KI 115
115
Na Araha ngaia geta ma ki God
1Araha, siana ko hagarahasigami igami!
Gu hagarahasia hete na atamu maremu
renigi na takuiha tarema ma na monariha iamu.
2Renia ta na enoni getera ka hagategia, ka vivi:
“I he ngaia nga na God iami?”
3Na God iaka ki goga i pasina.
Ngaia ki tanugi na ani ma vê na marâ, i obanigi.
4Na ataro iata ka na nununi na marâ,#Ps 135.15-18; Rev 9.20
na enoni ka tagarahigi renigi na siliva ma na golo.
5Ngaira ka tonga na harata,
ma ki asa, vige tamasi.
Ngaira ka tonga na maata,
ma ki asa, vige bâbâ.
6Ngaira ka tonga na karingata,
ma ki asa, vige rongorongo.
Ngaira ka tonga na barisuta,
ma ki asa, vige sigini
7Ngaira ka tonga na rimata,
ma ki asa, vige hatahata.
Ngaira ka tonga na êgata,
ma ki asa, vige arârâ.
Ngaira ka tonga na riota,
ma ki mareha na ringeta.
8I ararira, vi na enoni hato,
ga tagarahira ma ka hagarapera,
ke usurira na ataro iata ngegana.
9Igamu na Isiraelita,
mu hagarapea na Araha.
Ngaia ki tamanigamu ma ki anumasigamu.
10Igamu na mane ni hagarahenga iana God iaka,
mu hagarapea na Araha.
Ngaia ki tamanigamu ma ki anumasigamu.
11Igamu hato na enoni, mu rahesia God iaka,
mu hagarapea na Araha.
Ngaia ki tamanigamu ma ki anumasigamu.
12Na Araha ki takusigia tare
ma ki ama ni korokoro nga tangagia.
Ngaia ki korokoro tangara na Isiraelita,
ma tangara na mane hato ni hagarahenga iana God na Araha.
13Ngaia ki korokoro tangara na ara ni enoni, ga rahesia,#Rev 11.18; 19.5
naka ma na enoni raha ma na enoni purua.
14Na Araha ke hagarakonigamu,
na ahemata iami ma na anita na karemi.
15Ge korokoro tangagamu na Araha,
i hagavorarerua na vavearo ma na ano.
16Ngaia getea ma na Araha ki na avanuna na matava,
ma na maveta i vatea tangara na enoni.
17Na enoni, ga bani me, ki asa, vige hagarahasia na Araha,
se na ani, ga râ igê na agua iata na enoni,
ga bani magahuru.
18Ma igia hete ka visia koro i ngekê, ki bê ki arâ.
Ge hagarahasia na Araha.
Currently Selected:
KI 115: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
