NA MARAMARÊRAVA 26
26
1Na hagarahasiana na enoni bekabekaga ki pe marisina, manga na maratoha ma na mahananiha, se na rangi ma na arito ru igê na matena ni opaha ni harisi.
2Na arangeniha ki asa vige hagamamasiagago manga vi pe tonga na hunana. Ngaigi ki manga na sigo i hagavato se manga na gapagapa i gaha ki riri.
3Na gue ki tanga na hosi, na pagopago tanga na tonki ma na mata tanga na gerina na enoni i bekabekaga.
4Manga go aramia na hagatenga bekabekaga, igo ko bekabekaga manga na enoni i hagate. 5Go aramia bekabekaga na enoni i hagate bekabekaga, i era ma ki takusia vi ngaia ki tako mataha.
6Manga go hagatora na enoni bekabekaga ki torea na rongoha iamu, igo ko hagaratemu maremu. I ararigo hete vigo bibi.
7Na maramarêrava i huhura me tenia na harana na enoni bekabekaga ki pe ramo manga na êgana na enoni i tavi.
8Na hagarahasiana na enoni i bekabekaga ki bekabekaga manga na rugiana ni hê igê na hêsigogo.
9Na enoni bekabekaga ki asa vige tavoa na maramarêrava. Ngaia ki manga na mane i ruguhia na tonoha ma ki asa vige tavoa râ na sutana na tone i rimana.
10Na enoni i nakara na enoni bekabekaga ma na ani i pe girarara ka tagara tanga, ngaia ki manga na mane i hanahanasira na enoni hato renigi na mage.
11Tagenana manga na o i aporo ki ngêngê na momâna, na enoni bekabekaga ki ama ni katogi kê nga na tarani ga bekabekaga.
12Go girara vari na enoni i takusia vi ngaia ki tako mataha teha ngavê? Hoi, go girara nga vi na enoni bekabekaga ki akê me nga teharia na enoni ngekana.
13Na enoni i babaga ki vivi: “I bara ve hura tenia na ruma. Na laione i metara!”
14Na enoni babaga ki ahorohoro i bea manga na maani ruma i akeke rârâ.
15Na enoni babaga ki tavoa na ngêra igê na apira ma ki bara tanga vige têa akê i harana ke ngêa.
16Na enoni babaga ki takusia vi ngaia ki nahuni takoha teharira na verepi na enoni ga nahuni takoha mataha maninga.
17Manga go totora voro igê na hemerongeana, igo ko manga na enoni i arârâ i tara ma ki ranguirerua na karingana na o vasiga.
18-19Na enoni i hagaparua na tamana ma hemuri ki vivi: “Inê kê hagatanugo ma”, ngaia ki manga na enoni bekabekaga i migibare na mage na gi ki hanatenigi rârâ se i arihatenigi rârâ na tarure.
20Hatohato na ario, ki meme na gi. Hatohato na bagatabotabohara, ki magahuru na hekorekoreana.
21Tagenana ma na ario ma na maraha ka tarê renia na gi, na ogasutaganiha ki tarê renia na hekorekoreana.
22Na bagatabotabohara ki mamaki ngavê tangagia. Igia ka unumia ototo râ nga!
23Na tamasinga ni hagahagabeka ki manga i murina hura na pi na hê i togatoga renia na kere siliva ga taruhia renia.
24Na enoni i hagahagabeka ngaia ki pinihia, vi ngaia ki kitenigo, suria na aitangihana ki era. 25Ngaia ki rongo koro vari, ma siana ko tongesuria, suria i pinihia na eraha igê na aitangihana. 26Henaka vi ngaia ki pinihia maninga na kiteniha iana, ma ngaia ki page huhura me mave igê na bagatauhana.
27Na enoni i sutasuta hekarigi, ki page sutasuta so igê marena. Na enoni i puripuri hê, na hê ka page apuri huria.
28Igo ko hagatoraia na enoni, suria ma go kitenia. Na enoni i hagahagabeka ngaia ki obania ma vi hagaerasia na enoni.
Currently Selected:
NA MARAMARÊRAVA 26: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
