KI 32
32
God ki bonotenigi na tasi iana na enoni i angitenigi#Na vivita iana o Tavite.
1Ga babarisi na enoni,#Ro 4.7-8
God ki bonotenigi na tasi iata
ma na parongata era.
2Ga babarisi na enoni,
na Araha ki visira, viga matarotaro,
ma ki mareha na hagaparunga i pasita.
3Matena gê pe angitenigi na tasi iaku,
inê ki mangusi na apeku,
suria gê gegege igê na tangiani hagenani.
4Igo ko hagaitangiê, Araha,
igê na tangiani ma na bungiani.
Ki meme bâraha na apeku,
manga vi sinariê bâraha na arito.
5Minê kê visigi mataha na tasi iaku tangago, Araha,
ma inê kê pe pinihigi na ginoku era.
Inê kê vi i obaku, kê ki: “Araha,
inê be hagarongogo renigi na tasi iaku.”
Ma igo ko bonotenigi
na parongaku era hato.
6Tahema i tuguhira na enoni, ga tê viteamu,
viga avarasigo igê na mamasiaganiha iata.
Naka ma na eraha ki manga na maganuha raha,
i asa, vige tarahura.
7Inê kê ahi ma kê tahi i pasimu.
Igo ko anumasiê tenigi na bagabevoani.
Inê kê ngere raha renigo, na tahingaku,
suria igo ko anumasiê.
8Na Araha ki vi: “Inê be hagesurigo
renia na tara, i tuguhigo.
Inê be hagaotogo,
ma be bêngenigo.
9Siana ko bagatatako manga na hosi se na tonki.
Na enoni ka hagaotora renigi na varo i harata,
hanana vige têtê viteata.”
10Na enoni era ka page hatamigi na mamasiaganiha.
Ma na Araha ki anumasira ma ki takuira tare
na enoni, ga raruni togo renia.
11Igamu na enoni koro ma oto,
mu vagevagesia na Araha,
ma kamu obakoro.
Igamu na enoni, mu tê viteana na Araha,
mu vagevage ma kamu ngerengere
renia na korohana.
Currently Selected:
KI 32: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
