RANGANIHA 10
10
Na angelo ma na kere rumina na pepa
1Ma hemuri inê kê bâsia nikâ ta na angelo raramohaga hunia, i so me tenia i pasina God. Ngaia ki tuguni renia na vaha, ma i bêna ki oga igê na rorovagaro. Na maana ki manga na arito, ma na êgana karu mangarerua na u na gi. 2Ngaia ki têa i rimana na rumina na pepa, i bani gasia. Ngaia ki pu i basina na asi renia na êgana i otona, ma ki pu i mu renia na êgana i mahana. 3Ngaia ki ngere raha. Na ringena ki rongo mangara na laioni. I murina i ngere hato, na gugusuhia gi pi ka arami bê aporo, ga rongo raha ngavê. 4Matena ngaira ka haganega ka tamasi, inê kê haganega nogaku kê sege. Ma kê rongoa na ringena, i râ me tenia i pasina God, ki vi: “Gu pinihigi na marâ, na gugusuhia gi pi ga bani visigi. Siana ko segegi so!”
5Ma i hemuri na angelo, gê bâsia, i pu i basina na asi ma i mu, ki tagarenia akê na rimana i otona tanga i pasina God. 6Ngaia ki tohe renia God, i mauri tare ma tare ma, ma ki hagavoragi na vavearo ma na ara ni marâ hato igê, ma na maveta, ma na ara ni marâ hato igê, ma na asi, ma na ara ni mara hato igê. Na angelo ki vi: “I asa vi ge hagarihu! 7Ma na matena na pita na angelo ki uhia na anina na ahuri, God ki page hagamonaria na katoha pinihi iana, tagenana manga i bani visia tangara na poropete, na kariana.”
8Ma hemuri na ringena, inê kê bani rongoa, i tamasi tenia i pasina God, ki tamasi nikâ tangê, ki vi: “Gu râ, ma ku tavoa na rumina na pepa, ga bani gasia, ma ki tâ i rimana na angelo, i pu i basina na asi ma i mu.”
9Inê kê râ i pasina na angelo, ma kê nungia, ki vateê na kere rumina na pepa. Ma ngaia ki vi tangê, ki vi: “Go taua, ma ko ngaua. Ngaia ki page mahe i obamu, ma i haramu ki page mamaki manga na pirui.” 10Inê kê tavoa na kere rumina na pepa tenia na rimana, ma kê ngêa, ma i haraku ki mamaki manga na pirui, ma i murina gê unumia, ngaia ki mahe i obaku.
11Ma hemuri ka vi tangê, ka vi “I tuguhigo, gu tarohenia nikâ na taroha iana God renira na enoni tenigi na raraha rako hegitigi, ma tenira na enoni, ga bâ hehegitigi, ma tenigi na tamasinga hehegitigi, ma renira na maneraha.”
Currently Selected:
RANGANIHA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
