KI 139
139
God ki aitangisia ngavê ma ki marupea na enoni#Na ki iana o Tavite.
1Araha, igo ko bani hahutugiê,
ma ko aitangisiê ngavê.
2Igo ko giraragi na ara ni tauhaku hato.
Ma na takotako iaku ki asa, vige pinihi tenigo.
3Igo ko boreteniê,
matena gê tagara ma matena gê mamaro.
Igo ko giraragi na ara ni parongaku hato.
4Matena gê nanê ni tamasi,
igo ko bani giraragi na ta kê page visigi.
5Igo ko ngahisiê ma ko rihiê,
ma ko anumasiê renia na raramohamu.
6Igo ko girarê erasiê,
ma inê kê pe girara, i tanu hega.
7I he be gava igê panigo?
I he be ahi igê tenigo?
8Manga be akê i vavearo,
igo ko bani oga i ngekana.
Manga ve so i pasita na enoni, ga me hato,
igo ko bani goga i ngekana.
9Manga ve gaha bêkê, se goga kereso ngavê,
10igo ko bani oga i ngekana,
hanana go bêngeniê ma ko tamaniê.
11Inê kê girara gê nungia na roto hono ki rotosiê,
ma kê girara gê nungia na marara mave ki bungisiê.
12Ma na roto hono ki pe roto tangago,
ma tangago na bungiana ki mave manga na tangiana.
Na roto hono ma na marara
karu tagenaterua ma tangago.
13Igo ko hagavorê, na ara ni agua taro me i apeku.
Igo ko hagatotoê i obana kenaku.
14Inê kê visigo raha,
suria i tuguhira na enoni, viga hagarahasigo.
Na ara ni tagaraha iamu ka hagakonera ngavê na enoni.
Inê kê bani girara ngavê i mêrihaku hagenani.
15Matena gê haganega kê raha i obana kenaku,
igo ko goga i ngekana,
suria igo ko hagatotogi maninga na suriku.
16Matena gê goga pinihi i ngekana, igo ko aitangisiê.
Igo ko bani bâsiê, ma kê kahu vora me.
Matena gê mamênga be voravora,
igo ko bani segegi so igê na buka iamu na harisi,
gê page mauri surigi.
17I bara tangê ve aitangisigi na takotako iamu,
ma ngaigi ki na marâ manimani tangê,
ma ka rako ngavê.
18I asa be tomanigi,
suria ga rako teharigi na one.
Matena gê riterite,
igo ko ngahisiê mênga.
19God, inê kê tenia bâraha, vigu hagamesira na enoni era!
Inê kê tenia bâraha, vi na ani, ga nahu enoni,
ke nakê so mareku.
20Ngaira ka tamasi erasigo.
Ngaira ka harikato renigo.
21Araha, inê kê kitenira ngavê na ani, ga kitenigo.
Inê kê ruhira ngavê na ani, ga merongasigo.
22Inê kê kitenira ngavê i mêrihaku hagenani.
Ngaira ka na merongaku nogaku.
23God, gu hahutugiê ma ku aitangisia na aitangihaku.
Gu uhungiê, hanana gu giraragi na takotako iaku.
24Manga go tarahua ta na marâ era i pasiku,
gu hagaporosiê tangago.
Currently Selected:
KI 139: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
