KI 31
31
Raruni togo renia na Araha#Na ki iana o Tavite.
1Inê kê gavagava vê i pasimu, Araha,
hanana go anumasiê.
Gu hagatahiê igê na otohamu.
I era ma kê hagêguri baranga renigo,
ma kê maki renia.
2Gu karingê ma ku hagatahiê nga!
Gu hagaramoniê ma ku marungiê.
Gu manga na ruma nganganihaga tangê,
gê tahitahi igê.
3I monari, igo ki na ruma nganganihaga iaku.
Inê kê gava vê i pasimu,
ma ko anumasiê.
U hagaotoê ma ku bêngeniê,
manga go bani surua tangê.
4Gu anumasiê tenia na tu pinihi tangê,
suria igo ki na marungaku.
5Inê kê hagêgurigo, ko marupeê.#Lk 23.46
Igo ko page hagatahiê, Araha God,
suria igo ki na monariha.
6Igo ko kitenira na enoni, ga hagarapera na ataro,
ma inê nga kê raruni togo renigo.
7Inê be vagevage ma be obakoro,
suria igo ko takuiê tare.
Igo ko bani hagamahê igê na mamasiaganiha iaku,
ma na matena ga tarahuê na bagabevoani,
igo ko bani tamaniê.
8Igo ko bani urapusira na merongaku
hanana siana ka hagatotongoê.
Renia na takuiha iamu tangê
inê kê asitatara.
9Gu takuiê, Araha,
suria inê kê anumanuma.
Ka mamanu na maaku,
suria gê angi bâraha,
ma ki meme ngavê na apeku.
10Na mamasiaganiha ki nahuiê,
ma na angiha ki hagabubua na mêrihaku.
Inê kê peramo,
ma ka mangusi ngavê na suriku,
suria ga tarahuê na eraha.
11Na merongaku hato ka hagakokohara tangê,
ma na enoni i pasiku ka sikasika teniê.
Na enoni, ga girarê, ka maguteniê,
ma na matena ga tarahuê i tara,
ngaira ka gavagava teniê.
12Na enoni ka tako hagamarehasiê,
manga vi inê kê bani me noga.
Inê kê manga na apira, i abota,
ga kasia i bê ni roro.
13Inê kê rongora na merongaku rako ga hahanata.
Ma na maguha ki nahuiê.
Ngaira ka harikato reniê
viga nahuiê kê meme.
14Ma inê kê raruni togo renigo, Araha.
Igo ki na God iaku.
15Igo ko marupeê tare.
Gu hagatahiê tenira na merongaku,
tenira na ani ga merongasiê.
16Gu korokoro tangê, na kariamu,
ma ku hagatahiê,
suria go takuiê tare.
17Inê kê avarasigo, Araha.
I era ma, kê avaravara baranga,
ma kê maki renia.
Gu hagamakira na enoni, ga era.
Gu hagababera ma ku hagamesira.
18Gu hagamunira na enoni ni hagaparunga
ma na ani ga paroparo.
Suria ngaira ka guharira na enoni koro,
ma ka purira so i ano.
19Ga raha ma ka koro teha na mahatanga iamu
tangara na enoni, ga hagahigasigo.
Ngaira hato ka girarago, go koro teha,
ma ko anumasira maninga na enoni,
ga hagêguri togo renigo.
20Igo ko bâsurira i pasimu
ma ko pinihira
tenigi na katoha iata na merongata.
Igê na marungamu igo ko anumasira
tenigi na katoha iata na merongata.
21Ka visia raha na Araha!
Ngaia ki takuiê bâraha tare,
matena na merongaku ka rihiê ma ka tahariê.
22Inê kê magu, ma kê vi ma i obaku,
vi ngaia ki bani kasi reniê.
Ma ngaia ki aganaria hete
na avarasiha iaku.
23Mu takuia na Araha,
igamu na kariana mu toto suria.
Na Araha ki marungira na enoni,
ga koro ma oto i maana.
Ma ngaia ki hagaitangira maninga na enoni,
ga hagarahasira mareta.
24Mu ramoramo ma kamu nganganihaga,
igamu hato na enoni mu naasia na Araha.
Currently Selected:
KI 31: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
