KI 145
145
Na ki na visiha raha#Na ki na visiha raha iana o Tavite.
1Inê be hagarahasigo, Araha God iaku.
Inê be visigo koro tare ma tarema.
2Inê be visigo koro i na ara ni tangiani.
Inê be visigo raha tare ma tarema.
3Igo, Araha, ko teha,
ma ki tuguhigami, vigami hagarahasigo ngavê.
Igami kami pe aitangisigo,
suria go raha teha.
4Na raraha ma na raraha ka page hagarahasigo
renigi na tauhamu.
Ngaira ka page tarohenigi na tagaraha raha iamu.
5Ngaira ka page tamasigi na raramohamu ma na bâbâhamu.
Ma inê be takotako renigi na mena iamu.
6Na enoni ka page tamasigi na tagaraha raha iamu,
ma inê be tarohenigo, vi igo ko teha.
7Ngaira ka page tamasi renigi na korohamu,
ma ka page kirigi na komaniha iamu.
8Na mahatanga ma na takuiha karu teha i pasina na Araha.
Ngaia ki piringiape,
ma na takuiha iana ki asa, vige page hato.
9Ngaia ki koro tangara na enoni hato,
ma ki takuira na ara ni marâ hato,
i bani hagavorara.
10Na marâ hato, go bani hagavorara, ka page hagarahasigo,
ma na kariamu hato ka page visigo koro.
11Ngaira ka page tamasia na bâbâhana na arahanga iamu,
ma ka page tarohenia na raramohamu raha.
12Vikê na enoni hato ka page giraragi na tagaraha raha iamu
ma na bâbâhana raha na arahanga iamu.
13Na arahanga iamu ki goga tare,
ma igo ko Araha tare nga.
Na Araha ki hagamonarigi tare na suruha iana.
Na tauhana hato ka hagabângenia na korohana.
14Ngaia ki tamanira na enoni igê na mamasiaganiha iata,
ma ki hagamahara na ani, ga tora higa.
15Na marâ hato, ga mauri, ka tako togo renigo,
ma igo ko hagangêra igê na matena tanga.
16Igo ko hagangêra masu,
ma ko vatera na obaniha iata na enoni hato.
17Na Araha ki oto igê na ara ni marâ hato, i tanugi,
ma na tauhana hato ka hagabângenia na takuiha iana.
18Ngaia ki ngahisira na ani, ga avarasia,
na ani ga avarasia igê na monariha.
19Ngaia ki vatera na obaniha iata na ani, ga hagahigasia.
Ngaia ki aganarigi na angiha iata,
ma ki hagatahira.
20Ngaia ki marupera na enoni hato, ga takuia,
ma ki page erasira ngavê na enoni era.
21Inê be hagarahasia tare na Araha.
Na marâ hato, i bani hagavorara, ki ararira,
viga hagarahasia God tare ma tarema.
Currently Selected:
KI 145: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
