KI 147
147
Hagarahasia God raramohaga hunia
1Hagarahasia na Araha!
I ararigia, ga kiki ka visia raha God iaka.
I tuguhigia, viga hagarahasia,
hanana ga vagevage.
2Na Araha ki tagarahia aporo Jerusaleme.
Ngaia ki torera aporo na enoni,
ga bani henahuraura.
3Ngaia ki hagamanapura na enoni, i rugu na obata,
ma ki baraigi na maara iata.
4Ngaia ki bani takusigi, vi gi hita na higu,
ma ki hêtata hehegitigi.
5Na Araha iaka ki bâ hahaneaga ma ki raramohaga hunia.
Na takoha mataha iana ki pe araria ta na marâ,
vige maratorana.
6Ngaia ki ragera akê na enoni igê na mamasiaganiha iata,
ma ki kasira so i ano na enoni era.
7Mu kiria na Araha ma kamu visia raha.
Mu tarugigi na gita tanga God iaka.
8Ngaia ki nakagi na vaha i vavearo.
Ngaia ki hagarangisia na maveta,
ma ki katogi na go, ka taba igê na hungani.
9Ngaia ki hagangêra na marâ, ga mauri i ano,
ma nikâ na kareta na manu, matena ga angiangi.
10Ngaia ki pe ageage renira na hosi ramo,
se renira na mane ni me, ga pe magu.
11Ma ngaia ki ageage hete renira na ani, ga hagahigasia,
renira na ani, ga raruni togo
renia na takuiha tarema iana.
12Jerusaleme, mu hagarahasia na Araha.
Sione, mu visia raha na God iami.
13Ngaia ki katoa ki nganganihaga na hinua iami,
ma ki vategamu na ramana.
14Ngaia ki vategamu na marapeha,
ma ki hagangêgamu masu renigi na ngêra mora.
15Ngaia ki bonasia na maveta,
ma na tamasinga iana ki hata ni voravora nga me.
16Ngaia ki hagarangisia na maveta, ki anumaga teha,
ma ki tokorenigi mangagi na one na kârupu,
i magarisi teha ngavê.
17Ngaia ki hagatorangenia na rangi na aisi, i manga na rarate.
I asa ta na enoni, vige oga igê na anumaganiha.
18Ma ngaia ki tamasi, ma na aisi ki rono.
Ngaia ki hagatorangenia me na roga,
ma na ve ka gogogo.
19Ngaia ki hagagirarara na kariana renia na obaniha iana.
Ngaia ki vatera na Isiraelita
na hagesuringa ma na ramata iana.
20Ngaia ki pe katogi na tarani ngegê tangara na enoni getera.
Ngaira ka hitenigi na ramata iana.
Hagarahasia na Araha!
Currently Selected:
KI 147: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
