KI 33
33
Visia raha God i hagavorara na marâ hato
1Igamu hato na enoni koro
mu vagevagesia na Araha.
Igamu hato na enoni, mu tê viteana,
mu visia raha renigi na mahatanga iana.
2Mu visia raha na Araha,
matena mu kiria henigi na ukelele.
Igamu kamu kiria
henigi na gita na varo tangahuru.
3Mu kiria na ki haoru tanga.
Mu tarugigi bâkoro na gita
ma kamu ngerengere.
4Na tamasinga iana na Araha ka monari.
Ngaia ki hagamonarigi renigi na tagaraha iana.
5Na Araha ki takuigi na marâ, ga koro ma ka oto.
Ma na maveta ki hagabângenia,
vi na Araha ki takuigia tare ma tarema.
6I tamasi ma na Araha,
ma na vavearo ki vora me.
I tamasi ma na Araha,
ma ka vora me na arito, na hageha ma na higu.
7Ngaia ki nakagi haku na asi hato
igê na agua gi tage
manga igê na maraguhu raha.
Ngaia ki nakagi na rutuni na asi aberabera
igê na atohani.
8Igamu hato mu mauri i maveta hagenani,
mu hagahigasia na Araha.
Igamu hato na enoni i maveta,
mu hanetasia.
9Suria na maveta ma na marâ hato ka vora me
renigi na tamasinga iana.
10Na Araha ki hagabarasigi na katoha iata na enoni,
ga pe tongesuria.
Ngaia ki urapusira na enoni era,
ka pe katogi na katoha iata.
11Ma na katoha ma na takoha iana
ka goga hete tare ma tarema.
12Ga babarisi na enoni,
na God iata ki na Araha.
Ga babarisi na enoni,
God ki bani atera tanga ngaia marena.
13Na Araha tenia i pasina
ngaia ki hahutugira so na enoni hato.
14Tenia na atohana ngaia ki bâsira vato
na enoni hato, ga goga i maveta.
15Ngaia ki katogi na parongata hato,
ma ki giraragi na ara ni tauhata hato.
16Na maneraha ki tahitahi,
mareha vi suria ga rako teha na mane ni me iana.
Na mane ni me ki tahitahi,
mareha vi suria na raramohana raha marena.
17Na hosi ni hearihatana ki asa iata,
vige katora na enoni, ke tehateha.
Na raramohata raha na hosi ni me ki asa,
vige hagatahira na mane ni me.
18Na Araha ki bâsurira na enoni,
ga hanetasia.
Ngaia ki marupera na enoni,
ga hagêguri togo renia na takuiha iana,
i goga tare ma tarema.
19Ngaia ki hagatahira tenia na mera,
ma ki hagangêra igê na mateni ni magêha.
20Igia ka raruni togo renia na Araha.
Ngaia ki anumasigia ma ki tamanigia.
21Igia ka obakoro renia,
ma ka hagêguri togo renia God raramohaga hunia.
22Igami kami nungigo, Araha,
ko takuigami tare,
suria mi hagêguri togo renigo.
Currently Selected:
KI 33: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
