KI 25
25
Na nunginungi igê na matena ni mamasiaganiha#Na ki iana o Tavite.
1Inê kê avarasigo, Araha God iaku,
2suria gê raruni togo renigo.
Siana kê raruni baguru.
Siana na merongaku ka vagevage,
renia ga tehariê.
3Suria i asa na enoni, i raruni togo renigo,
vige raruni baguru.
Ma ka raruni baguru hete
na enoni era, ga urapusigo.
4Araha, gu hagesuriê renigi na obaniha iamu,
ma ku hagagirarê renigi na tara iamu.
5Gu bêngeniê igê na monariha iamu,
ma ku hagesuriê renia.
Suria igo ki na God iaku,
go hagatahiê,
ma inê kê raruni togo renigo tare.
6Gu takusigi aporo, Araha,
na korohamu ma na takuiha iamu,
ga goga tare ma tarema.
Igo ko bani hagabângenigi me
tenia i nago kere vê noga.
7Gu bonotenigi na tasi iaku ma na parongaku era,
matena gê karekare mênga.
Gu takusiê aporo, Araha,
suria na korohamu ma na takuiha iamu,
ka goga tare ma tarema.
8Suria na Araha ki koro ma oto,
ngaia ki hagaotora na enoni, ga tasi.
9Ngaia ki bêngenira igê na otoha
na enoni, ga haritagi,
ma ki hagesurira renigi na obaniha iana.
10Na tauhana na Araha ka hagabângenia,
vi ngaia ki takuira tare ma ki toto surira na enoni,
ga marupegi na suruheri ma na ramata iana.
11Araha, gu hagamonaria na suruha iamu
ma ku bonotenigi na tasi rako iaku.
12Na Araha ki hagesurira na enoni, ga tê viteana,
renia na tarana, i tuguhira.
13Ngaira ka page mauri koro tare,
ma na kareta ka page nahunia na agua na suruha.
14Na Araha ki mamahata tangara na enoni,
ga tê viteana.
Ngaia ki hagagirarara
renia na suruheri iana.
15Inê kê raruni togo tare renia na Araha,
vi ruhasiê tenia na tu,
ma ki tamaniê.
16Gu ahariê, Araha, ma ku takuiê,
suria i marehasiê na tamaku koro,
ma kê anumanuma.
17Gu toregi vê teniê na takoha raha iaku,
ma ku hagatahiê tenigi na anumanumaha iaku.
18Gu bâsigi na anumanumaha ma na mamasiaganiha iaku,
ma ku bonotenigi na tasi hato iaku.
19Gu bâ! Ga rako na merongaku!
Bâ! Ngaira ka kiteniê bâraha!
20Gu anumasiê ma ku hagatahiê.
Siana kê raruni baguru,
suria gê gavagava vê i pasimu.
21Gu vateê, be matarotaro ma be oto tare,
hanana siana gê tasitasi,
suria gê raruni togo renigo.
22God, gu hagatahira na kariamu, na Isiraelita,
tenigi na ara ni bagabevoani hato.
Currently Selected:
KI 25: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
