

i pasita na enoni, ga pe Siu.

Inê be visigo raha igê na ki.”

10Ma ki vi nikâ,

“Igamu na enoni, mu pe Siu, mu vagevage

haku henira na kariana God.”

11Ma ki vi nikâ,

“Igamu hato na enoni, mu pe Siu,

mu visia raha na Araha.

Igamu hato na enoni, mu pe Siu,

mu visia raha ngavê.”

12Mo Isaia ki vi nikâ,

“Ta na raraha iana o Jese ki page vora me.

Ngaia ki page arâ me,

hanana i marungira na enoni, ga pe Siu.

Ma ngaira ka page raruni togo renia.”

13God ki katogia, ka raruni togo. Inê kê nungia, ki hagakoro obami ngavê, ma ki katogamu, kamu marape ngavê, renia igamu kamu tongesuria, vi na Higona Apu kani katogamu, kamu ama ni raruni togo ngavê nga.

Tanu hega o Paulo ki tamasi ramo vikê

14Goaku igê na tongesuriha, inê kê girara bâkoro, vi igamu kamu hetakuiheri maninga, ma kamu girara maninga, vi na ta ki tuguhigamu, ma kamu girara mu hagaotogamu heri. 15Ma igê na leta ngekê inê kê tamasi ramo mataha, renia God ki bani ateê tanga na tagaraha koro ngekê: 16ngaia ki bani ateê, kê vora re na kariana o Kirisito Jesu, kê tamanira na enoni, ga pe Siu. Inê kê tagara manga na mane ni vogasiha matena gê ateate renia na Taroha Koro iana God, hanana na Higona Apu ki tagarenira na enoni, ga pe Siu, tanga God manga na vogasiha, i hagakoro obana. 17Inê kê obâbahaku henia o Kirisito Jesu, tahema inê kê girara gê ageage renia na tagaraha iaku tanga God. 18I asa be magu, ma inê kê tamasi ramo ma renigi na marâ, i bani tanugi o Kirisito: ngaia ki katoê, kê bêngenira na enoni, ga pe Siu, hanana vi ga têtê viteana God. Ngaira ka têtê viteana God renigi na tamasinga iaku ma na tagaraha iaku, 19ma renigi na marâ raha ma na mena, ma renia na Higona Apu i tagara ramo. Tahema inê kê bani tarohenia tare na Taroha Koro renia o Kirisito igê na ara ni hinua, haganega tenia i Jerusaleme tariha igê na apanena i Iliriko. 20Na ani gi tage ma na marâ gê obania tare: kanigê obania, vigê tarohenia na Taroha Koro igê na agua, na enoni ka purunguni mênga igê renia o Kirisito, hanana gê pe uruia na tagaraha iana na enoni getea. 21Suria na Buka Apuna ki vi,

“Na enoni, ga purunguni mênga renia,

ngaira ka page bâsia ma ka page bâgirara.

Ma na enoni, ga oga karinga raha mênga renia,

ngaira ka page rongoa ma ka page tahetara renia.”

O Paulo ki pasi râ i Roma

22Tahema hagarako na tagaraha iaku ki bani hagabarasiê, vi ve vatugigamu. 23Ma i ngekê inê kê bani hagahatungia na tagaraha iaku i na apaneni igê agê. Ma renia surigi na harisi rako inê kê bani obania, vi gê vatugigamu, 24inê kê takusia, vi ve vatugigamu i na matena ngekê. Inê kê obania, vi ve vatugigamu igê na râha iaku tanga i Sipeni. Inê kê obania, vi ve oga i pasimi surigi tani na wiki, ma be vagevage henigamu. Ma hemuri be hagatoragamu, kamu tamaniê, hanana ve râ i Sipeni. 25Ma i ngekê inê kê arâ noga i Jerusaleme, hanana gê tamanira igê na enoni, ga tongesuri. 26Renia na haku na enoni, ga tongesuri, i Masetonia me Agaia ngaira mareta ka bani vi, vi ga hakuhaku haga, hanana vi ga tamanira na kariana God, ga oga i Jerusaleme ma ka matareha. 27Ngaira mareta ka kato vikana. Ma ki monari nikâ, i tuguhira, hanana vi ga tamanira. Renia na Siu ka vatera na enoni, ga pe Siu, na marâ tenigi na marâ koro, God i bani vatera tangagi na atarota. Ma ki manga ngekê, ki tuguhira na enoni, ga pe Siu, vi ga tamanira na Siu renia na marâ, ga obania, vi ga mauri re. 28Matena gê hatungia na tagaraha ngekana, gê tagarenigi tangara na ara ni haga, ga bani hakugi tangara, inê kê page arâ i Sipeni, ma igê na râhâ iaku i ngekana inê kê page vatugigamu igê. 29Matena gê arâ i Sipeni, inê kê girara, gê page migirâ vê na ara ni korohana o Kirisito.

30Goaku igê na tongesuriha, inê kê kanukanugamu, kamu ama ni nunginungi nga heniê, ma kamu nungia God tangê, suria igia ka tongesuria na Araha iaka o Jesu Kirisito, ma suria na Higona Apu ki katogia, ka hetakuiheri. 31Mu nunginungi tangê, hanana gê tahitahi tenira na enoni i Jutea ga pe tongesuri, ma hanana na kariana God i Jerusaleme ka vagevage renia na hetamaniha iaku tangara. 32Ma hemuri ki korokoro ngavê na obaku, vi gê vatugigamu, manga vi God i obania, ma kê vagevage, matena gê gâga henigamu, ma kê mamaro i pasimi. 33Inê kê nunginungi, hanana i gâga henigamu God, i vategia na monariha. Monari.

Currently Selected:

ROMA 15: KCB

Highlight

Copy

Compare