RANGANIHA 14

Na ki iata na enoni ga tahi

1Ma hemuri inê kê bâsia na Karena Sipi, i ura igê na Hungana Sione. Ma na tangarê gi tage ma na tangahuru ge he matara ke he na rehagaro na enoni ka oga henia, ga nahunirerua na atana ngaia ma na atana o Vaemana, ga segegi igê na raeta. 2Ma inê kê rongoa ta na ringena, i râ me tenia i pasina God. Ngaia ki ao manga na bagabêrugu raha, manga na akurua raha. Na ringena, gê rongoa, ki rongo manga na ringeni na kita, matena ga tarugigi. 3Ngaira ka ura ka maatira na atohana raha, ma na marâ mamauri ge he, ma na meraha, ma ka kiria na ki haoru. I mareha rârâ ta na enoni, vi ge hagesuringenia na ki ngekê, nga noga ma na tangarê gi tage ma na tangahuru ge he matara ke he na rehagaro na enoni, ga bani tahi tenia na maveta. 4Ngaira ka na mane, ga oga matarotaro, suria ga pe vanasira na gete; ngaira ka oga tatara. Ngaira ka takua na Karena Sipi i na ara ni agua, i arâ igê. Ga bani vurira i berarogata na enoni, ma ngaira ka manga na nagoni na mu, ga tagarenigi tangarerua God ma na Karena Sipi. 5Ngaira ka pe girara ngavê, vi ge hagahagaparu. Ngaira ka matarotaro teha.

Na angelo gi oru

6Ma i hemuri inê kê bâsia ta angelo, i gaha kere kê i vavearo. Ngaia ki torea na taroha, i gâga hagahu, tangara na enoni tenigi na ara ni agua hato i maveta, ma tangara na ara ni raraha iata na enoni, ma tangara na enoni tenigi na ara ni tamasinga hehegitigi, ma tangara na ara ni enoni, ga bâ hehegitigi. Na tagaraha iana, ngaia ki hagarongora na ara ni enoni i maveta renia na Taroha Koro. 7Ngaia ki tamasi raha, ki vi: “Mu hanetasia God, ma kamu visia raha renia na arahanga raha iana. Suria i ngekê ki na matena tanga, i surira igê na ara ni enoni hato. Tahema mu bêtuhia ma kamu rahesia God, i bani hagavoragi na vavearo, na ano, na asi, ma na ve banga!”

8Na ruata na angelo ki ura me nogana, ma ki tamasi raha, ki vi: “Ngaira ki mameaga! Na Babilone raha ki mameaga! Ngaia ki vatera na ara ni enoni na vaini iana. Ngaia ki katora ka tonomigi na vaini ramo ni teniha era iana!”

9Na oruta na angelo ki ura me nogana, ma ki tamasi raha, ki vi: “Na ani mavê na enoni, i rahesia na marâ vasiga ma na nununa, ga bani tahea, ma ki nahunia na segesegeha igê na raena, se igê na rimana i otona, 10ngaia ki page tonomia na vaini iana God, na vaini ni mangariaganiha teha iana, ngaia ki bani karangia igê na kâkâ iana ni hagaitangiha. Na enoni hato, ga katokato vikana, ka page hatamia bâraha na mamasiaganiha renigi na gi ma na hê karekare ni sivi i maata na angelo koro ma na Karena Sipi. 11Na robona na gi, i hagamamasiagara, ki akê tare ma tare ma. Na mamasiaganiha ki gâga tare igê na tangiani ma na bungiani tangara na enoni, ga rahesia na marâ vasiga ma na nununa, ga bani tahea, ma tangara na enoni, ga bani segera renia na atana.”

12Ngaia ki vi, vi na kariana God, na enoni, ga râ surigi na ramata iana God, ma ka toto suria nga o Jesu, ki tuguhira, vi siana ka rumakaka.

13Ma i hemuri, tenia i pasina God, inê kê rongoa ta na ringena, i vi: “Gu sege so vikê: Haganega tenia i ngekê ka babarisi na enoni, ga me, matena ga obahaku henia na Araha ma ka tagara tanga!”

Na Higona Apu ki arami, ki vi: “Monari nga! Ngaira ka page vagevage, suria ngaira ka page mamaro tenigi na tagaraha raha iata. Suria ngaira ka migirâ me na meni na tagaraha koro iata.”

God ki suria na maveta

14Ma hemuri inê kê bâsia na vaha siki. Ma igê na vaha ki oga igê na ani, i bâ manga na mane. Ma igê na bêna ki oga igê na tarepuri na golo, ma na gira masi i rimana. 15Ma ta na angelo ki hura me tenia na ruma ni rotu, ma ki ngiria na ani, i oga igê na vaha, ki vi: “Gu karingenia na gira iamu, ma ko rurugi na harisi, suria i ngekê ki na matena, i mêa igê na maveta!” 16Ma na ani, i oga igê na vaha, ki karigenia na gira iana igê na maveta, ma ka rurugi na harisi iana na maveta.

17Ma hemuri inê kê bâsia nikâ ta na angelo, i hura me tenia na ruma ni rotu i pasina God, ma ngaia nogana ki têa na gira masi.

18Ma hemuri ta na angelo, i bâsuria na gi, ki râ me tenia na bea ni vogasiha. Ngaia ki ngiria na angelo, i têa na gira, i masi, ma ki vi: “Gu karigenia na gira iamu, ma ko retegi râ na guani na vaini tenigi na apinige na vaini i maveta, suria ga mata!” 19Ma ngekana na angelo ki karigenia na gira iana igê na maveta, ma ki retegi râ na guani na vaini tenigi na apinige na vaini, ma ki kasigi igê na rusi ni mangariaganiha iana God. 20Na guani na vaini ka piringigi igê na rusi i na apanena hura na hinua raha, ma na gapu ki gogo me tenia na rusi, i manga na maganuha, i râ hagatê era, ma ki kokoro ki tariha i riona na enoni.

Currently Selected:

RANGANIHA 14: KCB

Highlight

Copy

Compare