KI 91
91
God ki anumasira na kariana
1Na ani ma na enoni, i rukuruku i pasina na Araha
ma ki goga i marungana God raramohaga hunia,
ngaia ki ape tatara.
2Ngaia ki girara i vi tanga God, ki vivi:
“Igo ki na tahingaku, go anumasiê.
Igo ki na God iaku,
gê hagêguri togo renigo.”
3Ngaia ki page hagatahigo,
manga na manu tenia na basu,
ma tenigi nikâ na mera na ringa.
4Ngaia ki page marupego, manga na kua,
i abahira na kere karena.
Igo ko page ape tatara i pasina,
mangara na kere kua,
ga rukuruku i bebena kenata.
Na totohesuringa iana ki page anumasigo,
manga na bêata, i hagatarahi ora.
5I asa, vigu magutenira na ataro igê na bungiani,
se na ani ma na eraha, i hagagasuganira na enoni
igê na tangiani.
6I asa, vigu magutenigi na ringa ma na mera,
ga gamorahira na enoni surigi na bungiani,
se na eraha, i nahuira surigi na tangiani.
7Naka ma ga meme rako ngavê na enoni rihigo,
naka ma vi na rehagaro ma na rehagaro,
ma igo, ki asa hagetage, vigu mamari.
8Renigi na maamu maremu igo ko page rigia na Araha,
i hagaitangira ngavê na enoni era.
9Igo ko bani atea God na Araha, i teha,
hanana i anumasigo ma ki têtê surigo.
10Tahema na eraha ki asa, vige tarahugo,
se na bagabevoani, vige tarahua na hinua iamu.
11God ki page nakara na angero iana, ka bâbâsurigo,#Mt 4.6; Lk 4.10
ma ka anumasigo igê na ara ni agua, go arâ igê.
12Ngaira ka page têgo akê,#Mt 4.6; Lk 4.11
hanana siana ko tapasu.
13Igo ko page purira so na ma ma na o vasiga,#Lk 10.19
na o ramo ma na ma garagara hunu.
14God ki vi: “Inê be hagatahira na enoni, ga takuiê.
Inê be anumasira na ani, ga visiê,
vi inê ki na Araha iata.
15Inê be aganarira, matena ga avarasiê.
Inê be tamanira igê na mamasiaganiha iata,
ma be hagatahira ma be kasira akê aporo.
16Inê be vatera ke mauri arihu,
ma be hagatahira.”
Currently Selected:
KI 91: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
