KI 73
73
NA ORUTA NA BUKA
(KI 73—89)
Na otohana God#Na ki iana o Asapa.
1I monari, God ki koro tangara na kariana,
tangara na ani ga matarotaro maninga i maana.
2Ma tangê inê, inê kê sugi tapasu,
ma kê sugi atobera.
3Renia inê kê hengarira na ani ga paroparo,
matena gê bâsigi, ga tavoraha maninga na marâ
tangara na enoni, ga erataga.
4Ngaira ka pe hatamigi na mamasiaganiha.
Ngaira ka apekoro ma ka bâ raramohaga.
5Ngaira ka pe anumanuma mangara na enoni getera.
Ga pe tarahura na bagabevoani mangara na enoni getera.
6Ngaira ka mahe renia na paroha,
manga vi ngaia ki na rêni iata.
Ngaira ka hagamamasiagara na enoni.
Na tarana ngekê ki manga na tuguni iata.
7Na eraha ka huhura me tenigi na obata,
ma na katoha era ka huhura me tenigi na aitangihata.
8Ngaira ka rurusira na enoni getera, ma ka tamasi era.
Ngaira ka paroparo ma ka katokato,
hanana viga hagamamasiaga apeta na enoni getera.
9Ngaira ka tamasi erasia God na Araha,
ma ka rahasira ma ka hagamakukura na enoni.
10Vikê tani na kariana God ka aharo surira,
ma ka magesigi na tamasinga iata.
11Ngaira ka vi: “God ki hite.
Na Araha raha teha ki bono na bêna.”
12Na enoni era ka manga ngegana.
Ngaira ka pe gagêmaga renia ta na marâ,
ma ka ama ni ruruguha nga tare.
13Manga gê matarotaro, ki hega?
Gê pe nahunia vari ta na marâ?
Manga gê pe tasitasi, ki hega?
Gê pe nahunia vari ta na marâ?
14God, inê kê hatamigi na mamasiaga i na ara ni tangiani.
I na ara ni mavoraro ka tarahuê na hagaitangiha.
15God, manga inê, ma be tamasi mangara ngaira,
inê ki asa, ve kato,
manga vi inê ta na kariamu.
16Inê kê uhungia, vi ve aramia na hagatenga iaku,
ma ki bara ngavê tangê.
17Vikê inê kê banu i Ruma ni Rotu iamu,
ma kê kahu girara
na ta ki page tarahura na enoni era.
18God, igo ko page katora, ka arâ igê na tara, ga matari,
ma ko hagavotarira, ka meme.
19Ngaira ka gasuga ni me hagetage.
Na hatongina tangara ki era ngavê.
20Ngaira ka manga na maruteha,
i magahuru râ, matena ga riterite.
Matena go aharaga, Araha,
ngaira ka magahuru hagetage.
21Matena i era na obaku ma ki hata era,
22inê kê hite manga na bo.
Inê kê pe hagarego.
23Naka ma i manga ngekana,
ma inê kê pe panigo, ma igo ko uruê.
24Igo ko hagaotoê renia na hagesuringa iamu.
Ma i hemuri me igo ko page uniê banu i pasimu,
ma ko page hagarahasiê.
25Na ta kê obania nikâ i pasimu?
Igo ma God.
Na ta kê obania nikâ i maveta?
Igo getego ma Araha.
26Vari inê kê page pe takotako maninga,
ma ki pe ramoramo na apeku.
Ma God nga ki hagaramoniê.
Ngaia getea ma kê obania.
27Na enoni, ga panigo, ka page meme nga.
Igo ko page erasira ngavê na enoni,
ga pe tê viteamu.
28Ma tangê inê, ki koro era tangê,
inê kê pe arisigo.
Araha God, inê kê rukuruku i pasimu,
hanana go anumasiê,
ma inê be tarohenigi na korohamu hato tangê.
Currently Selected:
KI 73: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
