KI 90
90
NA HETA BA BUKA
(KI 90—106)
Na maurihana na enoni#Na nunginungi iana o Moise na kariana God.
1Haganega me tenia i nago kere vê noga
igo ko marupegami tare.
2Hagenago tarani na hungani ma na maveta, go hagavoragi,
igo ko God ma ko bani goga
ma ko page God tare, mareha ki hatohato.
3Igo ko katora na enoni, ka vora aporo
renia na marâ, ga vora tenia,
ma ko horora, ka vora aporo renia na mako.
4Tangago igo na rehagaro na harisi#2 P 3.8.
ka manga na tangiana gi tage togo.
Ngaigi ki manga i na nora, i bani hato,
se manga na kere matena igê na bungiana.
5Igo ko hagamagahurugami
manga na maganuha i toregami.
Igami kami manga na maruteha,
i hata ni magahuru.
Igami kami mangagi na rauga purua,
ga baugo igê na maveraro.
6Ngaigi ki akê ma ki takataka.
Ngaigi ki maugu ma ki meme i manurahi.
7Na mangariaganiha iamu ki erasigami bâraha.
Igo ko hagamagusigami ngavê renigi na hagaitangiha.
8Igo ko takusigi na parongamami era.
Igo ko nakagi mave na tasi pinihi iamami.
9Na mangariaganiha iamu ki hagabubugi na maurihamami.
Ngaigi ki magahuru manga na kere manavasua.
10Na tangahuru gi pi ma na harisi, kami mauri surigi,
se na tangahuru ge varu na harisi,
manga mi ramoramo.
Ma surigi na harisi ngegana ka tarahugami ma igê
na anumanumaha na ma mamasiaganiha.
Na maurihamami ki hata ni hatohato,
ma igami kami magahuru.
11Ti ki aitangisia hagenani na mangariaganiha iamu?
Ti ki girara hagenani na maguha
tenia na managariaganiha raha iamu?
12Vikê, gu hagesurigami
renia na abubuhana na mêrihamami,
hanana mi otooto surigami maremami.
13I na keta ki page hato igê na mangariaganiha iamu?
Araha, gu takuigami, na kariamu.
14Gu katoa na takuiha tarema iamu ke angarigami
igê na ara ni maveraro.
Vikê igami kami kiki ma kami vagevage tare
surigi na mêrihamami hagenani.
15Igo ko bani hagarugu obamami surigi na harisi rako,
mi oga surigi igê na mamasiaganiha.
I ngekê gu hagakoro obamami
surigi na harisi, ga tagenani henigi.
16Gu hagabâsigami, na kariamu, renigi na mena iamu.
Gu hagabâsira na karemami renia na raramohamu raha.
17God Araha iamami, gu korokoro tangagami.
Gu katogami, gami tavoraha bâkoro
igê na ara ni marâ hato, mi katogi.
Currently Selected:
KI 90: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
