NA MARAMARÊRAVA 2
2
Na takoha mataha ki anumasigo tenia na eraha
1Kakare, gu karingagi na hagesuringa iaku.
Gu arâ surigi tare na tamasinga iaku.
2Gu aganarigi na takoha mataha
ma ko uhungia nga hanana go aitangisigi.
3Nungia nga na giraraha.
Avarasia nga na aitangisiha.
4Garia maninga nga
manga vi ngaia ka na siliva
se manga na ruruguha i oga pinihi.
5Vikana igo ko page aitangisigi
na hagahigasiana na Araha
ma na hagesuringa iana God.
6Ngaia nga na Araha kani haganahunigo
renia na takoha mataha.
Tenia ngaia nga kani râ me
na morani na giraraha ma na aitangisiha.
7Ngaia ki tamanira na ani
ga koro ma ka oto na parongata i maana
ma ki ngahipusira manga na bêata.
8Ngaia ki ngahisira na ani ga katogi ma
na tarani ga oto tangara na enoni getera,
ma ki anumasira na ani ga toto suria.
9Kakare, manga go têtê viteaku,
igo ko page aitangisigi na monariha,
ma na otoha ma na koroha.
Igo ko page girara
na ta ki tuguhigo vigo katoa.
10Na takoha mataha ki page angarigo
ma na morana na giraraha
ki page katogo ko obâbakoro.
11Na morani na giraraha ma na aitangisiha
karu page anumasigo tenigi na eraha,
12ma karu page urapusigo tenigi na bagatauha,
tenira na enoni ga hagahagaparu,
tenira na enoni ga gâga sutaga,
13tenira na ani ga pania na tara ni ogaha koro
ma ka râ suria ma na tara ni rotohono ni tasi,
14tenira na enoni ga ageagesigi na bagatauhata
ma na hagabekaniha era iata,
15tenira na enoni, ga bagahagêguri renira
ma ki asa vige tongesurira.
16Kakare, manga go têtê viteaku,
igo ko girara go usisi tenia na gete
i nakanaka bêna vi megomêru,
17na gete i pe toto suria o vaniana
ma ki pe hagahigasia na suruha iana igê na êragiha.
18Manga go arâ tanga na ruma iana,
igo ko râ suria na tara tanga na mera.
Manga go arâ tanga i pasina
igo ko râ tanga na agua iata na ani ga bani me.
19Na enoni i rêra i pasina na gete ngekana,
ngaia ki arâ su.
Ngaia ki bara vige aporo me
tanga na tara tanga na mêriha.
20Vikê ki tuguhigo, go amaka
surigi na parongata na enoni koro,
ma ko hagabângenia na ogaha
i hagakoro obana God.
21Na enoni ga koro ma ka oto i maana God
ka page ama ni gâga nga igê na agua iaka ikê.
22Ma na Araha ki page tarigenira hura
na enoni ga pe botage renia God.
Ngaia ki page pirira akê tenia na agua
mangagi na rauga era
na enoni ga murisigea na Araha.
Currently Selected:
NA MARAMARÊRAVA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
