KI 140
140
Na nungi ni anumasiha#Na ki iana o Tavite.
1Araha, gu hagatahiê tenira na enoni era,
ma ku anumasiê tenira na ani ga nahu enoni.
2Ngaira ka katogi tare na katoha ga pe oto.
Tarema ngaira ka katora na enoni, ka heariha.
3Na meata ka mangara na ma, ga garagara hunu.#Ro 3.13
Na tamasinga iata ka mangara na ma,
ga marisira ngavê na enoni.
4Araha, gu anumasiê tenigi na raramohata na enoni era.
Gu hagatahiê tenira na ani, ga nahu enoni
ma ka harikato reniê, viga hagavotariê.
5Na enoni paroparo ka tutu kariê.
Ngaira ka nakagi na etu,
ma ka sutasuta kariê i tara.
6Inê kê tamasi tangago, Araha, kê vi: “Igo na God iaku.”
Gu aganariê, gê avarasigo, Araha.
7Araha, God iaku, na raramohaku ma na tahingaku,
igo ko bani anumasiê igê na henahunahu.
8Araha, siana ko aganarigi na teniha iata na enoni era.
Siana ka akê me na katoha iata.
9Siana na merongaku ka tehariê.
Na eraha, ga katogi tangê, ke tarahura hete.
10Ge rangisira na marahana na gi ramo.
Ge kasira igê na kiru ma ke oga tare igê.
11Ke votavota na ani, ga tugurira purua na enoni getera.
Na eraha ke tarahura ma ke hagaerasira ngavê
na ani ga nahu enoni.
12Araha, inê kê girara, go tamanira na enoni matareha
ma ko rohe pusira na ani ga baguru.
13Ga page hagarahasigo na enoni, ga koro ma oto,
ma ngaira ka page oga i pasimu.
Currently Selected:
KI 140: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
