KI 17
17
Na enoni koro i avarasia God#Na nunginungi iana o Tavite.
1Araha, gu aganaria na nunginungi iaku,
na nungi tanga na otoha.
Gu karingê, matena gê avarasigo,
suria gê tamasi monari.
2Gu suriê koro, Araha,
suria go girara na monariha reniê.
3Igo ko girara na parongaku,
ma ko bani uhungiê igê na bungiani.
Igo ko bani uhungiê maninga,
ma ko pe tarahua na eraha i pasiku.
4Inê ki pe rongo era na haraku,
ma kê pe hagaparu.
Igê na ogaha iaku
inê kê oto surigi tare na ramata iamu.
Inê kê pe râ surigi na parongata na enoni,
ga oga sutaga.
5Inê kê râ suria tare na tara iamu,
ma ki asa, be aharê tenia.
6Inê kê avarasigo, Araha,
suria gê girarago, go aganariê.
Gu ahariê ma ku karingê,
ma ku rongogi na tamasinga iaku.
7Gu hagabângenia na takuiha raha ma tarema,
ma ku hagatahiê.
Manga go goga heniê,
inê kê tahitahi tenira na merongaku.
8God, gu anumasiê,
manga go anumasia na oruna na maamu.
Gu marupeê, Araha,
manga na kua i buhira na karena.
9Suria na manero ka sugi nahuiê,
ma na merongaku ka rihiê.
10Ngaira ka pe makuku,
ma ka tamasi paroparo.
11Ngaira ka bani here suriê,
ma i ngekê ka rihiê.
Ngaira ka hahutugiê,
hanana viga ranguiê.
12Ngaira ka mangara na o vasiga,
ga ahiahi kariê.
Ngaira ka mangara na o vasiga, ga ramo,
ma ka marotaniê, viga ngasiê.
13Araha, u râ me!
Gu urapusira ma ku teharira na enoni era.
Gu hagatahiê tenira,
ma ku nahira na merongaku.
14Gu hagatahiê tenira na enoni,
ga ruruguha ngavê i maveta ikê.
Gu hagaitangira renigi na mamasiaganiha,
go bani nakagi tangara.
Gu hagamamasiagara na kareta,
ma na kareta nikâ na kareta.
15Ma inê kê page goga henigo inê,
suria gê koro ma oto i maamu.
Matena gê riterite,
inê kê page rigia na bâbâhamu,
ma kê page vagevage teha.
Currently Selected:
KI 17: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
