KI 105
105
God ki marupera na kariana
(1 Sihonga 16.8-28)
1Mu visia koro na Araha.
Mu tarohenia, i rongo raha na atana.
Mu hagarongora na enoni hato i maveta
renigi na tagaraha iana.
2Mu ki kamu visia raha na araha.
Mu visigi na mena iana.
3Mu ageage, suria igamu ka na kariana.
Ge vagevage nogata na enoni hato,
ga rahesia na Araha.
4Mu avarasia na Araha, ki tamanigamu,
ma kamu rahesia tare.
5Mu takusigi na mena, God ki bani tanugi,
ma na tagaraha ma na suriha iana.
6Renia igamu nga na raraha iana o Abaramo.
Ngaia ki na kariana na Araha.
Renia igamu nga na raraha iana o Jakobo.
God ki bani ategamu.
7Na Araha ki na God iaka.
Na ramata iana ka tuguhira na enoni hato i maveta.
8Ngaia ki page takusia tare na suruheri iana,
ma ki page hagamonarigi na suruha iana
tare, ki bê ki arâ.
9Ngaia ki page hagamonarigi na suruheri iana henia o Abaramo#Gn 12.7; 17.8; 26.3.
ma na suruha iana tanga o Isako.
10Na Araha ki naka na suruheri henia o Jakobo.#Gn 28.13
Na suruheri ngekê ki asa, vige page hato.
11Ngaia ki vi: “Inê kê page haganahunigo
renia i Kanani.
Ngaia ki na animu.”
12I nago na kariana God ka pe rako.
Ngaira ka mamahuara i Kanani.
13Ngaira ka arârâhigi na agua
surigi na hinua.
14God ki pe hagamarumungenira na enoni i ngekana,
hanana vige hagamamasiaga apeta na kariana.
Ngaia ki haganunura na maneraha i ngekana,
hanana ga anumasira na kariana.
15Ngaia ki vi: “Siana kamu erasira na kariaku hetakui.#Gn 20.3-7
Siana kamu merongasira na poropete iaku.”
16Na Araha ki naka na magêha raha i na marê iata,#Gn 41.53-57
ma ki hagataragi na ngêra hato iata.
17Ngaia ki kasia ta na mane, ki nanago tarata.#Gn 37.28; 45.5
Ngaia ki no Josepo, ga bani hagavuringenia
manga na kare rakuraku.
18Ga barogi na êgana renigi na seni,#Gn 39.20—40.23
ma ka arigenia na seni i riona.
19Ngaia ki oga vikana i ruma ni hagaitangiha,
mataro me ki voravora me mave na hinarunga iana.
Na tamasinga iana na Araha ki hagatanga monari renia,
vi na hinarunga iana o Josepo ki monari.
20Vikê na maneraha i Esipito ki rupasia.#Gn 41.14
Na ani, i marungira na enoni hato,
ki kasia hura tenia na ruma ni hagaitangiha.
21Ngaia ki kasia, ki bâsurigi na arahanga iana#Gn 41.39-41.
ma na nahuninga ma na mako iana.
22Mo Josepo ki araha tangara
na enoni raha igê na gavumane,
ma ki nahunia na ramoha,
hanana i hagesurira na mane,
ga tamania na maneraha renigi na takotako mataha iata.
23Me muri o Jakobo ki râ i Esipito#Gn 46.6; 47.11.
ma ki oga mamahuara i ngekana.
24Na Araha ki hagarakonira na kariana,#Ex 1.7-14
ma ki katora, ka ramo teharira na merongata.
25Ngaia ki katora na ai ni Esipito
ka kitenira na kariana,
ka hagahagaparura ma ka hagamamasiagara.
26Ma hemuri God ki hagatorangenirerua#Ex 3.1-4.17
o Moise na kariana
mo Aroni, i bani atea.
27Ngaia ki vaterarua na ramoha,
hanana garu tanugi i Esipito
na tagaraha raha ma na mena.
28God ki katoa na agua hagenani, ki roto hono.#Ex 10.21-23
Ma na ai ni Esipito ka usi ni tê viteana.
29Ngaia ki katogi na ve iata ki vora na gapu,#Ex 7.17-21
ma ka me hato na siare igê.
30Na êrê ka gahuia na apanena iata,#Ex 8.1-6
ma ki vunu mamasuaga ngavê nikâ
na ruma raha iana na maneraha.
31God ki hagatorangenira na rango ru ma na namu,#Ex 8.20-24; 8.16-17
ka manasia na agua hagenani.
32Ngaia ki hagarangisia na agua hagenani#Ex 9.22-25
renigi na hê na aisi,
ma na marangea nikâ.
33Ngaia ki hagaerasigi ngavê na pariki na vaini iata,
ma ki bogegi na apinige na fiki iata
ma na ara ni apinige hato.
34Ngaia ki hagatorangenira na pê rako teha ngavê,
na rehagaro ma na rehagaro.
35Ngaira ka ngaugi na rê hato i na agua hagenani#Ex 10.12-15
ma na ara ni ngêra hato nikâ.
36Ngaia ki hagamesira na ara ni bêbê ni kare hato#Ex 12.29
surigi na ara ni ahemata hato i Esipito.
37Memuri ngaia ki merahura na Isiraelita.#Ex 12.33-36
Ngaira ka migirâ na siliva ma na golo.
Ngaira hato ka ape koro ma ka ramoramo.
38Na ai ni Esipito ka magutenira,
ma ka manavatenira, matena ga hura.
39God ki buhira na kariana renia na vaha.#Ex 13.21-22
Ngaia ki naka na gi,
i mavesira surigi na bungiani.
40Ngaira ka nungia, ma ngaia ki vatera na manu.#Ex 16.2-15
Ngaia ki hagangêra ka masu
renia na ngêra tenia i pasina.
41Ngaia ki tangahia na verake,#Ex 17.1-7; Nu 20.2-13
ma ki pusu me na ve,
ki gogo manga na ve oto igê na masusu.
42Renia ngaia ki takusia na tohenga iana
tanga o Abaramo na kariana.
43Vikê ngaia ki bêngenira hura na kariana hetakui.
Ma ngaira ka kiki ma ka ngerengere,
suria ga obakoro.
44Ngaia ki haganahunira#Js 11.16-23
renigi na agua ma na mako ma na mu iata na enoni,
ga pe rahesia na Araha.
45Ngaia ki kato vikana,
hanana na kariana ka marupegi na ramata iana
ma ka arâ surigi na tamasinga iana.
Ka kasia akê na Araha,
ma ka hagarahasia!
Currently Selected:
KI 105: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
