KI 89
89
God ki hagamonarigi tare na suruha iana#Na vivita iana o Etane ni Eseraga. #
1Araha, inê be kiria tare na takuiha tarema iamu,
ma be tarohenigo tare,
vi go hagamonarigi tare na suruha iamu.
2Inê kê bani girara, vi na takuiha iamu
ki page goga tare, ki bê ki arâ.
Inê kê bani girara, vi na totosuriha iamu
ki page oga tare, manga na vavearo.
3Igo ko bani surua tanga o Tavite, ko vi nga:
“Inê kê atego ko kariaku,
migerua karu suruheri.
4Inê kê tohe, vi tâ i tâ na raraha iamu,#2 S 7.12-16; 1 Ch 17.11-14; Ps 132.11; Ac 2.30
ma na arahanga iamu ki asa, vige page hato.”
5Na vavearo ki hagabângenigi na mena iamu.
Na ani, ga tê viteamu, Araha,
ka kiria na totosuriha iamu.
6I vavearo ki mareha na ani, vige maratoramu.
Mareha na ani i pasimu, vige maratoramu, Araha.
7Na kaunselo iata na angero ka magutenigo.
Ngaira ka ura rihigo ma ka haneava renigo.
8Araha God raramohaga hunigo!
Ti ki raramohaga manga igo, Araha?
Igo ko hagamonarigi tare na tamasinga iamu.
9Igo ko araha tanga na asi ramo,
ma ko hagapiovagi na asi aputaputa.
10Igo ko bani botagia na bêna na Ragaba,
ma na ega raha ni eraha ngekê ki meme.
Igo ko bani tokorenira na merongamu
renia na raramohamu raha.
11Na vavearo ma na ano ka na animu.
Igo ko bani hagavorara na maveta
ma na ara ni marâ hato igê.
12Igo ko bani hagavoragi i kerekê ma i kereso.
Na hungani i Tabore mi Heremone
karu hagabângenia na raramohamu raha.
13Igo ko raramohaga teha ngavê!
I teha ngavê nikâ na raramohamu!
14Na ramata ma na otoha ka na hunana na arahanga iamu.
Na tauhamu ka hagabângenigi na takuiha ma na monariha.
15Ga babarisi na enoni, ga rahesigo ma ka kirigo.
Igo ko mavesigi na obata,
ma ngaira ka vagevagesia na korohamu.
16Igo ko hagakoro obata i na ara ni tangiani.
Ma ngaira ka hagarahasigo
renigi na korohamu ma na otohamu.
17Igami kami ageage renigo,
suria go hagaramonigami.
Igami kami teha,
suria go takuigami.
18Igo, Araha, ko anumasigami manga na bêata iamami.
Igo, God, ga rahesigo na Isiraelita,
igo ko bani vategami na maneraha iamami.
Na suruha iana God tanga o Tavite
19I nago kere vê noga renia na maruteha
igo ko tamasi tanga na kariamu, i toto surigo.
Igo ko vi: “Inê kê tamania ta na mane ni hearihatana,
i rongo raha na atana.
Inê kê atea i berarogata na enoni,
ma kê kasia ki maneraha.
20Inê kê kasia o Tavite na kariaku, ki maneraha,#1 S 13.14; Ac 13.22; 1 S 16.12
suria gê monea renia na oile apuna.
21Inê be tamania nga, ki bê ki arâ.
Na raramohaku nikâ ki hagaramonia.
22Ki asa iata na merongana, vige page teharia.
Ki asa na enoni era, vige page hagavotaria.
23Inê be metametarira na merongana.
Inê be nahu hunuira na enoni hato, ga kitenia.
24Inê be takuia tare,
ma be hagamonarigi na suruha iaku tanga,
ma be katoa, ke tehateha tare.
25Inê be hagaraha na arahanga iana,
hanana i marungigi na asi ma na ve raha.
26Ngaia ki page vi tangê, ki vivi:
‘Igo ki na vaemaku ma God iaku.
Igo ko anumasiê ma ko hagatahiê.’
27Inê be visia, vi na bêbê ni kare iaku,#Rev 1.5
i raha teharira na maneraha getera hato.
28Inê be takuia tare, ki bê ki arâ,
ma be hagamonaria na suruheri iaku henia.
29Na raraha iana ki page nganganihaga manga na vavearo,
ma na arahanga iana ki asa, vige page hato.
30Ma manga na raraha iana ka haritohegi na ramata iaku
ma ka pe arâ surigi na viteaku,
inê be hagaitangira renigi na tasi iata.
31Manga ngaira, ma ka kasigi vê na hagesuringa iaku
ma ka pe marupegi na tauhaku, gê vatera,
32inê be hagamamasiagara renigi na ginota era.
33Naka ma, ma inê be takuia nga o Tavite,
ma be hagamonaria na suruha iaku tanga.
34I asa be aharêngia na suruheri iaku henia,
se vi ve hagaparu
renia na ani gi tage na suruha iaku tanga.
35Na tohenga iaku ka tâ ga tâ tare.
I asa hagetage, be hagaparua o Tavite.
36Na raraha iana ka goga tare, ki bê ki arâ,
mataro me ki meme na arito.
37Na arahanga iana ki page oga tare manga na hageha,
i hagaotogi bâkoro na marâ tangara na enoni.”
Na hagagegeha renia na maneraha i vota
38Ma igo ko mangariaga tanga na maneraha, go bani atea.
Igo ko bani pania ma ko bani kasi renia.
39Igo ko pe hagamonaria
na suruheri iamu henia na kariamu.
Igo ko bani tavoa na arahanga tenia.
40Igo ko bani hogegi na para na hinua raha iana.
Ma na ruma nganganihaga ka tâ so i ano.
41Na enoni hato, ka heraonge,
ka hanagogi na nahuninga iana.
Na enoni hato i na marê hagarangia ka rurusia.
42Igo ko bani katora na merongana, ka teha,
ma ko hagakoro obata.
43Igo ko bani katogi na tarure iana, ka pe aresuria,
ma ngaia ki pe teha igê na hearihatana.
44Igo ko bani hatungia na arahanga tenia,
ma ko kasia hura tenia, vige maneraha.
45Igo ko bani katoa, ki gemêa buna,
ma ko hagamakia bâraha.
Na nunginungi ni tahinga
46Araha, go page murisigegami tare vari?
I arihu manga i he na gi na mangariaganiha iamu?
47Igo ko bani girara na mêrihana na enoni ki abubu.
Gu takusia, igo ko bani hagavoragami
tanga mi meme!
48O ti ki mauri tare, mareha vige meme?
Ti ki girara i hagatahia marena tenia na matahu?
49Araha, igo ko pe takuigami vari manga i nago?
Igo ko pe hagamonarigi vari
na suruha iamu tanga o Tavite?
50Gu takusira na enoni ahuroto.
Ngaira ka guharia na kariamu
ma ka hagamamasiaga apeku.
51Araha, na merongamu ka tamasi erasia na maneraha.
Ngaira ka guharia na ani go bani atea
i na ara ni agua, i arâ igê.
52Mu visia raha tare na Araha!
Monari! Monari!
Currently Selected:
KI 89: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
