KI 104
104
Hagarahasia na Araha i hagavorara na ara ni marâ hato
1Inê be hagarahasia na Araha i mêrihaku hagenani.
Araha God iaku, go raha teha ngavê!
Na bâbâhamu raha ma na raramohamu
karu manga na tuguni iamu,
2ma ko togatoga manga na marara.
Igo ko bani gasia na vavearo manga na gerina na ruma,
3ma i pasimu ki oga i avorani na ve#Gn 1.6-7.
i avorana na vavearo.
Igo ko tagirigi na vaha
ma ko tage igê na gagahana na roga.
4Igo ko hagatoragi na roga,#He 1.7
ka totora na tamasinga iamu
ma na marangea ka mangara na kariamu.
5Igo ko bani naka na maveta,
ki nganganihaga igê na atohana,
ma ki asa, vige guru râ tenia.
6Igo ko gasia na asi igê na maveta manga na gahu,
ma na ve ka anuigi na barani.
7Ma na matena go ramonigi na ve, ngaigi ki gava.
Ngaigi ki gava vê, matena ga rongoa na ringemu,
i rongo raha manga na akurua.
8Na barani ka riki kê,
ma na ve ka gogo, ka so igê na maruguni,
igê na atohata, go bani nakagi tangagi.
9Igo ko katogi, ka goga tonge igê na taritarihani,
hanana siana ka aharêngigi
ma ka anuia aporo na maveta.
10Igo ko katogi na ve banga, ka gogo igê na maruguni,
ma na ve oto ka gogo i berarogani na hungani.
11Na marâ vasiga i bemu ka tonomigi,
matena i mamata na riota.
12Igê na apinige hagarangi
na manu ka roborobo ma ka angiangi igê.
13Tenia na vavearo igo ko hagarangisigi na hungani,
ma ko katogi, ki akê i maveta
na ara ni marâ hato, ga koro.
14Igo ko katogi na go, ki akê koro tangara na puruka,
ma na ngêra tangara na enoni.
Vikê na enoni ka hasihasi ngêra,
15ma na varo ni vaini, i hagakoro obata.
Ma nikâ na apinige na olive tanga na oile,
hanana ga vagevagesia,
ma na bereti, ga apeape koro renigi.
16Na apinige raha i Libanone ka mauri bâkoro renigi na rangi.
Ngaigi ki na apinige iana marena na Araha, i hasigi.
17Na manu ka roborobo igê,
ma na manu raha ka beabea igê na mararu.
18Na goti vasiga ka goga igê na hungani,
ma na garagu ka rukuruku igê na vaba.
19Igo ko hagavora na hageha,
ki hagagiraragami renigi na bevoani.
Ma na arito ki girara na matena,
i araria, i susu igê.
20Igo ko hagavora na bungiana,
ma na marâ hato vasiga ka arârâ igê na roto.
21Na o vasiga ka ngerengere, matena ga gagari.
Ngaira ka garigari na ngêra,
na mahatanga iana na Araha.
22Igê na kakahuagani na tangiani
ngaira ka aporo igê na tâtâ iata.
23Hemuri na enoni ka tabegi na tagaraha iata,
mataro me ki manurahi.
24Na marâ go bani hagavorara, Araha,
ka rako teha ngavê.
Ngaira ka hagabângenia, vi igo ko tako mataha ngavê.
Na maveta ki vunu renira na marâ,
go bani hagavorara.
25Na asi ki raha ma ki aberabera.
Na ega raha ma na ani sisite ka rako teha igê.
I bara, vige tomanira.
26Na haka ka arâ igê na asi,#Job 41.1; Ps 74.14; Is 27.1
ma i rarona na asi ki barebare Leviatane,
na ega raha teha, go bani hagavora.
27Ngaira hato ka naasigo re ngêra,
matena ga obanigi.
28Igo ko hagangêra ma ngaira ka ngêngê.
Ngaira ka ngê masu renigi na ngêra, go vatera.
29Matena go mumu tenira,
ngaira ka magu.
Matena go torea vê na rogaroga tenira,
ngaira ka meme,
ma ka voravora aporo renia na mako.
30Matena go vatera na rogaroga,
ngaira ka voravora me,
ma ko votoa tare na mêriha haoru i maveta.
31Na bâbâhana raha ma na raramohana na Araha
ke oga tare ma tarema.
Na Araha ke koro na obana
renigi na tagaraha iana.
32Ngaia ki boretenia na maveta,
ma na ano ki gisigisi.
Ngaia ki hatarigi na barani,
ma ka asêsu.
33Inê be kiria na Araha suria na mêrihaku hagenani.
Suria na mêrihaku hagenani
inê be kiria be visia raha God iaku.
34Ge hagakoro obana na Araha na ki iaku,
suria inê kê vagevagesia.
35Ge magahuru tenia na maveta na enoni era,
ma ke hato hagetage na enoni, ga tasi.
Inê be hagarahasia na Araha i mêrihaku hagenani.
Inê be kasia akê na Araha.
Currently Selected:
KI 104: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
