NA MARAMARÊRAVA 3
3
Na hagaotonga koro
1Kakare, siana ko bonotenigi
na hagesuringa iaku tangago.
Go takusigi tare na marâ gê bonasigo renigi.
2Vikana igo ko page mauri arihu
ma ki page aharêsigo na ramana.
3Go taurerua gatagata
na hetakuiha ma na totosuriha.
Go mahemahe rerirerua i riomu.
Gu segererua igê na aitangihamu.
4Vikana God ma na enoni ka page vagevagesigo.
5Go hagêguritogo renia na Araha
i mêrihamu hagenani.
Siana ko hagêguria na marâ
go takusia vigo aitangisia.
6Takusia tare na Araha
igê na ara ni marâ go tanugi,
ma ngaia ki page hagabâsigo renia na tara koro.
7Siana ko takusia,
vi igo ko aitangisigi na ara ni marâ.
Go têtê viteana na Araha
ma ko kikitenigi na eraha.
8Vikana igo ko nahunia na meresini koro,
i hagamavogi na maara iamu
ma ki hagamarumugi na haraniha iamu.
9Tagarenigi tanga na Araha
na ngêra mora tenigi na mu iamu.
10Vikana na ruma ni harisi iamu
ki page vunu mamasuaga renigi na koni.
Na vaini ka page aharêsigo ngavê
ma ki mareha ta na marâ vigu karangigi igê.
11Kakare, gu naka na Araha ke hagaotogo.
Siana ko mangariaga, matena i ramonigo.
12Na Araha ki ramonia na ani ngaia i takuia,
manga o vaema ni kare,
i ramonia o karena ngaia i takuia.
13I babarisi na enoni i tarahugi
na takoha mataha ma na aitangisiha.
14Na takoha mataha ki hagahanego
teharigi na golo ma na siliva.
15Na takoha mataha ki hagahanego
teharigi na hê i akê na meni.
I mareha rârâ ta na marâ go obania
vige maratorana na takoha mataha.
16Na takoha mataha ki haganahunigo
renia na mêriha i arihu
henigi na ruruguha ma na hagahigasiana renigo.
17Na takoha mataha ki girara i katogo
ko vagevagesia na ogaha iamu
ma ki hagabâsigo renia na tara koro
igê na ogaha hagenani iamu.
18Tanga na ani i ruia na takoha mataha
na takoha mataha ki manga na apinige i rasi.
Na ani i têa gatagata na takoha mataha
ngaia ki vagevage.
19Na Araha ki hagavora na ano
renia na takoha mataha iana.
Ngaia ki naka na vavearo igê na atohana
renia na giraraha iana.
20Na takoha mataha iana
ki katogi na ve ka gogogo
ma ki katogi na roto ni rangi
ka rangisia na maveta.
21Kakare, go taurerua gatagata
na takoha mataha ma na aitangisiha iamu.
Go mamasurirerua maninga.
22Ngairerua karu haganahunigo renia na mêriha,
karu hagabâkorogo ma karu hagavagevagesigo.
23Vikana igo ko girara go arâ suri parongamu
ma ki asa vigu tapasu.
24I asa vigu magu ni mêru
ma ko mauru borebore hete
suria na bungiana hagenani.
25I asa iamu vigu magutenigi
na bagabevoani ga hagakakangi me
manga na enoni ga pe botage renia God
ga gasuga me.
26Ngaia nga na Araha kani ngahisigo
ma ki anumasigo, hanana siana ko tutu igê na etu.
27Manga i pe bara tangago
go vatea na enoni na marâ i oto tanga.
28Siana ko surusuru kê tanga vi i gomaha,
manga vigo nahunia.
29Siana ko katoa na tarana i hagamamasiaga,
suria ngaia ki hagêguritogo renigo
ma ki megobasigu hetanga.
30Siana ko hagatamasia na enoni
i pe erasigo rârâ renia ta na marâ.
31Siana ko hengarira na enoni ga bagaparongata.
Siana ko amake surira.
32Suria na Araha ki kitenira na enoni ga bagaparongata
ma ki manatangenira na ani ga tê viteana.
33Ngaia ki hagatavagi na ruma iata na enoni
ga pe botage renia,
ma na korohana ki gahuigi na ruma iata na ani
ga tê viteana.
34Ngaia ki meramarabe bê aporo na ani
ga memarabe, suria ga paroparo.
Ma ngaia ki korokoro tangara na ani
ga kasira so mareta ma ka tê viteana.
35Na enoni ka hagahigasira na ani
ga tako mataha ma ka koro.
Ma na enoni ga bekabekaga
ka katora mareta ka maki ngavê.
Currently Selected:
NA MARAMARÊRAVA 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
