NA MARAMARÊRAVA 25
25
Tani nikâ na maramarêrava iana o Solomone
1Ikê tani nikâ na maramarêrava iana o Solomone. Na mane ga tagara i ruma iana o Hesekia na maneraha i Jutea ka segegi so.
2Igia ka hagarahasia God, suria i pinihigi na katoha iana. Ma igia ka hagarahasira na maneraha, suria ga visigi mataha na marâ.
3Na takoha iana na maneraha ka mangagi na vavearo se mangagi na rutuni i asi. Igia ka arisigi.
4Apegi râ na popona na siliva tenia, matena i rono, hanana i taranina tanga ga tagarahia renia na kâkâ ki bâkoro. 5Paira hura na enoni ni hagaotonga era tenia na maneraha, hanana na hunana na arahanga iana ka na otoha.
6Matena go arâ i pasina na maneraha, go nakago so maremu ma siana ko gâga so ototo râ nga igê na atohata na enoni raha, 7i era ma na maneraha ki vi tangago, ko aharaga tenia na atohana na ani i raha teharigo. I koro hete tangago, manga vi ngaia ma ki vi tangago, ko akê ko gâga igê na atohata na enoni raha.
8Manga go bâsia ta na enoni i katoa ta na marâ, siana ko hatani torea ototo râ nga igê na tamasinga, i era ma ngaia ki hagatanga monari renigo, vigo hagaparu. Vikana ko tê tanu mara ta?
9Manga ta na marâ i berarogamurua igo ma na tamamu, igamurua so ma kanimurua hagaotoa. Siana ko tokorenigi na marâ na tamamu i hagapêpugo renigi. 10Manga i mareha, na enoni ka tahetara renigo, vi igo ka na enoni ni bagahagarongo. Vikana na makiha ki asa vige hato tenigo.
11Na tamasinga koro igê na matena tanga ki manga na gai na golo igê na apira na siliva.
12Na ramoniha iana na enoni ni takoha tanga na enoni i aganaria, ngaia ki manga na ringi na golo se na bato na golo taranina.
13Na enoni tora tamasinga i asa vige hagaparu. Ngaia ki tanga na ani i hagatorangenia manga na ve magarisi ni tonoha igê na matena ni opaha ni harisi, matena i mahanaga na arito.
14Na enoni ga surusuru hagaparu viga mahata, ngaira ka mangagi na vaha ma na roga ga pe merâ me na rangi.
15Manga go apeape suria na enoni, henaka vi ngaia ka na maneraha, ngaia ki page ahoro me. Na tamasinga manâhi ki girara i horoa na aitangihana na enoni i usisiga ngavê.
16Siana ko masumasu aharêngigo renigi na pirui, i era ma ko momoa. 17Siana ko marigia na tamamu, i era ma ki usisi na apena renigo se i kikitenigo.
18Na hagatorainga igê na kotiha ki manga na tatapa borahu se na mata se na mage i masi i nahuia na enoni ki meme.
19Manga go gâga igê na eraha ma ko hagêguria na enoni i pe arari vige hagêguritogo renia, ki tagenana manga go ngê renia na rivomu i hara, se go arâ renia na êgamu i maranga.
20Manga go vagevage ma ko kiki i pasina na enoni i rugu ngavê na obana, ki tagenana manga go tasia râ na gahu iana igê na matena ni maratoha, se i manga go taruhia na maara iana renia na ahu.
21Manga i magê na merongamu, gu hagangêa. Manga i mamata na riona, gu vatea ki totono. 22Vikana ngaia ki page maki ngavê, ma na Araha ki page vurigo.
23Na bagatabotabohara ki hagavorea nga na mangariaganiha manga na târagina i tarê heroga.
24Na ogaha igê na parema ki koro teharia na ogaha i rarona na ruma henia na gete i varovaro me tare.
25Na rongoha koro tenia na agua hagatê ga bani naasia arihu me noga ki manga na ve magarisi matena i mamata ngavê na riomu.
26Na enoni koro i arâ suria na enoni era, ki manga na ve banga i amera, se na ve karu i oga igê na maeha.
27I pe koro tangago vigu masumasu aharêngigo renia na pirui. I tagenana ma manga vi i pe koro tangago, vigu obanira na enoni viga hagarahasigo tare.
28Na enoni i pe mangariaga takotako ki manga na hinua ga pe pararihia ma ki mataku ma viga taharia.
Currently Selected:
NA MARAMARÊRAVA 25: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
