KI 102
102
Na enoni haoru i avarasia God#Na nunginungi iana na enoni hatamigi na mamasiaga ma ki hagagege tanga na Araha.
1Araha, gu aganaria na nunginungi iaku,
ma ku tamaniê, gê avarasigo.
2Siana ko murisigeê igê na mamasiaganiha iaku.
Gu karingê ma ku aganaria na avarasiha iaku.
3Na mêrihaku ki magahuru manga na robona gi nga.
Na apeku ki rarata manga na gi ramo.
4Inê kê mangagi na go, ga bani retegi ma ki maria.
Inê kê marangê hagetage.
5Inê kê gegege raha.
Inê kê kakasi ma kê rataga ngavê.
6Inê kê manga na manu igê na bagamanihê raha.
Inê kê manga na komokukuni igê na hiru.
7Inê kê tâ i bana ma ka ura na maaku.
Inê kê oga getegeteê,
manga na manu i tage i gerina na ruma.
8I na ara ni tangiani na merongaku ka guhariê.
Ngaira ka rurusiê ma ka visiê bera.
9Inê kê ngaua ma na rahu,
ma kê tonomigi ma na tavoni na maaku.
10Suria igo ko mangariaga bâraha tangê,
igo ko tauê, ko arihateniê.
11Na mêrihaku ki manga na mamaruha i manurahi ngavê.
Inê kê mangagi na go, i maria.
12Ma na arahanga iamu, Araha, ki goga tare.
Na enoni i muri me ka page takusigo nikâ.
13Igo ko page gagêmaga renia Sione ma ko takuia.
I ngekê ki na matena koro tanga go takuia igê.
Ngaia ki na matena, i arari.
14Na kariamu ka takuia Sione,
naka ma na merongata ka bani hagasuhia.
Ngaira ka mesia,
naka ma na ruma hato ka tâ so i ano.
15Na enoni hato i maveta ka page magutenia na Araha.
Na maneraha hato i maveta ka page magutenia na raramohana.
16Matena na Araha ki torea aporo Sione,
ngaia ki page hagabângenia na raramohana raha.
17Ngaia ki page rongora na kariana, ga varo mu,
ma ki page aganarigi na nunginungi iata.
18Mu segegi so na tauhana na Araha,
hanana na enoni i na bevoana i muri me
ka page giraragi.
Vikê na enoni, ga mamêngara, ge voravora me,
ka page hagarahasia.
19Na Araha God i pasina ki hahutugia na maveta,
ma ki bâ so tenia na agua apuna iana.
20Ngaia ki rongora na enoni,
ga gegege i ruma ni hagaitangiha.
Ngaia ki hagatatarasira na ani,
ga bani surira bera, viga meme.
21Vikê na enoni ka page hagarahasia God i Sione
ma ka page kasia akê i Jerusaleme.
22Vikê ki page rongo raha na atana,
matena na enoni hato i maveta ma na maneraha iata
ka hakuhaku me tanga ga rahesia na Araha.
23Inê kê karekare mênga,
ma na Araha ki bani katoê, kê pe ramoramo,
ma ki bani hagabubua na mêrihaku.
24God, igo ko mauri tare ma tarema.
Inê kê avarasigo.
Siana ko hagamagahuruê, mataro me kê gemêa.
25Araha, i nago kere vê noga igo ko hagavora na maveta#He 1.10-12.
ma ko tagarahigi na vavearo ma na bevoa tatara
renigi na rimamu maremu.
26Ngaigi hato ki page magahuru,
ma ki page kakaga mangagi na kakagani na gahu.
Ma igo, igo ko page goga tare ma tarema!
Igo ko page tasigi râ mangagi na gahu,
ma ngaigi ki page magahuru.
27Ma igo ki asa, vigu page riariaga,
ma ko mauri tare, ki bê ki arâ.
28Na kareta na kariamu ka page ape tatara,
suria igo ko anumasira
ma na raraha iata ka page nahunia na ramana.
Currently Selected:
KI 102: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
