ROMA 13

Na enoni ki tuguhira, vi ga hanetasia na Gavumane

1Na ara ni enoni, ki tuguhira, vi ga têtê viteana na gavumane, renia na gavumane ki nahunia na ramoha, suria ma God ki naka na tarana ngekana; ma na gavumane ngekê God ki hagêgurira. 2Na anima na enoni, ma ki rêra pusia na gavumane ngekê, ngaia ki ura pusia na marâ, God i bani naka. Ma na anima na enoni, i katokato vikana, ngaia ki hagaitangia marena. 3Renia na enoni, ga arâ surigi na ramata, ki asa iata, vi ge magutenia na gavumane. Ma na enoni, ga pe arâ surigi na ramata, ngaira ka magutenia na gavumane. Mu obania vari, vi siana kamu magutenia na enoni, i marungigamu? Hoi, mu tanugi na marâ, ga koro ma ka ototo, ma ngaia ki page visigamu koro. 4Suria ngaia ki tagara suria na katoha iana God, hanana i tamanigamu. Ma ki manga mu tanugi na marâ, ga pe koro ma ka pe oto, hoi, mu kahu magutenia, renia ngaia ki nahunia monari na ramoha, hanana i hagaitangigamu. Ngaia ki tagara suria na katoha iana God, ma ki urusia God, ki hagaitangira na enoni, ga tanugi na marâ, ga pe koro ma ka pe oto. 5Tahema i tuguhigamu, vi mu têtê viteata na enoni, ga marungigamu, mareha vi suria ma vi gamu magutenia na hagaitangiha iana God, ma suria nikâ hete igê na aitangihami igamu kamu girara, vi na tarana ngekana ki tuguhigamu.

6Tahema nikâ mu vurivuri takesi, renia na enoni, ga marungigamu, ka tagara suria na katoha iana God, matena ga tanugi na tagaraha iata. 7Tahema mu vurivuri tangara, suria i tuguhigamu, vi gamu vurivuri tangara pusigamu maremi ma pusigi na nahuninga iami. Mu hanetasira ngaira hato, ma kamu hagahigasira.

Na enoni ki tuguhira vi ga hetakuiheri

8Siana kamu hagaba tanga ta na enoni. Ma ki tuguhigamu, mu hagaba tare hete renia na hetakuiha. Na enoni ma ki takuira na enoni getera, ngaia ki marupegi na Ramata hato iana o Moise. 9Na ramata ka vi: “Siana ko gamogamo; siana ko nahu enoni; siana ko hanago; siana ko tenigi na marâ iata na enoni getera.” Ma na ramata gi tage togo, i vi, “Ko takuira na enoni hato getera manga igo maremu,” na ramata ngekê ki hagatarobêgi na ramata hato ngegana ma na ramata getigi nikâ. 10Na enoni, i takuira na enoni getera, ngaia ki asa, vi ge erasira. Tahema na enoni ma ki takuira na enoni getera, ngaia ki marupegi na Ramata hato igê na Buka Apuna.

11I tuguhigamu, mu tanua na tarana ngekana, suria igamu kamu girara, vi râ me noga na matena mu riterite igê. Suria i ngekê na matena, God i page hagatahigia igê, ki hagarangi me teharia na matena, ga tongesuri moramora igê. 12Na roto na bungiana ki hato noga, ma ki sugia ma, vi ge tangi. Ga nakagi vê na marâ era na roto. Ma ka taugi hete na tangaruha ni mavetana na tangiana. 13Ga paronga maninga manga i marisika, mangara na enoni, ga oga igê na mavetana na tangiana. Siana kamu mâmâ bera, se vi ga ruguhigamu na tonoha. Siana kamu paronga era, se vi gamu tê tanu era. Siana kamu heariha, se vi gamu hengari. 14Mu taugi na tangaruha iana na Araha o Jesu Kirisito, ma siana kamu arâ surigi na teniha era ni apemi.

Currently Selected:

ROMA 13: KCB

Highlight

Copy

Compare