NA MARAMARÊRAVA 27
27
1Siana ko tamasia tare i gomaha, suria i bara ngavê vigu girara na ta ki page akê me i ngekê nga.
2Siana hagetage ko hagarahasigo maremu. Gu nakara hete na enoni getera se na mahuara ka hagarahasigo ngaira.
3Na hê ma na one ka higego ma na bekaniha ki higego teha ngavê.
4Na mangariaganiha ki era ma ki hagamamasiagago, ma na hengariha ki erataga ngavê.
5Ramonia mave na enoni ki koro teharia go munimuni ma, suria go vi ma vigo takuia.
6Na enoni i manatangenigo ki takuigo henaka i hagamamasiagago. Ma ki manga na merongamu ma ki haritê henigo, hoi, go hinarua!
7Matena go masumasu, igo ko naka vê na pirui henaka i mamaki, ma ki manga go magê, henaka i mahe na ngêra, e, ngaia ki mamaki ma tangago.
8Na enoni i oga hagatê tenia i pasina, ngaia ki manga na manu i pe tonga na robona.
9Na hemanatange koro ma na hagaotonga koro karu mangagi na moneha i sigini koro.
10Siana ko rumakaka renira na ani ga manatangenigamurua igo mo vaemamu. Matena i takego na bagabevoana ki asa iamu vigu avarasia na goamu i oga hagatê. Na tamamu i oga hagarangi ki koro tangago teharia na goamu i oga hagatê.
11Kakare, manga go nahuni takoha mataha, inê kê ageagesigo. Manga na enoni ma ki rurusiê renigo, inê kê nahunia na aramiha tanga.
12Na enoni ni takoha ki bâbâ tarana ma ki rukuruku tenigi. Ma na enoni i pe nahuni takoha ki tari ototo râ tangagi ma ki kahu tangahuria.
13Manga go beka ko suru vigo barugi na hagaba iana na mahuara ma ka tavogi râ panigo na nahuninga iamu urusigi na hagaba, siana ko hagagege.
14Manga go ngere ko hagaritea tare na tamamu renia na hagamavoraro koro, ngaia ki page vi ma, vi igo ko arangenia.
15Na gete i ama ni varovaro me nga, ngaia ki era manga na rangi igê na gerina na ruma i ahari. 16I bara vige hagamunia. Hagamunia na gete vikana ki manga go uhungia vigo taua i rimamu na roga se na oile.
17Tagenani ma na aiani ga rategiheri, na enoni ka hagesuriheri.
18Manga go marupea maninga na apinige na fiki, igo ko page ngaugi na guani. Manga go marupea maninga na enoni i raha tangago, ngaia ki page hagarahasigo.
19Tagenana manga na enoni i bâsia na nununa marena i ve, ngaia ki bâsia nikâ marena igê na aitangihana.
20Na agua iata na enoni ga bani me ki asa vige page vunu. Na enoni ki tagenana ma. I asa vige togo na aitangihana.
21Na gi ki hagabângenigi na golo ma na siliva, vi ngaigi ki koro se mareha. Na tamasinga iata na enoni renia na enoni ka hagabângenia, vi ngaia ki koro se mareha.
22Manga go takea na enoni bekabekaga renia na etake manga na pua se na ngêra, hanana vi amenamena, na bekaniha iana ki asa vigu takea hura tenia. 23Go bâbâsurigi maninga na togoha iamu ma ko marupera bâkoro na sipi ma na goti iamu, 24suria na ruruguha ki asa vige gâga hagahu. Na hagosi ninuni ka girara ga hatohato nikâ. 25I murina go retegi na go igê na pariki ma ko rurugi haku râ matena ga maria bâkoro, na go haoru ka papêhu aporo. Ma hemuri ko arâ igê na tarihani na hungani ma ko totora haku na go maria! 26Na sipi ka vatego na varehuta tangagi na gahu iamu. Igo ko hagavuringenira tani na goti mane, hanana go vuria na mako renigi na meta. Na goti hehene ka haganahunigo renigi rako na tavoni na susuta, 27hanana mu mauri re igo ma na ruma iamu ma na kere gete ga tagara tangago.
Currently Selected:
NA MARAMARÊRAVA 27: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
