KI 18
18
Visia raha God#Na ki iana o Tavite, na kariana na Araha. Ngaia ki kiria na ki ngekê tanga na Araha, matena na Araha ki hagatahia tenira na merongana hato, ma tenia o Saulo nikâ.
(2 Samuele 22.1-51)
1Inê kê takuigo bâraha, Araha,
suria go hagaramoniê, ma ko anumasiê.
2Na Araha ki na hagêguringa iaku,
i manga na ruma nganganihaga ngavê.
Na Araha ki na hagêguringa iaku.
Inê kê gavagava vê i pasina.
Ngaia ki na bêata iaku ma ki anumasiê;
na ruma nganganihaga, gê tahitahi igê.
3Inê kê avarasia na Araha,
ma ngaia ki hagatahiê tenira na merongaku.
Ka visia raha na Araha!
4Inê kê haga ni tu igê na varo na mera.
Inê kê manga na enoni
na maganuha ki sugi ogo henia.
5Na mera ki haga ni toreê,
ma kê aporo i na kiru.
6Na matena ga tarahuê na bagabevoani,
inê kê avarasia na Araha:
inê kê avarasia na God iaku.
7Ki nunu raha,
ma ki angingi na maveta.
Na hungani ka gisigisi ma ka maopa,
suria God ki mangariaga ngavê.
8Na robona na gi ki hura me i barisuna,
ma ka hura me i harana na bagavavatani raha na gi
ma na hê karekare ni sivi.
9Ngaia ki tangahia na vavearo,
ma ki so me igê na vaha na roto.
10Ngaia ki tage igê na marâ, i tonga na gagahana,
ma ki gaha.
Ngaia ki gaha me garigari
renigi na gagahani na roga.
11Ngaia ki aruha marena renia na roto hono.
Na roto ni rangi ka rihia.
12Na rangi na hê ma na hê karekare ni sivi
ka hura me tenia na marangea i maana,
ma ka vota tenigi na roto ni rangi.
13Na Araha ki katoa na akurua i vavearo:
na ringena na Araha God raramohaga hunia.
14Ngaia ki hanatenigi na mage,
ma ki tokorenira na merongana.
Ngaia ki hanasira renigi na marangea,
ma ngaira ka gava sirasira.
15Na asi ki mamata
tenigi na gatani na maveta.
Suria igo, Araha, ko ramonira na merongamu,
ma ko tamasi raha ni mangariaganiha tangara.
16Na Araha ki maroro so me ki tauê,
ma ki okeê akê tenigi na rutuni.
17Ngaia ki hagatahiê
tenia na raramohata na merongaku.
Ngaia ki hagatahiê tenira na ani, ga ruhiê.
Ngaira hato ka ramo tehariê.
18Matena gê pe ramo, ngaira ka tehariê,
ma na Araha ki hagaramoniê.
19Ngaia ki tamaniê, kê tahitahi,
suria i koro na obana reniê.
20Na Araha ki vuriê igê na tarana ngekê,
suria gê koro ma oto i maana.
Ngaia ki korokoro tangê ma ki tamaniê,
suria gê pe tanua ta na marâ, i era.
21Inê kê bani râ surigi me na ramata iana na Araha,
ma kê pe murisigea na God iaku.
22Inê kê marupegi tare na ramata hato iana,
ma ki asa iaku, ve aharê igê.
23Ngaia ki girara, vigê matarotaro i maana,
ma kê pe tanua ta na marâ, i era.
24Tahema na Araha ki vuriê,
suria gê matarotaro,
ma kê koro ma oto i maana.
25Araha, igo ko toto surira na enoni,
ga toto surigo.
Igo ko korokoro tangara na ani,
ga koro ma ka oto i maamu.
26Igo ko takuira na enoni,
ga matarotaro i maamu.
Ma igo ko merongasira na ani,
ga hagahagaparu.
27Igo ko hagatahira na enoni, ga haritagi,
ma ko hagamakira na ani, ga paroparo.
28Igo, Araha, ko mavesia na obaku.
Igo, God, ko mavesiê igê na roto.
29Renia na hetamaniha iamu
inê kê girara, gê teharira
na rehagaro na mane ni me.
Manga igo, God, ma ko tamaniê,
inê kê girara, gê teharigi
na raramohata na merongaku.
30Na God ngekê ki koro teha
igê na ara ni parongana hato.
Na Araha ki hagamonarigi tare
na suruha iana.
Ngaia ki na bêata tangara na enoni hatohato,
ga gavagava râ i pasina.
31Ngaia getea ma na Araha ngaia ki God.
Ngaia getea ma God
ngaia ki anumasigami.
32Ngaia nga ki na God, i hagaramoniê,
ma ki bêngeniê i tara.
33Ngaia ki katoê, kê gaha rêrê manga na mage.#Hb 3.19.
Ngaia ki uruê igê na barani.
34Ngaia ki hagesuriê renia na henahunahu,
ma kê girara gê rohea na epage ni me.
35Igo, Araha, ko anumasiê manga na bêata,
ma ko hagatahiê.
Na otomu ki tamaniê,
ma na raramohamu ki hagaramoniê.
36Igo ko hagabarasira na merongaku
ga henahu rauê,
ma inê kê pe ato bera.
37Inê kê tavogenira na merongaku,
ma kê henahuraura ngaira.
Inê kê pe aporo me tenia na henahuita,
mataro me kê nahuira ngavê.
38Inê kê ahurara ka vota ka meme,
ma kê purira so i ano.
39Igo ko hagaramoniê tanga na henahuita,
ma ko katoê, kê teharira na merongaku.
40Igo ko katora na merongaku, ka gavagava teniê,
ma ko nahuira ngavê na ani, ga ruhiê.
41Ngaira ka avaravara,
ma ki asa, vige tahi.
Ngaira ka avarasia na Araha,
ma ngaia ki pe botage renira.
42Inê kê nahu menamenarira,
ka mangagi na momo, i toregi na roga.
Inê kê purira so i ano,
manga na makomako i tara.
43Igo ko hagatahiê tenira na ani, ga urapusiê,
ma ko katoê, kê marungira na enoni i maveta.
Na enoni, gê pe bani girarara i nago,
ka oga i ruguhaku i ngekê.
44Na enoni mahuara ka maguteniê,
ma ka bêtu tangê.
Pusina ma ga girarê,
ma ngaira ka tê viteaku.
45Na enoni mahuara ka bagahagêguri,
ka magu ma ka tata,
ma ka hura me tenigi na ruma nganganihaga iata.
46Na Araha ki mauri tare!
Mu visia raha,
suria i anumasiê tare.
Mu kasia akê God raramohaga hunia,
suria ngaia ki hagatahiê.
47Ngaia ki katoê, kê teharira na merongaku,
ma kê marungira na enoni hato i maveta.
48Igo, Araha, ko hagatahiê tenira na merongaku,
ma ko nakara i marungaku
na enoni, ga urapusiê.
Igo ko anumasiê tenira na enoni,
ga oga sutaga.
49Tahema, Araha, inê be kasigo akê#Ro 15.9.
i maata na enoni hato i maveta,
ma be kirigo, be visigo raha.
50God ki katoa, ki tehateha na ani,
i bani kasia, ki maneraha urusina.
Ngaia ki ama ni takuia tare nga
na ani i bani atea.
Ngaia ki takuira tare, ki bê ki arâ,
o Tavite ma na raraha iana.
Currently Selected:
KI 18: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
