RANGANIHA 11

Na vererua garu tarohenia na tamasinga iana God

1Ga vateê na ate ni hagevoreana, i manga na vato, ma ka vi tangê, ka vi: “Gu râ, ma ku hagevorererua na ruma apuna iana God ma na bea ni vogasiha, ma ko tomanira na ani, ga rahesia i rarona na ruma apuna. 2Ma ko naka vê na mahera rihia na ruma apuna. Siana ko hagevorea, suria ga bani vatea tangara na enoni, ga pe tongesuri, na enoni, ga page puhuritagenia na Hinua Apuna surigi na hageha tangahuru ge he matara ki rua. 3Inê kê page hagatorangenirerua na ani, garu totora tamasinga iaku. Garu page hagesuru renigi na kakagani, suria ga page voravora me na bagabevoani. Ma ngairerua karu page tarohenia na tamasinga iana God surigi na tangiani ngegana: surigi na 1,260 na tangiani.”

4Na vererua, garu totora tamasinga, ngairerua ka na apinige ni olive gi rua, ma na laiti gi rua, ga ura i maana na Araha, i marungia na maveta. 5Manga ta na enoni, ma ki uhungia, vi aerasirerua, na gi ki page huhura me tenigi na haraterua, ma ki page sungira ngavê na merongaterua. Ma igê na tarana ngekana na ani mavê na enoni, i uhungia, vi aerasirerua, ngaia ki page meme. 6Ngairerua karu nahunia na ramoha, garu hagabarasigi na roto ni rangi, hanana vi siana ki rangirangi suria na matena, garu tarohenia igê na tamasinga iana God. Ngairerua karu nahunia nikâ na ramoha, hanana vi garu hagaitangia na maveta renigi na ani mavê na eraha i na ani mavê na matena, garu obania.

7Matena garu tora tamasinga hato, na marâ vasiga, i hura akê me tenia na kokoro, i so ngavê, ki page mererâheariha. Ngaia ki page teharirerua, ma ki page nahuirerua karu me. 8Ma na gahuaterua karu page tâtâ i tara igê na hinua raha, na agua, ga bani rapusia igê na Araha igê na kuruse. Na girarana na atana na hinua raha ngekana ki vi Sotomo se Esipito. 9Na enoni tenigi na ara ni agua hato i maveta, tenigi na ara ni raraha hato, tenigi na ara ni tamasinga hehegitigi, ma tenira na enoni, ga bâ hehegitigi, ka page bâbâ mavê renigi na gahuaterua surigi na tangiani hagenani gi oru ma na ritovagana, ma ka page vivi hepusi, vi siana ka bagirerua. 10Na enoni i maveta ka page manavatenirerua garu me. Ngaira ka page magoto, ma ka page mahata heri, suria na poropete gi rua ngegana karu hagamamasiaga apeta bâraha na enoni i maveta. 11I murini na tangiani hagenani gi oru ma na ritovagana God ki page raravairerua, karu mauri aporo, ma karu rêra aharaga. Ma ngaira hato, ga bâsirerua, ka page magu ngavê. 12Me muri na poropete gi rua karu rongoa na ringena, i tamasi raha tenia i pasina God, ki vi: “Muru akê me ikê!” Ma i maata na merongata ngairerua karu akê henia na vaha tanga i pasina God. 13Igê nga na matena ngekana ki na apena na baganunu raha. Na tangahuruta na hinua raha ki era ngavê, ma na rehagaro gi pi na enoni ka me renia na nunu. Ma na enoni, ga tahi, ka magu teha vê, ma ka visia raha na Araha God.

14Na ruata na eraha ki hato. Bâ, na oruta na eraha ki sugi râ me!

Na pita na ahuri

15Ma hemuri na pita na angelo ki uhia na anina na ahuri, ma na ringena i pasina God ki tamasi raha, ki vi, “I ngekê nga na Araha iaka ma na Mesaia iana karu nahunia na ramoha, hanana vi garu marungia na maveta, ma ngaia ki page marungia tare ki bê ki arâ!” 16Ma na meraha tangahuru gi rua matara ke he, ga oga igê na atohata i maana God, ka susure ka abahigi na maata, ma ka rahesia God, 17ka vi:

“Araha God, go raramohaga hunigo,

go gâga i ngekê ma ko bani goga me i nago.

Igami kami visigo koro,

renia go bani hagabângenia na raramohamu raha,

ma ko bani haganega ko araha.

18Na enoni, ga pe tongesuri, ka mangariaga ngavê,

suria i ngekê ki na matena go hagaitangira igê

ma ko surira igê na ani, ga me.

Ma nikâ ki na matena go vurira igê

na poropete, na kariamu ma na enoni hato,

na ani, ga araha, ma na ani purua,

na enoni hato, ga hanetasigo.

Ma nikâ ki na matena go hagamagahurura igê

na ani, ga erasia na maveta.”

19Na ruma apuna iana God i pasina ki tahataha, ma ka bâsia na bokesi na suruheri i rarona na ruma apuna. Ma ka vora me na marangea, na akurua, na gugusuhia, na nunu, ma na rangi raha manga na hêni na aisi.

Currently Selected:

RANGANIHA 11: KCB

Highlight

Copy

Compare