NA MARAMARÊRAVA 24
24
-19-
1Siana ko hengarira na enoni era ma siana ko manatangenira. 2Na eraha ka na marâ iata. Na eraha ma ka huhura me i harata.
-20-
3Na takoha mataha ma na aitangisiha karu manga na hunana na ruma. 4Manga i gâga na giraraha, na kiboru ka vunuvunu renigi na marâ manini ga bâkoro ma ki raha na meni.
-21-
5Na enoni i tako mataha ngaia getea ma ki nahuni ramoha. Na aitangisiha iana ka na raramohana. 6Bâ, manga go takotako maninga hagenago, igo ko girara go arâ igê na hearihatana. Manga go nahunira rako na enoni ni hagaotonga koro, igo ko page tehateha.
-22-
7Tanga na enoni i pe nahuni takoha na ara ni takoha mataha ki bara ngavê tanga. Ngaia ki gâga bibi nga igê na hekarigiana.
-23-
8Manga na eraha ka na marâ iamu, na enoni ka visigo vigo oga sutaga. 9Vikana na ani mavê na katoha iamu ki era. Na enoni ka kikitenigo, suria go aharê igê na ara ni tarani.
-24-
10Manga go mameaga matena igê na bagabevoana, igo ko mameaga monari ngavê.
-25-
11Tamania na enoni ga suria pe oto hanana vi meme. Gu hagatahia tenia na mera. 12Siana ko vi, ‘I mareha vi na tagaraha iaku ngekana’. Suria God i girarago go tamasi monari se mareha. Ngaia ki page vatego renia na memu i araria na tauhamu.
-26-
13-14Kareku, na pirui ki mamaki ma ki koro tangago. Na pirui i mamaki i haramu ki tagenana ma manga na takoha mataha i koro tanga na ogaha iamu. Manga go nahuni takoha mataha, igo ki asa vigu bagahagêguri ma ko page akê me bâkoro hete i muri me.
-27-
15Siana ko gamora ni hanago tenia na enoni koro. Siana ko raua na ruma iana tenia. 16Na enoni koro, henaka i votavota hagarako, ngaia ki girara i aharaga ki rêra aporo tare. Ma na enoni i pe botage renia God, ngaia ki tapasu, ki votavota ma ki asa vige aharaga aporo.
-28-
17Manga na eraha ma ki tarahua na merongamu, siana ko manavatenia. Matena i votavota, siana ki akê na ageagemu renia. 18Na Araha ki kitenia na hemanavateana. I era ma na mangariaganiha iana ki apariri bê aporo tangago igo.
-29-
19Siana ki marâ na apemu, matena ga tavoraha bâkoro na marâ tangara na enoni era. Siana ko hengarira, 20suria na matena i muri ki page era tangara. Ngaira ka page magahuru.
-30-
21Kareku, go hagahigasia na Araha ma ko hanetasia na maneraha. Go hinarura na enoni ga guguruga tangarerua. 22Na hagaitangiha ki nanê ma tangara, ma igia na enoni ka pe girara, vi bagararaha manga i he ka na hagaitangiha tangara.
Tani nikâ na takoha mataha
23Igê tani nikâ na takoha mataha iata na enoni ni takoha.
I pe oto tanga na enoni i hagatamasi vige panepane henia ta apanena. 24Manga i vi tanga na enoni i takea na bevoa, ki vivi, vi pe takea na bevoa, na enoni hato ka page guharia ma ka page kikitenia. 25Ma na enoni i hagatamasi ma ki hagaitangia na enoni i takea na bevoa, ngaia ki page gâga igê na ramana ma na enoni ka page hagarahasia. 26Na aramiha igê na monariha ki na girarana na morana na hemanatangeana.
27Go tagarahigi hagenago na mu, hanana go mauri renigi, ma ko kahu tagarahia na ruma iamu.
28Manga go hagatanga monari igê na kotiha ki na tarana i higa. Siana ko takusia vi ngaia ka na tarana purua ma. Siana ko topegi kê nikâ maremu na tamasinga. 29Siana ko vi, ‘Ngaia ki erasiê, hoi, be erasia bê râ nogaku. Ke hetagenani.’
30Inê kê ri igê na mu ma na pariki ni vaini iana na mane i babaga ma ki pe nahuni takoha. 31Ngaigi ki masigu ngavê ma na tone ka rubuhigi. Na para rihigi ka ahogehoge. 32Matena gê bâsigi, inê kê takotako ma na takoha iaku ki râ vikê: 33Ua, gu tâ ku mamaro. Ua, gu tâ ku mêru. Ua, gu rumirumigo ku mamaro. 34Hoi, na matena go mauru, na matareha ki arâ me ma ki tarobusigo manga na manero.
Currently Selected:
NA MARAMARÊRAVA 24: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
