KI 103
103
Na takuiha iana God#Na ki iana o Tavite.
1Inê be visia raha na Araha i mêrihaku hagenani.
Inê be hagarahasia, ke rogo raha na atana.
2Inê be kasia akê na Araha,
ma ki asa, be bonotenia na korohana raha tangê.
3Ngaia ki bonotenigi na tasi iaku hato,
ma ki hagakomagê tenigi na mera hato.
4Ngaia ki hagatahiê tenia na matahu.
Na takuiha iana ma na korohana karu aganariê.
5Ngaia ki hagavagevagesiê renigi na marâ, ga koro,
suria na mêrihaku hagenani.
Vikê inê kê karekare ma kê ramoramo,
manga na ahetaronga.
6Na Araha ki tamanira ma ki surira oto
na enoni, ga goga igê na mamasiaganiha.
7Ngaia ki hagagirara o Moise renigi na katoha iana,
ma ki hagabâsira na Isiraelita
renigi na raramohana ma na tagaraha raha iana.
8Na Araha ki korokoro tangara na kariana ma ki takuira.#Jas 5.11
Ngaia ki pe mangariaga garigari.
Ma na takuiha iana ki asa, vige page hato.
9Ngaia ki asa, vige ama ni ramonira nga na kariana,
ma ki asa, vige mangariaga tare.
10Ngaia ki pe hagaitangigia ararigi na tasi iaka,
se vi na ginoka era, se vi na parongaka era.
11Na takuiha tarema iana tangara na enoni, ga tê viteana,
ki raha teharia na vavearo i avorana na maveta.
12Ngaia ki kasigi vê na tasi iaka hagatê ngavê,
manga i kerekê ma kereso garu hehagatêri.
13Tagenana manga na mane i takuira na karena,
na Araha ki takuira nogana na enoni,
ga tê viteana.
14Ngaia ki girara, vi igia ka makumakusiga.
Ngaia ki pe hitenia, vi igia ka na mako.
15Tangagia igia, na mêrihaka ka mangagi na go ma.
Igia ka mangagi na rauga i bemu,
ga akê ma ka tataka.
16Ma na roga ki rogatenigi vê, ka magahuru,
ma ka pe bâsigi nikâ.
17Ma tangara na enoni, ga tê viteana,
na Araha ki takuira tare, ki bê ki arâ.
Ma na korohana ki asa, vige page hato.
18Tagenana tangara na ani, ga marupegi maninga na ramata iana
ma ka toto suria na suruheri iana henira.
19Na Araha ki marungirerua
na matava ma na maveta hagenani.
20Mu hagarahasia na Araha,
igamu na angero ramo ma raramohaga,
mu marupegi na ramata iana ma kamu tê viteana.
21Mu hagarahasia na Araha,
igamu na kariana raramohaga,
mu tagara tanga ma kamu arâ surigi na tamasinga iana.
22Mu hagarahasia na Araha,
igamu hato na marâ, i bani hagavoragamu,
i na ara ni agua, i marungigi.
Inê be hagarahasia na Araha
i mêrihaku hagenani.
Currently Selected:
KI 103: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
