RANGANIHA 9

Na rimata ni ahuri

1Ma hemuri na rimata na angelo ki uhia na anina na ahuri. Inê kê bâsia na higu, i bani vota so i maveta tenia na vavearo. Ka vatea na ramoha, hanana i tangahia renia na kokoro, i so ngavê. 2Na higu ki tangahia na kokoro, i so ngavê. Ma na robona ki hura akê me igê, manga na robona na apena na bagagi raha. Ma na robona, i hura akê me tenia na kokoro, i so ngavê, ki rubuhirerua, karu roto na arito ma na vavearo. 3Na pê ka so me tenia na robona tanga na maveta, ma ka vatera renia na ramoha, i manga na raramohata na garagarapinihi. 4Ka hagapêpura, vi siana ka erasigi na go, se vi na apinige, se vi na ani mavê na rauga. Ma ka girara ma hete, ga erasira na enoni, ga pe nahunia na segesegeha iana God igê na raeta. 5Ga hagapêpura na pê, vi siana ka nahuira ka me na enoni ngegana. Ma ka girara ma hete, ga hagamamasiaga apeta bâraha surigi na hageha gi rima. Na mamasiaganiha, ga vatera na enoni renigi, ka mangagi na mamasiaganiha, na enoni ga hatamigi, matena na garagarapinihi i garera. 6Surigi na hageha gi rima ngegana na enoni ngegana ka gunahia, vi ge meme, ma ki asa, vi ge me. Ngaira ka obania, vi ge meme, ma ki bara iata, vi ge me. 7Na pê ka mangara na hosi, ga hagarêra tanga na hearihatana. Igê na bêta ka oga igê na marâ, ga bâ mangagi na tarepuri na golo, ma na maata ka bâ mangara na maata na enoni. 8Na varehuta ka mangagi na varehuta na gete, ma na rivota ka mangagi na rivota na laioni. 9Ngaira ka susube renigi na marâ, ga bâ manga na aiani. Ma na gagahata ka rongo mangagi na kati rako, na hosi ga okegi, matena ga tangotango igê na hearihatana. 10Ma na kereta ka tonga renigi na gueta, manga na guena na garagarapinihi. Ma na ramoha, ga tâ igê na kereta, hanana ga hagamamasiaga apeta na enoni renigi, ngaigi ka tâ surigi na hageha gi rima. 11Ngaira ka nahunia na maneraha i marungira. Ngaia ki na angelo, i bâsuria na kokoro, i so ngavê. Na Siu ka hêtana renia vi Abatoni, ma na Ai ni Agaia ka hêtana renia vi na Apolione (i vi “Hagaeraha”).

12Na ani gi tage na eraha ki hato. I murina na ani ngekê na ani gi rua karu mamênga me.

Na onota na ahuri

13Ma hemuri na onota na angelo ki uhia na anina na ahuri. Ma inê kê rongoa na ringena, i râ me tenigi na rarini ge he na bea na golo ni vogasiha, i ura i maana God. 14Na ringena ki vi tanga na onota na angelo, i têa na ahuri, ki vi: “Gu rupasira na angelo ge he, ga rakura hagarangia na ve raha i Uparatesi!” 15Ga rupasira na angelo ge he. Ga bani hagarêra tanga na matena i ngekê nga, igê na tangiana i ngekê nga, igê na hageha i ngekê nga, igê na harisi i ngekê, hanana ga nahuira ka me na ara ni oruta na enoni hato i maveta. 16Inê kê rongora, vi gi hita na me kaniga tagirira na hosi. Ngaira ka vora na tangarê gi rua na bera. 17Ma igê na maruteha iaku inê kê bâsira na hosi ma na me, ga tagirira. Ngaira ka susube renigi na aiani, ga memera manga na gi, ma ka maramarava manga na hê ahe, i maravarava, ma ka hereherega manga na hê ahe, i toratorakaga. Na bêta na hosi ka bâ mangagi na bêta na laioni. Ma i harata ka huhura me igê na gi, na roborobona, ma na roga toratorakaga, i henahu. 18Na ara ni oruta na enoni ki meme renigi na eraha gi oru igê: na gi, na roborobona, ma na roga toratorakaga, ga huhura me tenigi na harata na hosi. 19Suria na ramoha iata na hosi ki tâ igê na harata, ma igê na kereta nikâ. Na kereta ka mangara na ma, ga tonga na bêta, ma ngaira ka hagamamasiaga apeta na enoni renigi.

20Na enoni getera, na ani ga pe me renigi na eraha ngegana, ngaira ka pe murisigegi na marâ, ga bani tahegi. Ngaira ka hagarapera na ataro, ma na nunuta, ga tagarahigi renigi na golo, na siliva, na barasi, na hê ma na apinigê. Na marâ ngegana ka pe bâbâ, se vi ge rongorongo, se vi ge arârâ. 21Ma nikâ ngaira ka pe urisi parongata, ma ka ama ni nahunahu enoni nga. Ngaira ka hekuasi, ka tanu era, ma ka hanago.

Currently Selected:

RANGANIHA 9: KCB

Highlight

Copy

Compare