KI 74
74
Na kariana God ka avarasia tenira na merongata#Na vivita iana o Asapa.
1God, tanu hega ko kasi renigami tare?
Igo ko mangariaga tare vari tangara na kariamu?
2Gu takusira na kariamu,
go bani atera me i nago kere vê noga.
Igo ko bani torera hura tenia na agua ni mamasiaganiha,
hanana ga voravora mangara na raraha iamu.
Gu takusia na hungana i Sione,
ma na agua, go bani oga igê i nago.
3Gu râ ku bâsigi na ruma, ga tâ i ano hagetage.
Na merongamami ka bani hagaerasigi ngavê
na ara ni marâ hato i Ruma ni Rotu.
4Na merongamu ka ngerengere i Ruma ni Rotu iamu,
suria ga teharira na kariamu.
I ngekana ngaira ka hagêrasigi na girarani,
vi ngaira ka teha.
5Ngaira ka katokato mangara na mane ni tapiha,
ga tapigi na apinige renigi na akesi.
6Ngaira ka tahe kumukumugigi na bari
renigi na akesi ma na tahuru iata.
7Ngaira ka kumukumugia na Ruma ni Rotu iamu,
ma ka sungia ma ka tê erasia na agua apuna,
na enoni ga rahesigo igê.
8Ngaira ka obania, viga hatungigami hagetage.
Ngaira ka sungigi na ara ni agua ni vogasiha
igê na agua hagenani.
9Na marâ apuna hato ni rotu iamami ka bani nahuraugi.
Ka mareha ngavê na poropete i pasimami.
I arihu manga i he, ka page gâga surigi na tarani ngegê?
Mareha ta na hitangimami, vige girara.
10God, i arihu manga i he, ka rurusigo na merongamu?
Ngaira ka page tamasi erasigo tare vari?
11Renia ta ko pe tamanigami?
Renia ta ko pe gagêmaga renigami?
12God, igo ko bani Araha iamami,
haganega me tenia i nago kere vê noga,
ma ko bani hagatahigami me noga hagarako.
13Renia na raramohamu raha igo ko voasia na asi,#Ex 14.21
ma ko menamenarigi na bêta na hua raha.
14Igo ko rumurumugia na bêna Leviatane, na ega raha,#Job 41.1; Ps 104.26; Is 27.1
ma ko hagangêra na pageva renia na apena.
15Igo ko katogi, ka gogogo na ve banga ma na ve sisite,
ma ko hagamamatagi na ve raha.
16Na tangiani ma na bungiani ka na animu.
Igo ko nakagi na arito, ma na hageha ma na higu
igê na atohani.
17Igo ko nakagi na akerena ma na bogona na maveta,
ma ko hagavoragi na mateni na parenga
ma na rogaroga ahuru.
18Araha, siana ko bonotenia,
vi na merongamu ka rurusigo,
ma ka ruhigo ma ka pe tê viteamu.
19Siana ko panira na kariamu makumakusiga
tangara na merongata, ga hagamamasiagara.
Siana ko naka ma vê na kuvê iamu tanga na tehe.
Gu takusira na kariamu,
ga oga igê na mamasiaganiha.
20Gu takusia na suruheri, go bani naka henigami.
Na mamasiaganiha ki râhia na agua hagenani.
21Siana ka maki na enoni, ga oga igê na mamasiaganiha.
Gu katora, ke hagarahasigo aporo na enoni,
ga matareha ma ka baguru.
22God, gu gagêmaga ma ku suraga.
Bâ, na enoni, ga pe tê viteamu,
ka rurusigo tare i na ara ni tangiani.
23Bâsira na merongamu ka hagaramo.
Ngaira ka puhara ma ka ngerengere tare.
Currently Selected:
KI 74: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
