NA MARAMARÊRAVA 20
20
1Na tonoha ki katoa na enoni
ki rotarota ma ki pe hinaru mamariha.
Na enoni i ruguhia na tonoha
ki tasitasi na bêna.
2Na maneraha i mangariaga
ki manga na laione i ngurunguru.
Manga go hagamangaria, igo ko meme.
3Na enoni i pe nahuni takoha
ki haganegagi tare na hekorekoreani.
Ma ki manga go nakagi vê,
na enoni ka hagahigasigo.
4Na enoni i marusi vige hasia na mu iana
igê na matena tanga,
ngaia ki page têtê tara renigi na harisi.
5Na hagaotonga koro igê na aitangihana na enoni
ki manga na ve igê na ve karu i so ngavê.
Manga go nahuni aitangisiha, igo ko girara
go okegi hura mave tangago maremu.
6Rako na enoni ka vi, vi ngaira ka nahunigi
na hetakuiha ma na totosuriha.
Ma na ani ga mangara ngegana, kani i he?
7Na enoni i koro ma ki oto na parongana,
e, na karena ka babarisi ngavê!
8Manga na maneraha koro
ma ki oga igê na atohana ni suriha,
ngaia ki bâsia ototo râ nga, vi i he na eraha.
9Ti ki girara i vivi:
“Inê kê pe erasia rârâ ta na marâ.
I mareha rârâ na tasi i pasiku?”
10Na Araha ki kitenira na enoni
ga hagahagaparu igê na hagahigata ma na hagevovoani
matena ga hagavuri se ga vurivuri.
11Igo ko bâbâhagagara renia na kare
renigi na tauhana,
vi ngaia ki koro se mareha.
12Na Araha ki haganahunigia
renigi na maaka hanana ga bâbâ
ma renigi na karingaka hanana ga rongorongo.
13Manga go tâ ma ko mauru, igo ko matareha.
Manga go mauru riterite ki aharêsigo na ngêra.
14Na enoni i vurivuri ki vivi tare:
“Ravarava haga! I raha na mena!”
Ma na matena i aporo i pasina, ngaia ki ageage,
suria i vuria renia na mena i so ngavê.
15Na golo ma na hê ga raha na meni ka rako teha
ma na tamasinga ni aitangisiha ka pe rako,
henaka ga teharigi.
16Igo ko beka, manga go surusuru,
vigo barua na hagaba iana na enoni mahuara.
Ma ki arari, viga tavogi tenigo na nahuninga iamu,
mataro me ko barua na hagaba ngekana.
17Na ngêra go hanagogi ka ngê koro era vari
ma hemuri ki manga na one i haramu.
18Go tavogi hagenago na hagaotonga
ma ka kahu akê me maninga na katoha iamu.
Manga go obania vigo haganega na hearihatana,
go nahunia nga na katoha koro tanga na hearihatana.
19Na enoni i bagahagarongo
ki asa vige pinihia ta na marâ.
Siana ko hakunira na enoni ga tabotabohara tare.
20Manga go arangenirerua na enamu
igo ko page meme manga na mangate
i meme igê na roto hono.
21Na ruruguha ga arâ me rêrê tangago
ka hatohato rêrê vige tamanigo.
22Siana ko vi: “Inê kê page marabaru!”
Go hagêguria na Araha.
Ngaia ki page hagaotoa tangago.
23Na Araha ki kitenira na enoni
ga hagahagaparu igê na higahigani na marâ,
matena ga vurivuri se ga hagavuri.
24Na mêrihana na enoni ki oga i rimana na Araha.
Manga i he na enoni ki aitangisia na tara
i arâ igê na mêrihana?
25Go takotako maninga hagenago
ma ko kahu surusuru tanga God.
Manga i mareha, igo ko page tangahurigo,
suria i bara tangago vigu hagamonaria.
26Na maneraha i tako mataha
ki soso atera na enoni era
ma ki pe takotako rugu vige hagaitangira.
27Na aitangiha na Araha i vatea na enoni renia
ki manga na laiti i mavesia na obamu
ma ki asa vigu gavatenia na aitangiha.
28Na maneraha i korokoro tangara na kariana
ma ki tototo surira maninga
ngaia ki page maneraha arihu.
Na tarani ngegana ka na hunana na arahanga iana.
29Na enoni haoru ka ageagesigi na tê rikitaganiha iata
ma na gemêa ka ageagesigi na mêriha arihu iata.
30Na ramusiha raha ki hagakomagago tenia na eraha
ma ki katogo ko aitangi.
Currently Selected:
NA MARAMARÊRAVA 20: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
